Indi Pagpabay-i nga Magbugnaw ang Imo Gugma
“Bangod sang pagdamo sang kalautan, ang gugma sang madamo nga tawo magabugnaw.”—MAT. 24:12.
1, 2. (a) Kay sin-o una nga natuman ang ginsiling ni Jesus sa Mateo 24:12? (b) Paano ginpamatud-an sang Binuhatan nga ang kalabanan nga Cristiano sang unang siglo nagpakita sang gugma? (Tan-awa ang piktyur sa umpisa sini nga artikulo.)
GINTAGNA ni Jesus nga sa “hingapusan sang sistema sang mga butang,” “ang gugma sang madamo nga tawo magabugnaw.” (Mat. 24:3, 12) Ang mga Judiyo sang unang siglo nangangkon nga mga katawhan sila sang Dios, pero ginpabay-an nila nga magbugnaw ang ila gugma sa Dios.
2 Pero, ang kalabanan nga Cristiano sadto masako sa “pagbantala sing maayong balita tuhoy [sa] Cristo” kag sa pagpakita sang gugma sa Dios, sa mga masigka-Cristiano, kag sa mga indi tumuluo. (Binu. 2:44-47; 5:42) Apang, ginpabay-an sang pila ka sumulunod ni Jesus sang unang siglo nga magbugnaw ang ila gugma.
3. Ngaa nagbugnaw ang gugma sang pila ka Cristiano?
3 Ang ginbanhaw nga si Jesucristo nagsiling sa mga Cristiano sa Efeso sang unang siglo: “Amo ini ang naindi-an ko sa imo, nga ginbayaan mo ang imo una nga gugma.” (Bug. 2:4) Ano ayhan ang rason? Mahimo nga ining mga disipulo sang Cristo naimpluwensiahan sang kalibutan nga mahunahunaon sa unod. (Efe. 2:2, 3) Pareho sa madamo nga siudad subong, ang Efeso sang unang siglo puno sing kalainan. Manggaranon ini nga siudad kag ang importante sa mga tawo diri amo ang manggad, kalingawan, kag matawhay nga pagkabuhi. Ginauna nila nga paayawan ang ila mga handum sangsa magpakita sang gugma sa iban. Lapnag man ang matampalason nga paggawi kag imoral nga mga buhat.
4. (a) Paano nagabugnaw ang gugma subong? (b) Ano ang binagbinagon naton?
4 Ang tagna ni Jesus parte sa pagbugnaw sang gugma nagakatuman asta subong. Nagabugnaw nga nagabugnaw ang gugma sang mga tawo sa Dios. Minilyon ang nagadangop sa mga organisasyon sang tawo sa pagsolbar sang ila mga problema imbes nga sa Dios. Gani padayon nga nagabugnaw ang gugma sang mga tawo nga wala nagasimba kay Jehova nga Dios. Pero, pareho sang natabo sa kongregasyon sang Efeso sang unang siglo, mahimo mangin kampante ang matuod nga mga Cristiano subong kag mapabay-an nga magbugnaw ang ila gugma. Gani mahimo matilawan ang aton gugma. Binagbinagon naton ang tatlo sa sini: (1) Gugma kay Jehova, (2) gugma sa kamatuoran sa Biblia, kag (3) gugma sa mga kauturan.
GUGMA KAY JEHOVA
5. Ngaa dapat naton higugmaon ang Dios?
5 Sang adlaw nga nagpaandam si Jesus parte sa pagkadula sang gugma, ginsambit man niya ang pinakaimportante nga gugma kag amo ini ang una niya nga ginpatalupangod. Nagsiling sia: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang nahauna kag pinakaimportante nga sugo.” (Mat. 22:37, 38) Kon may mabakod kita nga gugma sa Dios, mabuligan kita sini nga tumanon ang mga sugo ni Jehova, magbatas, kag dumtan ang malaut. (Basaha ang Salmo 97:10.) Pero, ginatinguhaan ni Satanas kag sang iya kalibutan nga paluyahon ang aton gugma sa Dios.
