Kon Paano Magtuon sang Biblia nga Epektibo kag Makalilipay

Ginabasa ni Josue ang Kasuguan; narumpag ang mga pader sang Jerico pero wala narumpag ang balay ni Rahab; nagapangamuyo si Josue nga ginabayaw ang iya mga kamot

MABUDLAY ang asaynment ni Josue. Dapat niya pangunahan ang pungsod sang Israel sa pagsulod sa Ginsaad nga Duta, pero magaatubang sila sing madamo nga kabudlayan. Gani ginpasalig sia ni Jehova nga magamadinalag-on sia, kag ginpalig-on sia: ‘Magpakaisog ka kag magpakabakod. Tumana ang akon Kasuguan. Basaha ini sa adlaw kag gab-i, agod matuman mo gid ang tanan nga nasulat sa sini. Kag mangin madinalag-on ka kag maalamon.’—Jos. 1:7, 8.

Sa sining “makahalanguyos nga mga tion nga mabudlay atubangon,” madamo man kita sang kabudlayan. (2 Tim. 3:1) Pareho kay Josue, mangin madinalag-on man kita kon sundon naton ang ginlaygay ni Jehova sa iya. Dapat naton basahon ang Biblia adlaw-adlaw, kag iaplikar ang mga prinsipio sini.

Pero, madamo sa aton ang mahimo indi kabalo kon paano magtuon, ukon wala nanamian magtuon. Apang, importante gid ang pagtuon sang Biblia. Gani binagbinaga ang kahon nga “Tilawi Ini nga mga Panugda” nga makabulig para mangin epektibo kag makalilipay ang imo pagtuon.

“Tuytuyi ako sa dalanon sang imo mga sugo,” amba sang salmista, “kay may kalipay ako sa sini.” (Sal. 119:35) Malipay ka man sa pagtuon sang Pulong sang Dios. Kay man, madamo gid nga espirituwal nga mga hiyas ang imo matun-an.

Bisan pa indi pareho ang imo sitwasyon kay Josue nga ginpangunahan ang isa ka pungsod, may ginaatubang ka man nga mga kabudlayan. Gani, pareho kay Josue, tun-i kag tumana ang Pulong sang Dios. Kon himuon mo ini, mangin madinalag-on ka man kag maalamon.

TILAWI INI NGA MGA PANUGDA

Mangamuyo antes magtuon. Ang Biblia nagaunod sang mga panghunahuna sang labing gamhanan nga Dios nga ginpasulat niya para sa imo kaayuhan. Gani kon nagabasa sang Biblia, mangayo sing bulig sa iya nga mahangpan mo ini, tandai ang imo natun-an, kag iaplikar ini sa imo kabuhi.—Esd. 7:10.
Pamangkuta ang imo kaugalingon samtang ginabasa mo ang Biblia ukon mga literatura nga nabase sa Biblia: ‘Ano ang ginatudlo sini sa akon parte kay Jehova? Ano ang kaangtanan sini sa kabilugan nga mensahe sang iya Pulong? Paano ko ini magamit sa pagbulig sa iban?’
Pamalandungi ang imo natun-an. Untati anay ang pagbasa kag magpamalandong: ‘Ano ang ginbatyag ko sa akon nabasa? Ngaa amo sini ang ginbatyag ko? Ano ang kaangtanan sini sa akon mga eksperiensia sang una, sa akon kahimtangan subong, ukon sa posible nga matabo sa palaabuton? Paano ko maaplikar ini nga mga prinsipio sa Biblia kag ini nga laygay sa akon kabuhi?’ (Job 23:5; Sal. 49:3) Tinguhai nga ipaathag kon ngaa ginsugo ni Jehova ang iya katawhan nga indi paghimuon ang pila ka buhat. Ukon hunahunaa kon ano ayhan ang natabo kon tuhay ang ginhimo sang karakter sa Biblia nga imo ginbasa.—Deut. 32:28, 29.
Gamita ang imo imahinasyon. Halimbawa, imadyina ang eksena sang ginbaligya si Jose sang iya mga utod sa mga Ismaelnon. (Gen. 37:18-28) Ano ang imo nakita, nabatian, kag napanimahuan? Imadyina nga ikaw ang isa sa mga karakter. Ano ayhan ang ila ginahunahuna kag ginabatyag? Kon himuon mo ini, madamo ka sing matun-an.
Gamita ang mga gamit sa pagtuon nga gin-aman para mabuligan ka sa pag-research. Tun-i kon paano gamiton ang mga gamit sa pagtuon nga makita sa aton website kag mga publikasyon. Indi mahuya nga magpabulig sa iban kon paano ini gamiton. Halimbawa, ang Watch Tower Publications Index ukon ang Giya sa Pagtuon Para sa mga Saksi ni Jehova, makabulig sa imo nga makita ang madamo nga artikulo parte sa sarisari nga mga topiko kag ang mga paathag parte sa madamo nga teksto sa Biblia. Gamita ang mga apendise sang Bag-ong Kalibutan nga Badbad sang Balaan nga Kasulatan. Makita mo diri ang mga impormasyon parte sa lugar, petsa, kabug-aton kag takus, kag madamo pa.
Sumaryuha ang importante nga mga punto para indi mo malipatan ang imo bag-o lang gintun-an. Mas maayo pa gid kon isugid mo ini sa iban. May punto bala nga magamit mo sa ministeryo? Kon himuon mo ini, matandaan mo ang importante nga mga punto kag makabenepisyo man ang iban.