Gugma​—Hamili nga Kinaiya

GINTUYTUYAN si apostol Pablo nga magsulat parte sa siam ka kinaiya nga ginapatubas sang balaan nga espiritu. (Gal. 5:22, 23; footnote) Ginatawag ini nga “bunga sang espiritu.”a Bahin ini sang “bag-o nga personalidad.” (Col. 3:10) Pareho sa kahoy nga magapamunga gid kon mabunyagan sing maayo, mapakita sang isa ining maayo nga mga kinaiya kon ara sa iya ang balaan nga espiritu.—Sal. 1:1-3.

Ang una nga kinaiya nga ginsambit ni Pablo amo ang gugma. Ngaa hamili ini? Nagsiling si Pablo nga kon wala sia sing gugma, ‘wala sia sing pulos.’ (1 Cor. 13:2) Pero ano ang gugma, kag paano naton ini mapalambo kag mapakita kada adlaw?

ANO ANG GUGMA?

Mabudlay ipaathag kon ano gid ang gugma, pero ginlaragway sang Biblia kon paano ini ginapakita. Halimbawa, mabasa naton nga ang gugma “mapinasensiahon kag mainayuhon.” “Nagakalipay” man ini “sa kamatuoran,” kag “nagaantos ini sang tanan nga butang, nagapati sang tanan nga butang, nagalaum sang tanan nga butang, nagabatas sang tanan nga butang.” Ang tawo nga may gugma nagapalangga sa iban, nabalaka sa ila, kag nagaunong sa ila. Pero ang tawo nga wala sing gugma mahisaon, bugalon, nagagawi sing indi nagakaigo, maiyaiyahon, kag wala nagapatawad. Sa baylo sining indi maayo nga mga kinaiya, dapat naton ipakita ang gugma nga ‘wala nagapangita sang kaugalingon nga kaayuhan.’—1 Cor. 13:4-8.

PINAKAMAAYO NGA GUGMA NGA GINPAKITA NI JEHOVA KAG NI JESUS

“Ang Dios gugma.” Si Jehova ang pinakamaayo nga halimbawa sa pagpakita sang gugma. (1 Juan 4:8) Ginapamatud-an ini sang tanan niya nga ginahimo. Ginpakita niya ang pinakadaku nga pamatuod sang iya gugma sang ginpadala niya si Jesus nga mag-antos kag mapatay para sa aton. Nagsiling si apostol Juan: “Paagi sini ang gugma sang Dios ginpadayag sa aton kahimtangan, nga ginpadala niya ang iya bugtong nga Anak sa kalibutan agod maagom naton ang kabuhi paagi sa iya. Ginpadala sang Dios ang iya Anak subong nagapasag-uli nga halad para sa aton mga sala. Ginhimo niya ini bangod ginahigugma niya kita, indi bangod nga ginahigugma naton sia.” (1 Juan 4:9, 10) Bangod sang gugma sang Dios, mapatawad ang aton mga sala, may paglaum kita, kag may kabuhi.

Ginpakita ni Jesus ang iya gugma sa mga tawo sang gintuman niya ang kabubut-on sang Dios. Nagsulat si Pablo: “Nagsiling [si Jesus]: ‘Yari ako! Nagkari ako sa paghimo sang imo kabubut-on.’ . . . Suno sa sining ‘kabubut-on’ ginpakabalaan kita paagi sa pagdulot sing lawas ni Jesucristo sing makaisa gid lang.” (Heb. 10:9, 10) Wala sing tawo nga makalabaw kay Jesus sa pagpakita sing gugma. Nagsiling sia: “Wala sing makalabaw sa gugma sang isa nga naghatag sang iya kabuhi para sa iya mga abyan.” (Juan 15:13) Mailog bala naton ang gugma nga ginpakita ni Jehova kag ni Jesus sa aton bisan pa indi kita himpit? Huo! Binagbinagon naton kon paano naton ini mahimo.

