“Padayon Ninyo nga Palanggaa ang Subong Sina nga mga Tawo”

SUGOD sang 1992, nagtangdo ang Nagadumala nga Hubon sang eksperiensiado kag hamtong nga Cristianong mga gulang para mabuligan ang mga komite sini sa paghimo sang ila hilikuton.a Naghalin sila sa “iban nga mga karnero” kag daku ang ila nabulig sa Nagadumala nga Hubon. (Juan 10:16) Nagatambong sila kada semana sa miting sang komite diin sila naasayn, kag nagahatag sila sang kinahanglanon nga mga impormasyon kag mga panugda. Ang mga miembro sang Nagadumala nga Hubon ang nagadesisyon, pero sila ang nagapatuman sang desisyon sang komite kag ginahimo nila ang mga hilikuton nga gin-asayn sa ila. Ginaupdan nila ang mga miembro sang Nagadumala nga Hubon sa pinasahi kag internasyonal nga mga kombension. Mahimo man sila ipadala sa pagduaw sa mga sanga talatapan bilang mga tiglawas sang ulong talatapan.

Ang isa sa ila nga nag-alagad sugod sang ginsugdan ini nga kahimusan nagsiling: “Kon ginahimo ko ang mga hilikuton nga gin-asayn sa akon, mas makakonsentrar ang Nagadumala nga Hubon sa ila mga responsibilidad.” Sa paghinumdom sang isa pa ka utod sa iya 20 ka tuig nga pag-alagad bilang kabulig, nagsiling sia: “Isa ini ka pribilehiyo nga wala ko gid ginpaabot.”

Daku gid ang ginsalig sang Nagadumala nga Hubon sa mga nagabulig sa ila kag ginaapresyar gid nila ang mapisan nga pag-alagad sining mainunungon nga mga utod nga lalaki. Kabay pa nga ‘padayon naton nga palanggaon ang subong sina nga mga tawo.’—Fil. 2:29.