Makatarunganon Ka Bala Pareho kay Jehova?

1, 2. (a) Ano nga inhustisya ang naeksperiensiahan ni Nabot kag sang iya mga anak? (b) Ano ang duha ka kinaiya nga binagbinagon naton sa sini nga artikulo?

IMADYINA ini nga eksena. Binutig nga gin-akusahan ang isa ka lalaki kag mahimo sia silutan sing kamatayon. Nakibot gid kag nasubuan ang iya pamilya kag mga abyan kay ginsentensiahan sia base sa indi matuod nga testimonya sang mga tawo nga kilala nga wala sing pulos. Nagalalain ang mga nagapabalor gid sa katarungan sang masaksihan nila ang pagpatay sa sining inosente nga tawo kag sa iya mga anak. Indi ini himuhimo lang nga istorya. Amo gid ini ang natabo sa matutom nga alagad ni Jehova nga si Nabot, nga nagkabuhi sang naggahom si Hari Ahab sa Israel.—1 Hari 21:11-13; 2 Hari 9:26.

² Sa sini nga artikulo, binagbinagon naton ang natabo kay Nabot kag ang nahimo nga sala sang isa ka matutom nga gulang sa Cristianong kongregasyon sang unang siglo. Paagi sa pagbinagbinag sini nga mga halimbawa sa Biblia, matun-an naton nga importante ang pagpaubos para mangin makatarunganon kita pareho kay Jehova. Matun-an man naton nga makatarunganon kita kon handa kita magpatawad bisan pa may makita kita nga inhustisya sa sulod sang kongregasyon.

ISA KA INHUSTISYA

3, 4. Ano nga klase sang tawo si Nabot, kag ngaa wala sia magsugot nga ibaligya ang iya ulubasan kay Hari Ahab?

³ Matutom si Nabot kay Jehova sang ang kalabanan nga Israelinhon nag-ilog sa malain nga si Hari Ahab kag sa malaut niya nga asawa nga si Rayna Jezebel. Nagasimba sila kay Baal kag wala sila sing pagtahod kay Jehova ukon sa iya mga kasuguan. Pero mas ginpabaloran ni Nabot ang iya kaangtanan kay Jehova sangsa iya mismo kabuhi.

⁴ Basaha ang 1 Hari 21:1-3. Wala magsugot si Nabot sang ginsilingan sia ni Ahab nga baklon ang iya ulubasan ukon bayluhan ini sang mas maayo pa nga ulubasan. Ngaa? Matinahuron sia nga nagpaathag: “Indi mahimo nga ihatag ko sa imo ang ginpanubli ko sa akon mga katigulangan bangod wala ini ginatugot ni Jehova.” Wala magsugot si Nabot bangod suno sa kasuguan ni Jehova sa pungsod sang Israel, indi dapat pag-ibaligya ang palanublion sang isa ka tribo nga indi na mabawi pa. (Lev. 25:23; Num. 36:7) Gani gintuman ni Nabot si Jehova.

5. Ano ang ginhimo ni Jezebel para mapapatay si Nabot?

⁵ Sang wala magpasugot si Nabot, naghimo sang malain si Hari Ahab kag ang iya asawa. Para makuha ni Jezebel ang ulubasan kag mahatag ini sa iya bana, nagpadihot sia nga may mag-akusar sing binutig kay Nabot, kag nagresulta ini sa pagpatay sa iya kag sa iya mga anak. Ano ang ginhimo ni Jehova sa sini nga inhustisya?

MATARONG NGA PAGHUKOM SANG DIOS

6, 7. Paano ginpakita ni Jehova nga ginapabaloran niya ang katarungan, kag ngaa nakapaumpaw ini sa pamilya kag mga abyan ni Nabot?

⁶ Ginsugo gilayon ni Jehova si Elias nga kadtuan si Ahab. Gintawag ni Elias si Ahab nga manugpatay kag kawatan. Ano ang desisyon ni Jehova sa sini nga kaso? Patyon man si Ahab, ang iya asawa, kag ang iya mga anak, pareho sang natabo kay Nabot kag sa iya mga anak.—1 Hari 21:17-25.

