Ang Tanan nga Butang Posible kay Jehova

PAG-OBRA HALIN SA AGA ASTA SA GAB-I

Natawo ako sang 1937 sa kolkhoz, ukon isa ka uma nga ginapanag-iyahan sang gobierno, nga malapit sa Tokmok, Kyrgyzstan. Ginatawag kami nga mga Kyrgyz, kag amo man ini ang amon lenguahe. Nagaobra sa uma ang akon mga ginikanan halin sa aga asta sa gab-i. May regular nga suplay sang pagkaon ang mga mamumugon, pero kis-a lang sa isa ka tuig sila ginasuelduhan sing kuarta. Nabudlayan si Nanay sa pag-atipan sa amon sang akon manghod nga babayi. Gani pagkatapos ako makaeskwela sing lima lang ka tuig, nag-obra na ako sa uma.

Sa lugar nga amon ginaistaran, madamo gid sing pigado, kag nagapataypatay kami obra para may makaon. Sang pamatan-on pa ako, wala ko ginapensar ang katuyuan sang kabuhi ukon ang palaabuton. Wala gid magsulod sa pensar ko nga bag-uhon gali sang dalayawon nga mga kamatuoran parte kay Jehova nga Dios kag sang iya katuyuan ang akon kabuhi. Makakulunyag gid ang sugilanon kon paano nakalab-ot kag naglapnag sa Kyrgyzstan ini nga mensahe. Una ini nga nakalab-ot sa amon lugar sa naaminhan nga Kyrgyzstan.

GINDALA SANG MGA GINTAPOK ANG KAMATUORAN SA KYRGYZSTAN

Nakalab-ot sa Kyrgyzstan ang kamatuoran parte kay Jehova nga Dios sang dekada ’50. Para mabaton sang mga tawo ang kamatuoran, dapat nila isikway ang isa ka mabakod nga pagpati. Ngaa? Ang Kyrgyzstan sakop anay sang Union of Soviet Socialist Republics (USSR). Sa bilog nga USSR, wala nagaentra sa pulitika ang mga Saksi ni Jehova. (Juan 18:36) Gani ginhingabot sila nga daw mga kontra sang Komunista nga gobierno. Pero wala sing makapugong sa Pulong sang Dios para makalab-ot sa sinsero nga mga tawo. Ang isa sa pinakahamili nga natun-an ko sa malawig ko nga kabuhi amo nga kay Jehova, “ang tanan nga butang posible.”—Mar. 10:27.

Nakalab-ot sa Kyrgyzstan ang mga Saksi ni Jehova bangod sang paghingabot sa ila. Paano ini natabo? Sakop man sang USSR ang Siberia, kag diri gintapok ang mga kontra-gobierno. Sang ginhilway na sila, madamo ang nagkadto sa Kyrgyzstan, kag dala sang pila sa ila ang kamatuoran nga natun-an nila. Isa sa ila amo si Emil Yantzen, nga natawo sa Kyrgyzstan sang 1919. Gintapok si Emil sa isa ka prisuhan kag nasugilanon niya ang mga Saksi didto. Ginbaton niya ang kamatuoran kag nagpauli sang 1956. Nag-istar sia malapit sa Sokuluk, nga sakop sang lugar nga amon ginaistaran. Sa Sokuluk natukod ang una nga kongregasyon sa Kyrgyzstan sang 1958.

Pagligad sang mga isa ka tuig, nagsaylo sa Sokuluk si Victor Vinter. Madamo nga kabudlayan ang ginbatas sining matutom nga utod. Duha ka beses sia nga napriso sing tig-tatlo ka tuig bangod nagpabilin sia nga neutral; dayon napriso pa gid sia sing napulo ka tuig kag gintapok sa sulod sang lima ka tuig. Pero wala mapauntat sang paghingabot ang paglapnag sang matuod nga pagsimba.

