3 Bulig Para Mabatas ang mga Problema

May mga problema nga indi malikawan ukon masolbar subong. Halimbawa, napatay ang imo pinalangga ukon may malala ka nga balatian. Wala ka na sing mahimo kundi mangita sing paagi nga maatubang ini. Makabulig bala ang Biblia sa sining mabudlay nga mga sitwasyon?

MALALA NGA BALATIAN

Si Rose nagsiling: “Bangod sang akon balatian halin pa sang ginbata ako, wala sing untat nga nagabatyag ako sang grabe nga kasakit. Daku gid ang epekto sini sa akon kabuhi.” Ang isa sa ginakabalak-an gid niya amo nga kon kaisa indi sia makakonsentrar sa pagtuon sang Biblia kag iban pa nga espirituwal nga butang. Pero nakabulig gid sa iya ang ginsiling ni Jesus sa Mateo 19:26: “Sa Dios ang tanan nga butang posible.” Nahibaluan sang ulihi ni Rose nga madamo sing paagi sa pagtuon. Bangod kon kaisa grabe gid ang kasakit nga iya nabatyagan nga halos indi sia makabasa, nagapamati sia sa mga rekording sang Biblia kag iban pa nga literatura nga base sa Biblia.a “Kon wala ini,” siling niya, “ambot kon paano ko padayon nga mapalig-on ang akon espirituwalidad.”

Kon masubuan si Rose bangod indi na niya mahimo ang mahimo niya sadto, napaumpawan sia sang 2 Corinto 8:12: “Ang dulot nga tinagipusuon labi nga kalahamut-an sa Dios, bangod ginapaabot sang Dios nga maghatag ang isa ka tawo suno sa yara sa iya, indi suno sa wala sa iya.” Nagapahanumdom ini kay Rose nga ginapabaloran sang Dios ang iya ginahimo, kay amo na ini ang iya bug-os nga masarangan.

GRABE NGA KASUBO

Si Delphine, nga ginsambit kaina, naghinumdom: “Sang napatay ang akon 18 anyos nga bata nga babayi, grabe gid ang akon kasubo nga daw gusto ko na lang mapatay. Lain na gid ang akon kahimtangan.” Pero, napaumpawan gid sia sang Salmo 94:19, diin ang salmista nagsiling sa Dios: “Sang nagdamo ang akon kabalaka, ginlugpayan kag ginpaumpawan mo ako.” Sia nagsiling, “Nangamuyo ako kay Jehova nga mapensaran ko ang mga puede ko himuon para maghaganhagan ang akon kasubo.”

Nangin masako sia sa pagboluntaryo. Sang ulihi, ginpaanggid niya ang iya kaugalingon sa krayola sang bata, nga bisan bali na magamit gihapon sa pagkolor. Sing kaanggid, narealisar niya nga bisan pa sa iya ginabatyag makabulig gihapon sia sa iban. Sia naghinumdom: “Narealisar ko nga kon ginasugid ko sa akon mga ginatun-an sa Biblia ang mga prinsipio sa Biblia nga makapaumpaw sa ila, ginapaumpawan kag ginalugpayan man ako ni Jehova.” Naghimo sia sing listahan sang mga karakter sa Biblia nga nakaeksperiensia sang grabe nga kasubo. “Tanan sila,” nasapwan niya, “pirme gid nagapangamuyo.” Narealisar man niya nga “indi mo gid makita ang mga sabat kon wala mo ginabasa ang imo Biblia.”

Ang pagtuon sa Biblia nakabulig man kay Delphine nga magpokus sa palaabuton, indi sa nagligad. Ang paglaum nga ginsambit sa Binuhatan 24:15 nakapaumpaw sa iya: “May pagkabanhaw sang mga matarong kag mga indi matarong.” Daw ano sia ka sigurado nga banhawon ni Jehova ang iya bata? Si Delphine ang aton pasabton: “Ginapanan-aw ko ang akon bata sa palaabuton. Nakaiskedyul na ang masunod namon nga pagkitaay, nga daw ara na sa kalendaryo sang akon Amay. Maathag ko nga ginapanan-aw nga ara kami sa amon hardin kag ang akon pagpalangga sa iya daw pareho lang sa nabatyagan ko sang ginbun-ag sia.”

a Madamo sini nga mga rekording ang matigayon sa jw.org.

Mapaumpawan ka sang Biblia bisan sa pinakamabudlay nga mga tion

Paano Kita Ginabuligan Sang Dios?

Maathag ang sabat sang Biblia. Ini nagasiling: “Si Jehova malapit sa tanan nga nagapanawag sa iya, sa tanan nga nagapanawag sa iya sa kamatuoran. Ginahatag niya ang handum sang mga nagakahadlok sa iya; ginapamatian niya ang ila pagpangayo sing bulig kag ginaluwas niya sila.” (Salmo 145:18, 19) Indi bala makapaumpaw gid ina? Pero, ano ang ginahatag sang Dios bilang sabat sa mga pangamuyo sang mga tawo nga sinsero nga nagapangayo sang giya sa iya?

KUSOG:

Sa masami, ang mga problema nagapaluya sa aton—sa pisikal, emosyonal, kag espirituwal. (Hulubaton 24:10) Pero “ginahatagan [ni Jehova] sing kusog ang ginakapoy kag sing kabaskog ang mga kulang sing kusog.” (Isaias 40:29) Si apostol Pablo, nga nagbatas sang grabe nga mga pagtilaw, nagsiling: “Sa tanan nga butang may kusog ako paagi sa isa nga nagapabakod sa akon.” (Filipos 4:13) Ginpabakod si Pablo paagi sa balaan nga espiritu sang Dios. Puede ka man makapangayo sa Dios sing balaan nga espiritu.—Lucas 11:13.

KAALAM:

Ano ang himuon mo kon kinahanglan mo sing bulig para mahangpan kag maaplikar ang laygay sang Biblia? Si disipulo Santiago nagsulat: “Kon may isa sa inyo nga kulang sang kaalam, padayon sia nga magpangayo sa Dios kag ihatag ini sa iya, kay maalwan Sia nga nagahatag sa tanan kag wala nagapangtamay.” (Santiago 1:5) Mahimo ka maghulag base sa imo mga pangamuyo paagi sa pagbasa sang Biblia kag pag-aplikar sang mga ginatudlo sini. (Santiago 1:23-25) Kon himuon mo ini, maeksperiensiahan mo nga maalamon gid ang laygay sini.

PAGHIDAIT:

Bisan pa nagabatyag ka sang grabe nga kabalaka, mabuligan ka ni Jehova nga mangin kalmado. Ang iya Pulong nagasiling: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat, ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.” (Filipos 4:6, 7) Puede ka gid makapangayo kay Jehova sing paghidait.

Pero ano abi kon wala dayon nasolbar ang imo mga problema? Indi maghinakop nga ginpabay-an ka na sang Dios. Bisan ara gihapon ang imo problema, mahatagan ka sang Dios sing kaisog kag kusog nga mabatas ini. (1 Corinto 10:13) Nagpromisa man ang Biblia nga magaabot ang tion nga ang aton mga problema masolbar na sing permanente!