6. Ano ang resulta sang pagkadula sang gugma sa Dios?
6 Indi husto ang pagtamod sang kalibutan sa gugma. Sa baylo nga ang Manunuga ang higugmaon, ang mga tawo “mahigugmaon sa kaugalingon.” (2 Tim. 3:2) Ginapasanyog sang kalibutan nga ginagamhan ni Satanas “ang kailigbon sang unod kag ang kailigbon sang mga mata kag ang pagpadayawdayaw sang palangabuhian sang isa.” (1 Juan 2:16) Ginpaandaman ni apostol Pablo ang iya mga masigka-Cristiano batok sa pag-una sa mga handum sang unod: “Ang paghunahuna suno sa unod nagakahulugan sing kamatayon . . . bangod ang paghunahuna suno sa unod nagakahulugan sing pagpakig-away sa Dios.” (Roma 8:6, 7) Ang mga tawo nga nag-una sang materyal nga mga butang ukon nagpaayaw sa seksuwal nga mga handum napaslawan lang kag nag-antos sang mga kasakit.—1 Cor. 6:18; 1 Tim. 6:9, 10.
7. Ano nga mga katalagman ang ginaatubang sang mga sumulunod sang Cristo subong?
7 Sa pila ka kadutaan, ang panudlo sang mga atiesta, sang mga nagaduhaduha nga may Dios, kag sang mga ebolusyonista mahimo magresulta sa pagkadula sang gugma sa Dios kag sang pagtuo nga may Dios. Nagasiling sila nga ang mga madali papatihon ukon ang mga wala nakaeskwela amo lang ang nagapati sa Manunuga. Mas ginadayaw man ang mga sientipiko sangsa Manunuga. (Roma 1:25) Kon pamatian naton ini nga mga panudlo, mapahilayo kita kay Jehova, kag magabugnaw ang aton gugma.—Heb. 3:12.
8. (a) Ano nga mga kahimtangan ang makapaluya sang buot sang katawhan ni Jehova? (b) Ano ang ginapasalig sa aton sang Salmo 136?
8 Ang pagluya sang buot makapaluya man sang aton pagtuo kag makapabugnaw sang aton gugma sa Dios. Sa sining malaut nga kalibutan nga ginagamhan ni Satanas, may mga tion gid nga mahimo magluya ang aton buot. (1 Juan 5:19) Mahimo nga nagakabalaka kita bangod sang katigulangon, indi maayo nga panglawas, ukon problema sa pinansial. Ukon basi nasubuan kita kay indi na naton mahimo ang masarangan naton sang una, wala natuman ang aton ginapaabot, ukon napaslawan kita. Pero, indi naton dapat pagtugutan ini nga mga kahimtangan ukon mga balatyagon nga magpati kita nga ginbayaan kita ni Jehova. Sa baylo, dapat naton pamalandungan ang makapalig-on nga ginsiling parte sa mainunungon nga gugma ni Jehova sa aton. Mabasa naton ini sa Salmo 136:23, nga nagasiling: “Gindumdom niya kita sang indi maayo ang aton kahimtangan, kay ang iya mainunungon nga gugma wala sing katapusan.” Huo, wala nagabag-o ang mainunungon nga gugma ni Jehova sa iya mga alagad. Gani, makasalig kita nga ginapamatian niya ang aton “pagpangayo sing bulig” kag sabton niya ini.—Sal. 116:1; 136:24-26.
9. Ano ang nagpabakod sa gugma ni Pablo sa Dios?
9 Pareho sang salmista, napalig-on man si Pablo paagi sa pagpamalandong kon paano sia ginbuligan ni Jehova. Nagsulat si Pablo: “Si Jehova ang akon manugbulig; indi ako magkahadlok. Ano ang mahimo sang tawo sa akon?” (Heb. 13:6) Ining malig-on nga pagsalig ni Pablo sa mahigugmaon nga pag-ulikid ni Jehova, nakabulig sa iya nga malampuwasan ang mga problema. Wala niya gintugutan ang indi maayo nga mga kahimtangan nga magpaluya sa iya. Ang matuod, bisan pa sang napriso si Pablo, nagsulat sia sing makapalig-on nga mga sulat. (Efe. 4:1; Fil. 1:7; Filem. 1) Huo, wala nagbugnaw ang gugma ni Pablo sa Dios bisan pa sang grabe nga pagtilaw. Ano ang nagpabakod sa iya? Padayon sia nga nagsalig sa “Dios nga nagahatag sang tanan nga sahi sang lugpay, nga nagalugpay sa aton sa tanan naton nga mga pagtilaw.” (2 Cor. 1:3, 4) Paano naton mailog si Pablo kag mapabakod ang aton gugma kay Jehova?
