TOPIKO SA KOBER | MGA PALANAN-AWON PARTE SA LANGIT
Mga Pamangkot Parte sa mga Nagaistar sa Langit
Nagapalibog ka bala parte sa langit, ukon kalibutan sang mga espiritu, kag kon sin-o ang mga nagaistar didto? Kon huo, wala ka nagaisahanon. Sa sulod sang linibo na ka tuig, lainlain ang pagpati sang mga tawo parte sini. Ang pila nagapati nga ang langit amo ang ilistaran sang mga katigulangan nga dapat padunggan. Ginaimadyin naman ini sang iban nga isa ka lugar nga malinong kag may daku nga kalipay nga ginaistaran sang mga anghel kag sang mabuot nga mga tawo nga napatay. Apang ang iban nagapati nga ang langit puluy-an sang minilyon ka dios.
Madamo nga tawo ang nagasiling nga indi naton mahibaluan ang parte sa langit kay wala pa sang naghalin didto nga makasugid sa aton. Pero sala ina nga rason. Si Jesucristo nagaistar sa langit, antes sia nagkadto diri sa duta. Maathag niya ini nga ginsiling sa mga lider sang relihion sang unang siglo: “Nagpanaug ako halin sa langit agod himuon ang kabubut-on sang nagpadala sa akon kag indi ang akon.” Gani, mapatihan gid ang ginsiling ni Jesus sa iya mga apostoles: “Sa balay sang akon Amay may madamo nga lugar nga mapuy-an.”—Juan 6:38; 14:2.
Siempre, ang Amay ni Jesus amo ang Dios, nga ang iya ngalan amo si Jehova, kag ang “balay” ni Jehova ara sa langit. (Salmo 83:18) Gani, wala na sing iban nga mas makalaragway sing maayo sangsa kay Jehova nga Dios kag kay Jesucristo parte sa langit. Madamo sila sang ginsugid parte sa langit paagi sa dalayawon nga mga palanan-awon nga ginhatag nila sa matutom nga mga tawo.
Binagbinagon sang masunod nga artikulo ang mga bahin sang Biblia nga nagalaragway kon ano ang nakita sang mga tawo sa pila ka palanan-awon. Samtang ginabinagbinag mo ini, dumduma nga ang kalibutan sang mga espiritu indi pisikal, wala ini sang mga butang nga matandog ukon makita. Gani imbes nga ipaathag ini nga mga butang sa espirituwal nga paagi, nga indi naton mahangpan, ginpahayag sang Dios sa mga palanan-awon kon ano gid ang langit, ukon kalibutan sang mga espiritu, sa paagi nga maintiendihan naton. Paagi sa mga palanan-awon, maintiendihan mo ang parte sa mga nagaistar sa “madamo nga lugar” sa langit.