TOPIKO SA KOBER | NGAA NAG-ANTOS KAG NAPATAY SI JESUS?

Natabo Gid Bala Ini?

Sang tigragas sang 33 C.E., ginpatay si Jesus nga Nazaretnon. Sayop sia nga ginsumbong sing sedisyon, ginsakit, kag ginlansang sa usok. Grabe gid ang iya kasakit sang napatay sia. Apang ginbanhaw sia sang Dios, kag pagligad sang 40 ka adlaw, nagkayab si Jesus sa langit.

Ining tumalagsahon nga kasaysayan mabasa sa apat ka Ebanghelyo sang Cristianong Griegong Kasulatan nga ginatawag man nga Bag-ong Katipan. Natabo gid bala ini? Nagakaigo gid ini kag serioso nga pamangkot. Kon wala ini matabo, wala sing pulos ang pagtuo sang mga Cristiano kag ang paglaum nga kabuhi nga dayon sa Paraiso isa lang ka damgo nga indi matuman. (1 Corinto 15:14) Apang kon natabo gid ini, may masanag nga palaabuton ang katawhan, kag mahimo nga isa ikaw sa makatigayon sini. Gani, ang mga kasaysayan bala sa Ebanghelyo matuod ukon sugidsugid lang?

ANG GINAPAKITA SANG MGA IMPORMASYON

Indi pareho sa mga uluistorya lang, ang mga sinulatan sa Ebanghelyo sibu gid kag detalyado. Halimbawa ginasambit sa sini ang ngalan sang mga lugar nga ang madamo sini makadtuan pa subong. Nagasugid ini parte sa mga tawo, nga ginapamatud-an sang mga historian nga nagluntad gid.—Lucas 3:1, 2, 23.

Ginsambit si Jesus sang mga manunulat sang una kag ikaduha nga siglo.a Ang paagi sang pagpatay sa iya nga ginalaragway sa mga Ebanghelyo nagasanto sa mga pamaagi sang Roma sadto sa pagsilot sing kamatayon. Isa pa, ginasaysay ang mga hitabo sing matuod kag tampad—bisan ang indi maayo nga ginhimo sang pila ka disipulo ni Jesus. (Mateo 26:56; Lucas 22:24-26; Juan 18:10, 11) Ginapakita sini nga ang mga manunulat sang Ebanghelyo mga bunayag kag matuod gid ang ila ginsulat parte kay Jesus.

ANO NAMAN ANG PARTE SA PAGKABANHAW NI JESUS?

Bisan pa ginabaton sang kalabanan nga si Jesus nagkabuhi kag napatay, ginaduhaduhaan sang pila ang iya pagkabanhaw. Bisan ang iya mga apostoles wala magpati dayon sang nabalitaan nila nga nabuhi sia. (Lucas 24:11) Pero nadula ang ila pangduhaduha sang nakita nila kag sang iban pa nga disipulo ang nabanhaw nga si Jesus sa lainlain nga higayon. Ang matuod, sa isa ka higayon, kapin sa 500 ka tawo ang nakakita sa iya.—1 Corinto 15:6.

Bisan pa may katalagman nga dakpon kag patyon ang mga disipulo, maisog nga ginbantala nila ang pagkabanhaw ni Jesus sa tanan—bisan sa mga nagpatay sa iya. (Binuhatan 4:1-3, 10, 19, 20; 5:27-32) Mangisog ayhan ang madamo nga disipulo kon indi sila sigurado nga nabanhaw si Jesus? Sa katunayan, bangod matuod ang pagkabanhaw ni Jesus, daku gid ang epekto sang Cristianismo sa kalibutan sadto kag subong.

Ang mga kasaysayan sa Ebanghelyo parte sa kamatayon kag pagkabanhaw ni Jesus nagapakita sang tanan nga palatandaan sang matuod gid nga rekord sang kasaysayan. Ang maid-id nga pagbasa sini magakumbinsi sa imo nga natabo gid ini. Mapabakod pa gid ang imo pagpati kon mahangpan mo kon ngaa natabo ini. Ipaathag ini sang masunod nga artikulo.

a Si Tacitus nga natawo sang mga 55 C.E., nagsulat nga “ang Cristo, nga amo ang ginhalinan sang ngalan [nga mga Cristiano], nag-antos sing mabug-at nga silot sa kamot sang isa naton ka opisyal nga si Poncio Pilato sa tion sang paggahom ni Tiberio.” Si Jesus ginpatuhuyan man ni Suetonius (unang siglo); sang Judiyo nga historian nga si Josephus (unang siglo); kag ni Pliny the Younger nga gobernador sang Bitinia (maaga nga bahin sang ikaduha nga siglo).

Ngaa Diutay Lang ang Reperensia nga Nagasakdag Sini?

Bangod daku gid ang impluwensia ni Jesus sa kalibutan, mapaabot bala naton nga ang mga reperensia sang unang siglo, nga indi base sa Biblia, maghatag sing pamatuod nga si Jesus nagkabuhi kag nabanhaw? Indi man gid. Ang isa ka rason amo nga ang mga Ebanghelyo ginsulat sang halos 2,000 ka tuig na ang nagligad. Diutay lang nga mga sinulatan sadto ang natipigan. (1 Pedro 1:24, 25) Mahimo man nga ang madamo nga nagpamatok kay Jesus indi magsulat sing bisan ano nga makabulig sa mga tawo nga magpati sa mga balita parte sa iya.

May kaangtanan sa pagkabanhaw ni Jesus, ang isa niya ka apostol nga si Pedro nagpaathag: “Ginbanhaw sia sang Dios sa ikatlo nga adlaw kag gintugutan sia nga makita sang mga tawo. Wala gintugutan sang Dios ang tanan nga makita sia kundi kami lang nga nagkaon kag nag-inom upod sa iya sa tapos sia mabanhaw gikan sa mga patay.” (Binuhatan 10:40, 41) Ngaa indi sa tanan nga tawo? Ginasugiran kita sang Ebanghelyo ni Mateo nga sang nabatian sang relihioso nga mga kaaway ang balita parte sa pagkabanhaw ni Jesus, gintinguhaan nila nga indi maglapta ini nga balita.—Mateo 28:11-15.

Buot bala silingon nga luyag ni Jesus nga isekreto ang iya pagkabanhaw? Indi, kay si Pedro nagsiling: “Ginsugo man niya kami nga magbantala sa mga tawo kag magpanaksi sing maid-id nga sia ang isa nga gintangdo sang Dios nga mangin hukom sang mga buhi kag sang mga patay.” Ginhimo ini sang matuod nga mga Cristiano kag padayon nila nga ginahimo ini.—Binuhatan 10:42.