NAKALAB-OT ANG KAMATUORAN SA AMON BANWA

Sang 1963, may mga 160 ka Saksi sa Kyrgyzstan, kag madamo sa ila ang naghalin sa Germany, Ukraine, kag Russia. Isa sa ila ang gintapok nga si Eduard Varter, nga nabawtismuhan sa Germany sang 1924. Sang dekada ’40, ginpriso sia sang mga Nazi, kag pagligad sang pila ka tuig, gintapok naman sia sang mga Komunista sa USSR. Sang 1961, nagsaylo ining matutom nga utod sa banwa sang Kant, nga malapit lang sa amon banwa.

Nagaistar man sa Kant ang matutom nga alagad ni Jehova nga si Elizabeth Fot. Isa sia ka sastre. Bangod maayo gid sia manahi, sa iya nagapatahi sing bayo ang mga doktor, manunudlo, kag iban pa nga propesyonal. Isa sa ila si Aksamai Sultanalieva, nga asawa sang isa ka abogado sang gobierno. Nagpatahi kay Elizabeth si Aksamai, pero madamo sia sing pamangkot parte sa kabuhi kag sa kahimtangan sang patay. Gingamit ni Elizabeth ang Biblia para masabat ang iya mga pamangkot. Sang ulihi, nangin makugi nga manugbantala sang maayong balita si Aksamai.

Sa sini man nga tion gintangdo nga manugtatap sang sirkito si Nikolai Chimpoesh, nga taga-Moldova, kag nag-alagad sia sa sirkito sing halos 30 ka tuig. Magluwas sa pagduaw sa mga kongregasyon, gin-organisar man niya ang pagkopya kag pagpanagtag sang aton mga publikasyon. Pero ginapanilagan sia sang mga awtoridad. Gani ginhatagan ni Eduard Varter si Nikolai sing panugda kag ginpalig-on: “Kon pamangkuton ka sang mga awtoridad, isiling sa ila nga naghalin sa ulong talatapan sa Brooklyn ang aton mga publikasyon. Tuluka ang opisyal sang KGB sa mata. Indi ka mahadlok.”—Mat. 10:19.

Wala madugay sa tapos sila makasugilanon, ginpatawag si Nikolai sa headquarters sang KGB sa Kant. Ginsugid niya ang natabo: “Namangkot ang opisyal kon diin naghalin ang aton mga publikasyon. Nagsabat ako nga naghalin ini sa Brooklyn. Naurungan sia. Ginpalakat na lang niya ako kag wala na gid ako ginpatawag.” Padayon nga ginpalapnag sing maisugon kag mahalungon sang mga Saksi ang maayong balita sa amon lugar sa naaminhan nga Kyrgyzstan. Nakalab-ot gid man ang kamatuoran parte kay Jehova sa akon pamilya sang 1981, kag ang akon asawa nga si Mairambubu ang una nga nakabati sini.

NAREALISAR DAYON SANG AKON ASAWA NGA AMO INI ANG KAMATUORAN

Nagaistar si Mairambubu sa Naryn Region sa Kyrgyzstan. Isa ka adlaw sang Agosto 1974, nagkadto sia sa balay sang manghod ko, kag didto ko sia nakilala. Naluyagan ko sia dayon. Nagpakasal kami sadto man nga adlaw.

Sang Enero 1981, sang nagasakay sa bus si Mairambubu pakadto sa tiendahan, nabatian niya ang pag-istoryahanay nga ginsambit ko sa umpisa. Gusto pa gid niya mamati gani ginpamangkot niya ang ngalan kag adres sang babayi. Ginsugid sang babayi nga Apun ang iya ngalan, pero nagahalong gid sia kay ginadumilian pa ang hilikuton sang mga Saksi sang dekada ’80. Sa baylo nga ihatag ang iya adres sa akon asawa, ginpangayo niya ang amon adres. Malipayon gid ang akon asawa sang nagpauli sia.

“Kanami sang nabatian ko kaina,” siling ni Mairambubu. “Ginsugiran ako sang isa ka babayi nga maabot ang tion nga indi na mapatay ang mga tawo. Bisan ang mabangis nga mga sapat mangin mahagop na.” Para sa akon, daw himuhimo lang ini nga istorya. “Hulaton ta na lang ang pagkadto niya diri para ipaathag ini sa aton,” siling ko sa iya.

