ANO ANG GINASILING SANG BIBLIA?

Ano ang nagakatabo kon mapatay ang tawo?

ANG PILA KA TAWO NAGAPATI nga nagakabuhi ang tawo sa iban nga porma, samtang ang iban nagapati nga ang kamatayon amo ang katapusan sang tanan. Ano ang ginapatihan mo?

ANG GINASILING SANG BIBLIA

“Ang mga patay wala gid sing nahibaluan.” (Manugwali 9:5) Kon mapatay ang tawo, wala na sia nagaluntad.

KON ANO PA ANG MATUN-AN NATON SA BIBLIA

• Ang una nga tawo nga si Adan, nagbalik sa yab-ok sang napatay sia. (Genesis 2:7; 3:19) Sing kaanggid, ang tanan nga nagakapatay nagabalik sa yab-ok.—Manugwali 3:19, 20.

• Kon mapatay ang mga tawo, nahilway na ukon napatawad ang ila mga sala. (Roma 6:7) Wala na sila ginasilutan bangod sa sala kon mapatay sila.

Mabuhi pa bala ang mga patay?

ANO ANG MASILING MO?

• Huo

• Indi

• Siguro

ANG GINASILING SANG BIBLIA

“May pagkabanhaw.”—Binuhatan 24:15.

ANO PA ANG MATUN-AN NATON SA BIBLIA?

• Masami nga ginapaanggid sang Biblia ang kamatayon sa pagtulog. (Juan 11:11-14) Sarang mapukaw sang Dios ang mga patay, subong nga mapukaw naton ang tawo nga nagakatulog.—Job 14:13-15.

• Ginrekord sa Biblia ang pila ka pagkabanhaw, gani nagahatag ini sa aton sing mabakod nga basihan nga magpati nga ang mga patay banhawon.—1 Hari 17:17-24; Lucas 7:11-17; Juan 11:39-44.