“PADAYON KAMO NGA MAGLAKAT SA GUGMA”

Ginpalig-on kita ni Pablo: “Mangin manug-ilog kamo sa Dios, subong mga anak nga hinigugma, kag padayon kamo nga maglakat sa gugma, subong nga ang Cristo naghigugma man sa aton kag naghatag sang iya kaugalingon para sa aton.” (Efe. 5:1, 2) ‘Padayon kita nga nagalakat sa gugma’ kon pirme naton ini ginapakita paagi sa aton ginahimo indi lang sa aton ginasiling. Nagsulat si Juan: “Mga anak, maghigugma kita, indi paagi sa hambal ukon sa dila, kundi paagi sa sinsero nga binuhatan.” (1 Juan 3:18) Halimbawa, ginabantala naton ang “maayong balita sang Ginharian” bangod ginahigugma naton ang Dios kag ang aton isigkatawo. (Mat. 24:14; Luc. 10:27) Nagalakat man kita sa gugma kon mapinasensiahon kita, mainayuhon, kag ginapatawad naton ang iban. Ginalaygayan kita sang Biblia: “Subong nga si Jehova nagpatawad sing kinabubut-on sa inyo, amo man sini ang himuon ninyo.”—Col. 3:13.

Pero ang matuod nga gugma wala nagapadala sa emosyon. Halimbawa, para uluuluhan ang nagahibi nga bata, ginapasugtan na lang sang iban nga ginikanan ang tanan nga gusto sang ila bata. Pero ang ginikanan nga may matuod nga gugma sa iya bata mangin estrikto kon kinahanglanon. Sing kaanggid, ang Dios gugma, pero “ang ginahigugma ni Jehova ginadisiplina niya.” (Heb. 12:6) Kon nagalakat kita sa gugma, ihatag man naton ang nagakaigo nga disiplina kon kinahanglanon ini. (Hulu. 3:11, 12) Pero dumdumon naton nga makasasala man kita kag masami nga indi makapakita sang gugma. Gani tanan kita dapat magpanikasog nga ipakita ini. Paano? Binagbinagon naton ang tatlo ka paagi.

PAANO PABAKURON ANG ATON GUGMA?

Una, ipangabay sa Dios nga hatagan ka sang iya balaan nga espiritu, nga makapatubas sing gugma. Nagsiling si Jesus nga ginahatag ni Jehova “ang balaan nga espiritu sa mga nagapangayo sa iya.” (Luc. 11:13) Kon ipangamuyo naton ang balaan nga espiritu kag ‘magpadayon sa paglakat suno sa espiritu,’ labi naton nga mapakita ang gugma. (Gal. 5:16) Halimbawa, kon gulang ka sa kongregasyon, mapangabay mo nga buligan ka sang balaan nga espiritu nga mapakita ang gugma kon nagalaygay ka suno sa Kasulatan. Kon ginikanan ka, mapangabay mo nga buligan ka sang espiritu sang Dios nga mapakita ang gugma, indi ang kaakig, kon ginadisiplina mo ang imo kabataan.

Ikaduha, pamalandungi kon paano ginpakita ni Jesus ang gugma bisan pa ginhimuan sia sing malain. (1 Ped. 2:21, 23) Dapat gid naton hunahunaon ang halimbawa sang Cristo kon nasaklaw kita ukon ginhimuan sing malain. Maayo nga mamangkot kita, ‘Ano ayhan ang himuon ni Jesus?’ Nabuligan sini nga pamangkot ang utod nga si Leigh nga hunahunaon anay ang dapat niya himuon. Nagsiling sia: “Isa ka bes, may ginpadala nga e-mail ang kaupod ko sa trabaho sa iban pa namon nga kaupdanan kag indi maayo ang ginsiling niya parte sa akon kag sa akon obra. Nasakitan gid ako sa sini. Pero namangkot ako, ‘Ano ang himuon ko sa iya para mailog ko si Jesus?’ Sa tapos ko mapamalandungan kon ano ang himuon ni Jesus kon ara sia sa akon sitwasyon, nagdesisyon ako nga pabay-an na lang ini kag kalimtan. Sang ulihi, nabalitaan ko nga grabe ang stress sang kaupod ko sa trabaho kay may balatian gali sia. Gani ginpensar ko nga indi man niya siguro ginhungod nga pakalainon ako. Ang pagpamalandong sa halimbawa ni Jesus sa pagpakita sing gugma bisan pa ginhimuan sia sing malain nakabulig sa akon nga ipakita man ang gugma sa kaupod ko sa trabaho.” Kon ilugon naton si Jesus, mapakita naton pirme ang gugma.