Pagligad sang tatlo ka bulan, ginkadtuan kami ni Apun. Nagkadto man sa amon ang pila ka babayi nga amo ang una nga mga Saksi nga Kyrgyz. Ginsugid nila sa amon ang dalayawon nga kamatuoran parte kay Jehova kag sa iya katuyuan para sa mga tawo. Gingamit nila ang libro nga Gikan sa Paraiso nga Nadula Tubtub sa Paraiso nga Naangkon-uli.a May isa lang sini nga libro sa Tokmok, gani ginkopya namon ini.

Natun-an namon ang parte sa tagna sa Genesis 3:15. Tumanon ini ni Jesus bilang Mesianiko nga Hari nga ginpili sang Dios. Dapat gid mabatian sang tanan ining importante nga mensahe! Gani dapat man namon ini isugid. (Mat. 24:14) Sang ulihi, nagbag-o ang amon kabuhi bangod sang kamatuoran sa Biblia.

MITING KAG BAWTISMO SA TION SANG PAGDUMILI

Gin-imbitar kami sang isa ka utod sa Tokmok sa isa ka kasal. Natalupangdan dayon namon sang akon asawa nga tuhay ang mga Saksi. Wala sing makahulubog nga ilimnon sa sinalusalo kag organisado ini. Tuhay gid ini sa iban nga kasal nga nakadtuan namon nga nagakahubog ang mga bisita, nagapanggamo, kag nagapamuyayaw.

Nagtambong man kami sa mga miting sang kongregasyon sa Tokmok. Nagatipon kami sa kagulangan kon maayo ang tiempo. Nabal-an sang mga kauturan nga ginapanilagan kami sang mga pulis, gani may ginaasayn nga magbantay. Kon tigtulugnaw, ginahiwat namon ang mga miting sa isa ka balay. Pila ka beses nga nagkadto diri ang mga pulis kag namangkot kon ano ang ginahimo namon. Sang ginbawtismuhan kami ni Mairambubu sang Hulyo 1982 sa Chüy River, naghalong gid kami. (Mat. 10:16) Wala nagtingob ang mga kauturan sa pagkadto sang nagtipon kami sa kagulangan. Nagkanta kami sang ambahanon sa Ginharian kag nagpamati sa pamulongpulong sa bawtismo.

GINPASANGKAD NAMON ANG AMON MINISTERYO

Sang 1987, ginpangabay ako sang isa ka utod nga kadtuan ang isa ka interesado sa banwa sang Balykchy. Apat ka oras ini nga pagbiyahe sa tren. Pila ka beses kami nga nagbantala sa Balykchy, kag nakita namon nga madamo sing interesado didto. Kahigayunan gid ini nga mapasangkad namon ang amon ministeryo.

Nagakadto kami ni Mairambubu sa Balykchy halos kada Sabado kag Domingo. Nagabantala kami didto kag nagahiwat sang mga miting. Madamo gid ang nanamian sa aton mga publikasyon. Halin sa Tokmok, ginadala namon ang mga publikasyon nga nasulod sa mishok, ukon sako nga ginasudlan sang patatas. Kulang pa ang duha ka sako sang mga publikasyon kada bulan. Makapanaksi man kami sa mga pasahero samtang nagabiyahe pakadto-pakari sa Balykchy.

Sang 1995, natukod ang kongregasyon sa Balykchy, pagligad sang walo ka tuig sugod sang una kami nga nagkadto didto. Magasto gid ang pagbiyahe namon pakadto sa Balykchy halin sa Tokmok sa amo sadto kalawig nga tion. Pigado lang kami, pero ngaa nahimo namon ini? Isa ka utod ang nagahatag pirme sa amon sing kuarta para magamit namon sa sini. Nakita ni Jehova nga gusto gid namon pasangkaron ang amon ministeryo, gani ‘ginbuksan niya sa amon ang langit.’ (Mal. 3:10) Posible gid kay Jehova ang tanan nga butang!

