TOPIKO SA KOBER | MGA ANGHEL—MATUOD BALA SILA? NGAA IMPORTANTE ANG SABAT?

Ang Kamatuoran Parte sa mga Anghel

Gusto mo bala mahibaluan ang kamatuoran parte sa mga anghel—kon sin-o sila, diin sila naghalin, kag kon ano ang ila ginahimo? Wala na sing mas maayo pa nga kuhaan sing sabat kundi ang Pulong sang Dios, ang Biblia. (2 Timoteo 3:16) Ano ang ginasugid sang Biblia sa aton?

Pareho sa Dios nga isa ka Espiritu, ang mga anghel indi man makita nga mga espiritu nga “wala sing unod kag mga tul-an.” Ining mainunungon nga mga anghel nagaistar sa langit kag makapalapit sa langitnon nga presensia sang Dios.—Lucas 24:39; Mateo 18:10; Juan 4:24.
Ang mga anghel kon kaisa nagapakita bilang tawo agod himuon ang asaynment nga ginhatag sang Dios sa ila sa duta kag dayon nangin espiritu liwat kon matapos nila ini.—Hukom 6:11-23; 13:15-20.
Bisan pa ginalaragway sang Biblia nga lalaki ang mga anghel kag nagapakita sila bilang lalaki, wala sing lalaki ukon babayi nga anghel. Wala sila nagapangasawa kag nagabata sing anghel man. Dugang pa, ang mga anghel indi mga tawo anay diri sa duta—pareho sang mga lapsag, kabataan, ukon mga adulto. Ang mga anghel gintuga ni Jehova; amo nga ginatawag sila sang Biblia nga “mga anak sang matuod nga Dios.”—Job 1:6; Salmo 148:2, 5.
Ang Biblia nagasiling nga may “mga lenguahe sang mga tawo kag sang mga anghel,” nga nagapakita nga ang espiritu nga mga persona may lenguahe kag makahambal sila. Bisan pa nga gingamit sang Dios ang mga anghel sa pagpakigkomunikar sa mga tawo, wala niya kita ginatugutan nga simbahon sila ukon mangamuyo sa ila.—1 Corinto 13:1; Bugna 22:8, 9.
May linaksa ka linaksa nga mga anghel, mahimo nga binilyon ang kadamuon nila.a—Daniel 7:10; Bugna 5:11.
Ang mga anghel “gamhanan,” mas gamhanan sa mga tawo, kag mas maalam. Tama sa ila kadasig kag indi gid naton maimadyin ang ila kadasigon.—Salmo 103:20; Daniel 9:20-23.
Bisan pa mas maalam kag gamhanan ang mga anghel, may mga limitasyon sila, kag may mga butang nga wala nila mahibaluan.—Mateo 24:36; 1 Pedro 1:12.
Ang mga anghel gintuga nga may mga personalidad, mga kinaiya nga pareho sa Dios, kag may kahilwayan sa pagdesisyon. Gani, pareho sa mga tawo, makapili sila kon himuon nila ang maayo ukon malain. Makapasubo nga ginpili sang pila ka anghel nga magrebelde sa Dios.—Judas 6.

a Ang isa ka laksa 10,000. Buot silingon, ang isa ka laksa sang isa ka laksa, 100 ka milyon. Pero, ang Bugna nagasiling nga “linaksa ka linaksa” ang mga anghel. Gani, may ginatos ka milyon, ukon binilyon, ka espiritu nga mga tinuga!

Paano Naorganisar ang mga Anghel?

Ang arkanghel, nga si Miguel, amo ang pangulo nga anghel nga may labaw gid nga gahom kag awtoridad sa tanan nga anghel. Ang Kasulatan maathag nga nagapakita nga ang Miguel isa pa ka ngalan ni Jesucristo.—1 Tesalonica 4:16; Judas 9.

Ang mga serafin may mas mataas nga ranggo sa tunga sang mga anghel may kaangtanan sa pribilehiyo kag kadungganan, kag ara sila sa palibot sang trono sang Dios.—Isaias 6:1-3.

Ang mga kerubin may mataas man nga ranggo kag may pinasahi nga mga responsibilidad nga naangot gid sa mahimayaon nga persona sang Labing Gamhanan. Pirme sila ginalaragway nga kaupod ni Jehova.—Genesis 3:24; Ezequiel 9:3; 11:22.

Ang iban pa ka linaksa nga mensahero nga anghel amo ang ginapadala kag ginasaligan sang Labing Mataas nga Dios sa pagtuman sang Iya kabubut-on.b—Hebreo 1:7, 14.

b Para sa dugang nga impormasyon parte sa mga anghel, tan-awa ang kapitulo 10 sang libro nga Ano Gid ang Ginatudlo sang Biblia? kag sa apendise nga may artikulo nga “Sin-o si Miguel nga Arkanghel?” nga ginbalhag sang mga Saksi ni Jehova. Mabasa man ini sa www.jw.org/hil.