Nahibaluan Mo Bala?

Ngaa kalmado gihapon si disipulo Esteban sang ginhingabot sia?

GINHINGABOT si Esteban sang 71 ka akig nga hukom nga may daku nga impluwensia sa pungsod. Miembro sila sang pinakamataas nga korte sa Israel, nga ginatawag Sanhedrin. Gintipon sila sang Mataas nga Saserdote nga si Caifas, nga amo ang nagdumala sa korte sang ginsentensiahan si Jesus sang kamatayon pila pa lang ka bulan ang nagligad. (Mat. 26:57, 59; Binu. 6:8-12) Isaisa nga ginpahambal nila ang butig nga mga saksi, pero daw indi sila makapati nga ang nawong ni Esteban daw “pareho sa nawong sang anghel.”—Binu. 6:13-15.

Ngaa kalmado gihapon si Esteban sa sining makakululba nga sitwasyon? Antes sia gindakop kag gindala sa Sanhedrin, masako si Esteban sa iya mga hilikuton sa pag-alagad, kag ginatuytuyan sia sang gamhanan nga balaan nga espiritu sang Dios. (Binu. 6:3-7) Sang ara na sia sa korte, ginbuligan sia sang amo gihapon nga espiritu bilang manuglugpay kag manugpahanumdom. (Juan 14:16, footnote) Samtang malig-on nga nagapangatarungan si Esteban, nga narekord sa Binuhatan kapitulo 7, ginpahanumdom sa iya sang balaan nga espiritu ang sobra 20 ka dinalan sa Hebreong Kasulatan. (Juan 14:26) Nagbakod pa gid ang pagtuo ni Esteban sang nakita niya si Jesus sa palanan-awon nga nagatindog sa tuo sang Dios.—Binu. 7:54-56, 59, 60.

Mahimo man kita pahugon kag hingabuton. (Juan 15:20) Pero kon regular naton nga tun-an ang Pulong sang Dios kag aktibo kita sa ministeryo, buligan man kita sang espiritu ni Jehova. Gani mangin malig-on man kita kag kalmado sa pag-atubang sa mga pagpamatok.—1 Ped. 4:12-14.