⁷ Bisan pa nasubuan gid ang pamilya kag mga abyan ni Nabot sa pagpatay sa iya ni Ahab, mahimo gid nga naumpawan sila sang mahibaluan nila nga nakita ni Jehova ang inhustisya kag naghikot sia gilayon para masilutan ang may sala. Pero mahimo nga natilawan man ang ila pagpaubos kag ang ila pagsalig kay Jehova sa masunod nga natabo.

8. Ano ang ginhimo ni Ahab sang mabatian niya ang desisyon ni Jehova, kag ano ang resulta?

⁸ Sang mabatian ni Ahab ang desisyon ni Jehova, “gingisi niya ang iya mga bayo kag nagsuksok sia sing sako. Dayon nagpuasa sia kag naghigda nga nagasuksok sing sako kag naglakatlakat sia nga nagapangasubo.” Nagpaubos gid si Ahab! Ano ang resulta? Nagsiling si Jehova kay Elias: “Tungod nagpaubos sia, indi ko pagpahanabuon ang kalaglagan sa panahon niya. Pahanabuon ko ang kalaglagan batok sa iya panimalay sa panahon sang iya anak.” (1 Hari 21:27-29; 2 Hari 10:10, 11, 17) Ginkaluuyan si Ahab ni Jehova, “ang nagausisa sang mga tagipusuon.”—Hulu. 17:3.

MAKAAMLIG ANG PAGPAUBOS

9. Ngaa nakaamlig sa pamilya kag mga abyan ni Nabot ang ila pagpaubos?

⁹ Ano ang epekto sini nga desisyon sa mga nakahibalo sang malain gid nga ginhimo ni Ahab? Mahimo nga natilawan sa sini ang pagtuo sang pamilya kag mga abyan ni Nabot. Nakaamlig sa ila ang ila pagpaubos, kay nakabulig ini sa ila nga magpadayon nga mangin matutom sa pagsimba kay Jehova, kag nagasalig nga imposible nga mangin indi makatarunganon ang Dios. (Basaha ang Deuteronomio 32:3, 4.) Mahatagan sing bug-os nga hustisya si Nabot, ang iya mga anak, kag ang ila pamilya kon banhawon na ni Jehova ang mga matarong. (Job 14:14, 15; Juan 5:28, 29) Isa pa, ginadumdom sang mapainubuson nga tawo nga “hukman sang matuod nga Dios ang tanan nga hinimuan, lakip ang tanan nga natago nga butang, kon bala ini maayo ukon malain.” (Man. 12:14) Kon nagahukom si Jehova, ginabinagbinag niya ang mga butang nga wala naton mahibaluan. Gani ang pagpaubos makaamlig sa aton nga indi mapahamak sa espirituwal.

10, 11. (a) Sa ano nga mga sitwasyon nga makabatyag kita sing inhustisya? (b) Paano makaamlig sa aton ang pagpaubos?

¹⁰ Ano ang himuon mo kon indi mo mahangpan ang desisyon sang mga gulang ukon indi ka ugyon sa sini? Halimbawa, ano ang himuon mo kon ginkuha sa imo ukon sa isa mo ka hinigugma ang ginapabaloran mo nga pribilehiyo sa pag-alagad? Ano abi kon ma-disfellowship ang imo tiayon, bata, ukon suod nga abyan kag indi ka ugyon sa sini nga desisyon? Ano abi kon nagapati ka nga indi husto nga ginkaluuyan ang isa nga nakasala? Matilawan sa sini ang aton pagtuo kay Jehova kag sa kahimusan sang iya organisasyon. Paano makaamlig sa imo ang pagpaubos? Binagbinagon naton ang duha ka paagi.

