Mga Tagna nga Natuman

Ginbinagbinag naton kaina ang parte sa sala nga impormasyon sang orakulo sang Delphi nga nagresulta sa pagkapierde ni Croesus sa hari sang Persia. Sa pihak nga bahin, ang Biblia nagaunod sang talalupangdon nga tagna parte sa hari sang Persia nga detalyado gid nga natuman.

Mga 200 ka tuig sing abanse—antes pa matawo ang hari—ang Hebreo nga propeta nga si Isaias nagsambit kay Ciro kag kon paano ni Ciro mapierde ang mabakod nga siudad sang Babilonia.

Isaias 44:24, 27, 28: “Amo ini ang ginasiling ni Jehova, . . . ‘ginasiling ko sa madalom nga katubigan, “Maghubas ka, kag ang tanan mo nga suba pamalhon ko”; ginasiling ko tuhoy kay Ciro, “Sia ang akon manugbantay sang karnero, kag tumanon niya ang tanan nga luyag ko”; kag ginasiling ko tuhoy sa Jerusalem, “Tukuron sia liwat,” kag tuhoy sa templo, “Ipahamtang ang imo sadsaran.”’”

Suno sa Griegong istoryador nga si Herodotus, ginpalikaw sang mga soldado ni Ciro ang tubig sang Suba Eufrates, nga nagailig sa palibot sang siudad sang Babilonia. Bangod sini, nakasulod sa siudad ang mga soldado ni Ciro paagi sa pag-ubog sa suba. Pagkatapos mapierde ang siudad, ginbuy-an ni Ciro ang nabihag nga mga Judiyo sa Babilonia kag ginpasugtan sila nga magbalik kag tukuron liwat ang Jerusalem, nga nalaglag sang nagligad nga 70 ka tuig.

Isaias 45:1: “Amo ini ang ginasiling ni Jehova sa iya hinaplas nga si Ciro, nga gin-uyatan ko sa tuo nga kamot sa paglutos sang mga pungsod sa iya atubangan, sa pagkuha sang mga hinganiban sang mga hari, sa pagbukas sang mga ganhaan sa iya atubangan, agod ang mga gawang indi pagsiraduhan.”

Nagsulod ang mga soldado sang Persia paagi sa duha ka dalagku nga geyt, nga napabay-an nga bukas. Kon nahibaluan sang mga Babilonianhon ang plano ni Ciro, mahimo nga ginsira nila ang mga geyt sa tupad sang suba. Pero suno gid sa tagna, ang siudad wala mabantayan.

Ining talalupangdon nga tagna isa lang sa madamo pa nga tagna sa Biblia nga natuman.a Indi pareho sa pakot sang mga tawo, nga sa masami naghalin sa ila butig nga mga dios, ang mga tagna sa Biblia naghalin sa Isa nga nagsiling: “Halin sa ginsuguran gintagna ko ang mahanabo, kag ang mga butang nga wala pa matabo.”—Isaias 46:10.

Ang matuod nga Dios lang, nga ang ngalan amo si Jehova, ang makasiling sina. Ina nga ngalan nagakahulugan sing “Ginapahanabo Niya nga Mangin Amo.” Nagapakita ini sang iya ikasarang nga mahibaluan kag maniobrahon ang mga hitabo sa palaabuton nahisuno sa iya kabubut-on. Nagapasalig ini sa aton nga tumanon gid niya ang tanan niya nga ginpromisa.

MGA TAGNA NGA NAGAKATUMAN SUBONG

Gusto mo bala mahibaluan kon ano nga mga tagna sa Biblia ang nagakatuman subong? Mga 2,000 ka tuig na ang nagligad, gintagna sang Biblia nga sa “katapusan nga mga adlaw” magaabot ang “makahalanguyos nga mga tion nga mabudlay atubangon.” Katapusan nga mga adlaw sang ano? Indi sang duta ukon sang mga tawo, kundi sang kagamo, pagpamigos, kag pag-antos nga linibo ka tuig na nga nagapabudlay sa mga tawo. Binagbinagon naton ang pila sa mga tagna nga tanda sang “katapusan nga mga adlaw.”

2 Timoteo 3:1-5: “Sa katapusan nga mga adlaw . . . ang mga tawo mangin mahigugmaon sa kaugalingon, mahigugmaon sa kuarta, bugalon, matinaastaason, manugpasipala, indi matinumanon sa mga ginikanan, indi mapinasalamaton, indi mainunungon, indi mapinalanggaon, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios, daw diosnon kon tulukon apang wala sing impluwensia ang gahom sini sa ila kabuhi.”

Indi bala nga makita mo gid ini nga mga batasan sa mga tawo subong? Makita mo bala nga ang mga tawo nagapadayawdayaw, mahigugmaon sa kuarta, kag bugalon? Natalupangdan mo bala nga mas gusto sang mga tawo nga sila ang masunod kag indi ang iban? Sigurado gid nga nakita mo nga madamo ang indi matinumanon sa ila mga ginikanan kag mahigugmaon sa kinasadya sangsa Dios. Kag mas nagalala pa gid ang kahimtangan.

Mateo 24:6, 7: “Makabati kamo sang mga inaway sa nagkalainlain nga lugar. . . . Magailinaway ang mga pungsod kag subong man ang mga ginharian.”

Suno sa pila ka pagbulubanta, sobra 100 ka milyon ang napatay sa inaway halin sang 1914, mas madamo pa ini sa populasyon sang madamo nga pungsod. Imadyina ang paghibi, kasubo, kag pag-antos bangod sini. Nakatuon bala ang mga pungsod sa ila mga sala kag gin-untatan ang inaway?

Mateo 24:7: “May kakulang sa pagkaon.”

Ang World Food Programme nagsiling: “Makapatubas ang duta sing pagkaon para sa tanan, pero 815 ka milyon ka tawo—isa sa siam—ang nagatulog nga gutom. Ang mas malala—isa sa tatlo ka tawo ang nagaantos sing malnutrisyon.” Ginabulubanta nga kada tuig, mga tatlo ka milyon ka kabataan ang nagakapatay bangod sa gutom.

Lucas 21:11: “May mabaskog nga mga linog.”

Kada tuig, mga 50,000 ka linog ang mabatyagan sang mga tawo. Mga 100 sini ang makaguba sang mga bilding, kag isa ka mabaskog katama nga linog ang maeksperiensiahan kada tuig. Suno sa isa ka pagbulubanta, halin sang 1975 asta 2000, mga 471,000 ka tawo ang napatay sa linog.

Mateo 24:14: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.”

Ang sobra walo ka milyon ka mga Saksi ni Jehova nagabantala kag nagapanaksi sang maayong balita sang Ginharian sang Dios sa bug-os nga duta sa mga 240 ka kadutaan. Ginabantala nila ang maayong balita sa dalagku nga mga siudad, malayo nga mga lugar, kagulangan, kag mga kabukiran. Suno sa tagna, kon magsiling ang Dios nga natapos na ini nga hilikuton, “magaabot ang katapusan.” Ano ang buot silingon sini? Buot silingon, matapos na ang paggahom sang tawo kag buslan ini sang paggahom sang Ginharian sang Dios. Ano nga mga promisa ang tumanon sang Ginharian sang Dios? Hibalua sa masunod nga mga artikulo.