MASAKO SA PAMILYA KAG SA MINISTERYO

Sang 1992, gintangdo ako nga gulang, ang una nga Kyrgyz nga gulang sa amon pungsod. Sa amon kongregasyon sa Tokmok, natilawan namon ang bag-o nga mga pamaagi sa pag-alagad. Gintudluan namon sa Biblia ang madamo nga pamatan-on nga Kyrgyz nga mga estudyante. Subong, isa sa ila ang miembro sang Branch Committee, kag duha ang espesyal payunir. Nagboluntaryo man kami sa pagbulig sa iban sa tion sang aton mga miting. Sang dekada ’90, gingamit namon ang mga publikasyon kag ginhiwat ang mga miting sa Russian nga lenguahe. Pero Kyrgyz ang tumandok nga lenguahe sang madamo sa kongregasyon. Gani gin-translate ko ang mga miting para sa ila, kag nakabulig ini sa ila nga mahangpan ang kamatuoran.

Nangin masako man kami ni Mairambubu sa pag-atipan sa amon daku nga pamilya. Ginaupod namon sila sa pagbantala kag sa mga miting sang kongregasyon. Sang 12 anyos pa lang ang amon bata nga babayi nga si Gulsayra, nanamian gid sia mag-istorya sa mga nagalabay sa dalan parte sa Biblia. Nanamian man magsaulo sing mga teksto ang amon kabataan. Gani nangin masako gid sa mga hilikuton sang kongregasyon ang amon kabataan, kag ang amon mga apo sang ulihi. Sa 9 namon ka kabataan kag 11 ka apo nga buhi pa subong, 16 ang nagaalagad kay Jehova ukon nagatambong sa mga miting upod sa ila ginikanan.

MAKALILIPAY NGA MGA PAGBAG-O

Malipay gid ang mga alagad ni Jehova, nga una nga nagbantala sa amon lugar sang dekada ’50, kon makita nila ang mga pagbag-o nga naeksperiensiahan namon. Sugod sang dekada ’90, hilway na kami sa pagbantala sang maayong balita kag sa pagtipon sing tingob sa kombension.

Sang 1991, nagtambong kami sang akon asawa sa amon una nga kombension. Ginhiwat ini sa Alma-Ata, nga ginatawag subong nga Almaty, sa Kazakhstan. Sang 1993, naghiwat sang kombension ang mga kauturan sa Kyrgyzstan sa Spartak Stadium sa Bishkek sa una nga tion. Antes sini, isa ka semana nga gintinluan sang mga kauturan ang istadyum. Nagdayaw gid ang direktor sang istadyum amo nga wala niya kami ginpabayad sa paggamit namon sa sini.

Sang 1994, talalupangdon man ang una nga pag-imprinta sang aton mga publikasyon sa Kyrgyz nga lenguahe. Padayon subong nga gina-translate ang mga publikasyon sa Kyrgyz sang isa ka translation team sa sanga talatapan sa Bishkek. Sang 1998, nangin legal na ang hilikuton sang mga Saksi sa Kyrgyzstan. Nag-uswag ang organisasyon, kag sobra na kami 5,000 ka manugbantala. May ara na kami 83 ka kongregasyon kag 25 ka grupo sa Chinese, English, Kyrgyz, Russian, Russian Sign Language, Turkish, Uighur, kag Uzbek. Nahiusa sa pag-alagad kay Jehova ining tanan nga kauturan nga may sarisari nga ginhalinan. Ginpahanabo ni Jehova ining tanan nga makalilipay nga mga pagbag-o.

Ginbag-o man ni Jehova ang akon kabuhi. Nagdaku ako sa isa ka pamilya sang mga mamumugon kag lima lang ka tuig ako nga nakaeskwela. Pero ginbuligan ako ni Jehova sa pag-alagad bilang gulang kag sa pagtudlo sang hamili nga mga kamatuoran sa Biblia sa mga tawo nga mas edukado sangsa akon. Ginapahanabo gid ni Jehova ang tumalagsahon nga mga butang. Napalig-on ako sang akon naeksperiensiahan nga padayon nga mangin matutom sa pagpanaksi parte kay Jehova, nga sa iya “ang tanan nga butang posible.”—Mat. 19:26.