¹¹ Una, kon mapainubuson kita, batunon naton nga wala kita makahibalo sang tanan nga impormasyon. Bisan ano pa kadamo sang nahibaluan naton sa isa ka sitwasyon, si Jehova lang ang nakahibalo sang ara sa tagipusuon sang isa. (1 Sam. 16:7) Kon dumdumon naton ini, magapaubos kita, batunon naton ang aton mga limitasyon, kag pasibuon ang aton pagtamod. Ikaduha, kon mapainubuson kita, magapasakop kita kag magahulat kay Jehova sa pagtadlong sa inhustisya kon may ara gid man. Nagsulat ang maalam nga tawo: “Maayo ang madangatan sang mga nagakahadlok sa matuod nga Dios . . . , apang indi maayo ang madangatan sang malauton, kag indi niya mapalawig ang iya kabuhi.” (Man. 8:12, 13) Gani makabenepisyo gid ang tanan kon magpaubos kita.—Basaha ang 1 Pedro 5:5.

ISA KA SALIMPAPAW NGA BUHAT

12. Ano nga kasaysayan ang binagbinagon naton, kag ngaa?

¹² Naeksperiensiahan sang mga Cristiano sang unang siglo sa Antioquia sa Siria ang isa ka sitwasyon nga nagtilaw sa ila pagpaubos kag sa ila kahanda sa pagpatawad. Binagbinagon naton ini nga kasaysayan kag kon paano ini makabulig sa aton nga mausisa ang aton pagtamod sa pagpatawad kag mahangpan pa gid kon ano ang kaangtanan sang pagpatawad sa pagkamakatarunganon ni Jehova.

13, 14. Ano nga mga responsibilidad ang nabaton ni apostol Pedro, kag paano sia nagpakita sang kaisog?

¹³ Kilala gid nga gulang sa Cristianong kongregasyon si apostol Pedro. Suod sia kay Jesus kag ginsaligan sang importante nga mga responsibilidad. (Mat. 16:19) Halimbawa, sang 36 C.E., ginpadala sia para isugid ang maayong balita kay Cornelio kag sa iya panimalay. Talalupangdon ini nga hitabo bangod si Cornelio isa ka wala matuli nga Gentil. Sang nakabaton sing balaan nga espiritu si Cornelio kag ang iya panimalay, nagsiling si Pedro: “Ini nga mga tawo nakabaton man sing balaan nga espiritu pareho naton, gani sin-o ang makasiling nga indi sila mahimo bawtismuhan sa tubig?”—Binu. 10:47.

¹⁴ Sang 49 C.E., nagtipon ang mga apostoles kag mga gulang sa Jerusalem para binagbinagon kon dapat pa magpatuli ang mga Gentil nga nangin Cristiano. Sa sini nga miting, may kaisog nga ginpahanumdom ni Pedro ang mga kauturan parte sa natabo pila ka tuig ang nagligad nga nakabaton sing balaan nga espiritu ang wala matuli nga mga Gentil. Bangod nasaksihan ni Pedro ini nga hitabo, nakabulig ini sa nagadumala nga hubon sang unang siglo sa pagdesisyon. (Binu. 15:6-11, 13, 14, 28, 29) Mahimo gid nga naapresyar sang Judiyo kag Gentil nga mga Cristiano ang kaisog ni Pedro sa pagsugid sang kamatuoran. Mahapos gid para sa ila nga magsalig sa iya nga hamtong sa espirituwal!—Heb. 13:7.

15. Ano nga sala ang nahimo ni Pedro sang didto sia sa Antioquia sa Siria? (Tan-awa ang piktyur sa umpisa sini nga artikulo.)

¹⁵ Pagkatapos sadto nga miting sang 49 C.E., nagbisita si Pedro sa Antioquia sa Siria. Nakig-upod sia sa iya mga kauturan nga Gentil didto. Nakabenepisyo gid sila sa ihibalo kag eksperiensia ni Pedro. Pero mahimo gid nga nakibot sila kag nasaklaw sang gulpi lang nga wala na sia nagakaon upod sa ila. Gin-impluwensiahan man ni Pedro ang iban pa nga Judiyo nga mga Cristiano, pati si Bernabe, nga sundon sia. Ngaa nahimo sang isa ka hamtong nga Cristianong gulang ini nga sala, nga mahimo magbahinbahin sa kongregasyon? Kag ano ang matun-an naton sa sala ni Pedro nga makabulig sa aton kon masaklaw kita sa ginsiling ukon ginhimo sang isa ka gulang?