Higugmaa si Jehova (Tan-awa ang parapo 10)
10. Paano naton mapabakod ang aton gugma kay Jehova?
10 Ginsiling ni Pablo ang isa ka paagi nga mapabakod naton ang aton gugma kay Jehova. Nagsulat sia sa iya masigkatumuluo: “Padayon kamo nga magpangamuyo.” Sang ulihi, nagsulat man sia: “Magpadayon kamo sa pagpangamuyo.” (1 Tes. 5:17; Roma 12:12) Ang komunikasyon sa Dios paagi sa pangamuyo amo ang pundasyon sang suod nga kaangtanan sa iya. (Sal. 86:3) Kon pirme naton ginapabutyag kay Jehova ang aton pinakasulod nga panghunahuna kag balatyagon, mas magasuod kita sa aton Amay sa langit, nga “Manugpamati sang pangamuyo.” (Sal. 65:2) Dugang pa, kon pamalandungan naton ang mga sabat ni Jehova sa aton mga pangamuyo, mas magabakod ang aton gugma sa iya. Mas magasalig kita nga “si Jehova malapit sa tanan nga nagapanawag sa iya.” (Sal. 145:18) Ini nga pagsalig sa mahigugmaon nga pagsakdag ni Jehova makabulig sa aton nga maatubang ang bisan ano nga pagtilaw sa aton pagtuo.
GUGMA SA KAMATUORAN SA BIBLIA
11, 12. Paano naton mapalig-on ang aton gugma sa kamatuoran sa Biblia?
11 Subong mga Cristiano, ginapabaloran kag ginahigugma naton ang kamatuoran. Sa Pulong sang Dios lang makita ang kamatuoran. Sa pangamuyo ni Jesus sa iya Amay, nagsiling sia: “Ang imo pulong kamatuoran.” (Juan 17:17) Gani, ang gugma sa kamatuoran nagaumpisa sa pagkuha sang sibu nga ihibalo sa Pulong sang Dios. (Col. 1:10) Pero, indi bastante ang pagkuha lang sang ihibalo. Talupangda kon paano ang manunulat sang Salmo 119 makabulig sa aton nga mahangpan ang buot silingon sang paghigugma sa kamatuoran sa Biblia. (Basaha ang Salmo 119:97-100.) Sa isa ka adlaw, may tion bala kita sa pagpamalandong sa mga teksto sa Kasulatan ukon ginahangop bala naton ini sing maayo? Kon pamalandungan naton ang benepisyo sang pag-aplikar sang mga kamatuoran sa Biblia sa aton kabuhi, mas pabaloran pa gid naton ini.
12 Nagsiling pa ang salmista: “Katam-is gid sang imo mga pulong sa akon baba, mas matam-is pa ini sangsa dugos!” (Sal. 119:103) Manamian man kita sa manamit nga espirituwal nga pagkaon nga nabase sa Biblia halin sa organisasyon sang Dios. Kon manamit ang pagkaon, indi padali ang aton pagkaon sini. Amo man sa aton pagtuon. Kon indi ini padali, mabuligan kita sini nga madumduman ang “matahom nga mga tinaga” sang kamatuoran kag magamit naton ini sa pagbulig sa iban.—Man. 12:10.
13. Ano ang nakabulig kay Jeremias nga higugmaon ang kamatuoran sa Kasulatan, kag ano ang epekto sini sa iya?
13 Ginhigugma ni manalagna Jeremias ang kamatuoran sa Kasulatan. Talupangda ang epekto sang pulong sang Dios sa iya tagipusuon. “Sang makita ko ang imo pulong, ginkaon ko ini; naghugyaw kag nagkalipay ang akon tagipusuon tungod sang imo pulong, kay gintawag ako sa imo ngalan, O Jehova nga Dios sang mga kasuldadusan.” (Jer. 15:16) Paagi sa pagpamalandong sa hamili nga pulong sang Dios, daw pareho lang nga ginkaon ini ni Jeremias kag gintunaw. Bangod sini, mas gin-apresyar niya ang pribilehiyo nga tawgon sa ngalan sang Dios. Kon ginahigugma naton ang kamatuoran sa Biblia, marealisar naton nga isa ka pinasahi nga pribilehiyo nga dalhon ang ngalan sang Dios kag ibantala ang iya Ginharian sa sining tion sang katapusan.