Ikatlo, tun-i nga ipakita ang gugma nga handa magsakripisyo, nga amo ang nagapakilala sa matuod nga mga Cristiano. (Juan 13:34, 35) Para mahimo ini, ginapalig-on kita sang Kasulatan nga ilugon ang “panghunahuna” ni Jesus. Sang nanaug sia halin sa langit, “ginbiyaan niya ang tanan” para sa aton, bisan “tubtob sa kamatayon.” (Fil. 2:5-8) Kon ilugon naton ang iya gugma nga handa magsakripisyo, mangin pareho sa iya ang aton hunahuna kag balatyagon, kag mapalig-on kita nga unahon ang kaayuhan sang iban. Ano pa ang mga benepisyo kon ipakita naton ang gugma?

MGA BENEPISYO KON IPAKITA ANG GUGMA

Kon ipakita naton ang gugma, madamo ini sing benepisyo. Binagbinaga ang duha sini:

• BILOG KALIBUTAN NGA PAGHILIUTOD: Bangod may gugma kita sa isa kag isa, nahibaluan naton nga batunon gid kita sang aton mga kauturan bisan diin man nga kongregasyon ang kadtuan naton sa bilog nga kalibutan. Isa gid ka pagpakamaayo nga ginahigugma kita sang ‘tanan naton nga kauturan sa bug-os nga kalibutan’! (1 Ped. 5:9) Makita lang ini nga gugma sa katawhan sang Dios.

• PAGHIDAIT: Bangod ‘nagabatas kita sa isa kag isa sa gugma,’ may ‘paghidait kita kag paghiusa.’ (Efe. 4:2, 3) Nabatyagan naton ini nga paghidait sa aton mga miting, asembleya, kag kombension. Indi bala nga tumalagsahon gid ini nga paghidait sa kalibutan nga nabahinbahin subong? (Sal. 119:165; Isa. 54:13) Kon nagapakighidait kita sa iban, ginapakita naton nga may gugma gid kita sa ila, kag nagapahalipay ini sa aton Amay sa langit.—Sal. 133:1-3; Mat. 5:9.

“ANG GUGMA NAGAPALIG-ON”

Nagsulat si Pablo: “Ang gugma nagapalig-on.” (1 Cor. 8:1) Paano? Ginpaathag ini ni Pablo sa kapitulo 13 sang iya una nga sulat sa mga taga-Corinto, nga gintawag nga “Salmo Parte sa Gugma.” Una, ginahunahuna sang gugma ang kaayuhan sang iban. (1 Cor. 10:24; 13:5) Isa pa, bangod ang gugma nagaulikid, makonsiderasyon, mapinasensiahon, kag mainayuhon, nagapalig-on ini sa mga pamilya nga mangin mapinalanggaon kag sa mga kongregasyon nga mahiusa.—Col. 3:14.

Ang aton gugma sa Dios amo ang pinakahamili kag makapabakod nga gugma. Bangod sini, nahiusa ang mga tawo nga sarisari sing ginhalinan, rasa, kag lenguahe, kag malipayon sila nga nagaalagad kay Jehova. (Sof. 3:9) Kabay pa nga mangin determinado kita nga ipakita kada adlaw ining hamili nga kinaiya nga ginapatubas sang balaan nga espiritu sang Dios.