16. Paano gintadlong si Pedro, kag ano ang mahimo naton ipamangkot?

¹⁶ Basaha ang Galacia 2:11-14. Nasiod si Pedro sang kahadlok sa tawo. (Hulu. 29:25) Bisan pa nahibaluan niya ang pagtamod ni Jehova, nahadlok sia sa hunahunaon sang natuli nga Judiyo nga mga Cristiano halin sa Jerusalem. Ginsaway ni apostol Pablo si Pedro sa Antioquia kag gintawag sia nga salimpapaw, kay nabatian man ni Pablo ang ginsiling ni Pedro sa miting sa Jerusalem sang 49 C.E. (Binu. 15:12; Gal. 2:13, footnote) Ano ang himuon sang Gentil nga mga Cristiano nga ginsaklaw ni Pedro? Masandad bala sila? Kuhaon bala ang mga responsibilidad nga ginhatag kay Pedro bangod sang iya sala?

MAGPATAWAD

17. Ngaa masiling nga ginpatawad ni Jehova si Pedro?

¹⁷ Mapainubuson nga ginbaton ni Pedro ang pagtadlong sa iya ni Pablo. Indi mabasa sa Kasulatan nga ginkuha ang iya mga responsibilidad. Ang matuod, gintuytuyan sia sang ulihi sa pagsulat sang duha ka sulat nga nangin bahin sang Biblia. Sa iya ikaduha nga sulat, gintawag ni Pedro si Pablo nga “aton hinigugma nga utod.” (2 Ped. 3:15) Bisan pa mahimo nga nasaklaw ang Gentil nga mga Cristiano sa nahimo nga sala ni Pedro, padayon sia nga gingamit ni Jesus, ang ulo sang kongregasyon. (Efe. 1:22) May kahigayunan ang mga kauturan sa kongregasyon nga ilugon si Jesus kag ang iya Amay paagi sa pagpatawad kay Pedro. Kuntani wala sing nasandad sa sala sining indi perpekto nga tawo.

18. Sa ano nga mga sitwasyon nga dapat kita mangin makatarunganon pareho kay Jehova?

¹⁸ Pareho sang unang siglo, indi man perpekto ang mga gulang sa Cristianong kongregasyon subong, “kay kita tanan makasala sing madamong beses.” (Sant. 3:2, footnote) Mahapos ini batunon, pero mahimo mabudlayan na kita kon kita mismo ang apektado sang pagkadihimpit sang isa ka utod. Sa sini nga sitwasyon, mangin makatarunganon bala kita pareho kay Jehova? Halimbawa, ano ang himuon mo kon daw may ginadampigan ang isa ka gulang sa iya ginsiling? Masandad ka bala kon may ginhambal ang isa ka gulang nga nakasaklaw ukon nakasakit sa imo? Sa baylo nga maghunahuna dayon nga indi na sia kalipikado nga mangin gulang, magahulat ka bala kay Jesus, ang ulo sang kongregasyon? Sa baylo nga magpokus sa sala sang utod, indi ayhan mas maayo nga dumdumon nga matutom sia nga nag-alagad sa madamo nga tinuig? Kon ang utod nga nakasala sa imo isa gihapon ka gulang ukon ginhatagan pa sing dugang nga responsibilidad, malipay ka bala para sa iya? Kon handa ka magpatawad, ginapakita mo nga makatarunganon ka pareho kay Jehova.​—Basaha ang Mateo 6:14, 15.

19. Ano ang determinado naton nga himuon?

¹⁹ Ginapaabot gid sang mga nagapabalor sa katarungan ang tion nga dulaon na ni Jehova ang tanan nga inhustisya nga gindala ni Satanas kag sang iya malaut nga sistema. (Isa. 65:17) Samtang wala pa ina, kabay pa nga mangin determinado kita nga mangin makatarunganon pareho kay Jehova paagi sa pagbaton sa aton mga limitasyon kag sa pagpatawad sa mga nakasala sa aton.