Higugmaa ang kamatuoran sa Biblia (Tan-awa ang parapo 14)
14. Paano naton mapalig-on ang aton gugma sa kamatuoran sa Biblia?
14 Magluwas sa pagbasa sang Biblia kag sang aton mga publikasyon nga nabase sa Biblia, paano pa naton mapalig-on ang aton gugma sa kamatuoran sa Biblia? Paagi sa pagtambong sing regular sa mga miting sang kongregasyon. Ang pagtuon sa Biblia kada semana nga nagagamit sang Ang Lalantawan amo ang panguna nga paagi nga ginatudluan kita. Para mahangpan gid naton ang topiko nga ginabinagbinag, dapat handaan naton sing maayo ang Pagtinuon sa Ang Lalantawan. Mahimo naton ini paagi sa pagbasa sa aton Biblia sang tanan nga teksto sa artikulo. Subong, ma-download na naton ang Lalantawan sa jw.org/hil nga website ukon mabasa ini sa JW Library nga app sa madamo nga lenguahe. Mas madali na gani makita ang mga teksto sa pila ka elektroniko nga pormat sini. Bisan ano man ang aton paagi sa pagtuon, ang pagbasa sang mga kasulatan kag pagpamalandong sa sini magapalig-on sang aton gugma sa kamatuoran sa Biblia.—Basaha ang Salmo 1:2.
GUGMA SA MGA KAUTURAN
15, 16. (a) Suno sa Juan 13:34, 35, ano ang aton obligasyon? (b) Ngaa makasiling kita nga ang aton gugma sa mga kauturan may direkta nga kaangtanan sa aton gugma sa Dios kag sa Biblia?
15 Sa katapusan nga gab-i ni Jesus sa duta, nagsiling sia sa iya mga disipulo: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:34, 35.
16 Ang aton gugma sa mga kauturan may direkta nga kaangtanan sa aton gugma kay Jehova. Ang matuod, kon wala kita sing gugma sa Dios, indi naton mahigugma ang mga kauturan. Kag kon wala naton ginahigugma ang mga kauturan, indi naton mahigugma ang Dios. Si apostol Juan nagsulat: “Ang isa nga wala nagahigugma sa iya utod, nga makita niya, indi makahigugma sa Dios, nga wala niya makita.” (1 Juan 4:20) Ang aton gugma kay Jehova kag sa mga kauturan may direkta man nga kaangtanan sa aton gugma sa Biblia. Ngaa? Bangod ang gugma sa kamatuoran sa Biblia nagapahulag sa aton nga tumanon sing tinagipusuon ang mga sugo sa Kasulatan nga higugmaon ang Dios kag ang mga kauturan.—1 Ped. 1:22; 1 Juan 4:21.
Higugmaa ang mga kauturan (Tan-awa ang parapo 17)
17. Ano ang pila ka paagi nga mapakita naton ang aton gugma?
17 Basaha ang 1 Tesalonica 4:9, 10. Ano ang pila ka praktikal nga paagi nga mapakita naton ang aton gugma sa mga kauturan? Ang isa ka tigulang nga utod mahimo nga kinahanglan sing masakyan para makatambong sa Cristianong mga miting. Ang isa ka balo nga may kalay-uhon sa iya balay mahimo nga kinahanglan buligan. (Sant. 1:27) Ang mga kauturan, bata man ukon tigulang, nga naluyahan sing buot ukon nasubuan ukon nagaatubang sing mga pagtilaw nagakinahanglan sang aton tion, pagpalig-on, kag lugpay. (Hulu. 12:25; Col. 4:11) Kon ginapakita naton paagi sa pulong kag buhat nga nagaulikid gid kita “sa aton mga masigkatumuluo,” ginapamatud-an naton nga ginahigugma naton sila.—Gal. 6:10.
18. Ano ang makabulig sa aton nga masolbar ang mga indi paghangpanay sa aton mga kauturan?
18 Ang Biblia nagtagna nga “sa katapusan nga mga adlaw” sining malaut nga sistema madamo ang mangin maiyaiyahon kag makagod. (2 Tim. 3:1, 2) Gani bilang mga Cristiano, dapat manikasog gid kita nga pabakuron ang aton gugma sa Dios, sa kamatuoran sa Biblia, kag sa isa kag isa. Matuod, mahimo nga indi kita maghangpanay sang aton mga kauturan kon kaisa. Pero, daku gid ang pagpakamaayo sa tanan sa kongregasyon kon solbaron naton ang mga indi paghangpanay paagi sa gugma! (Efe. 4:32; Col. 3:14) Kabay pa nga indi naton pagpabay-an nga magbugnaw ang aton gugma! Sa baylo, padayon naton nga pabakuron ang aton gugma kay Jehova, sa iya Pulong, kag sa aton mga kauturan.