Kon May Malala nga Balatian

“Sang nabal-an ko nga may kanser ako sa baga kag sa colon, abi ko mapatay na ako. Pero sa tapos ko magpakonsulta, nagpamensar ako, ‘Sige, bisan pa wala ko ini ginapaabot, dapat mangita ako sing paagi para maatubang ko ini.’”—Linda, 71 anyos.

“Nagaantos ako sa tuman kasakit nga balatian kag bangod sini nagangutngot ang akon wala nga guya. Isa ka bes, bangod sang grabe nga kasakit na-depress ako. Pirme ako nagabatyag nga nagaisahanon kag napensaran ko pa gani nga maghikog.”—Elise, 49 anyos.

Lalaki nga nakawheelchair nga napalibutan sang iya mga pinalangga

KON ikaw ukon ang imo pinalangga may malala nga balatian nga mahimo magresulta sa kamatayon, kabalo ka gid kon daw ano ini kabudlay. Luwas sa balatian, kinahanglan mo man atubangon ang sarisari nga emosyon. Mahimo mahadlok ka pa gid kag mabalaka bangod sa pagbalikbalik sa doktor, mabudlay ukon mahal nga pagpabulong, ukon ang indi maayo nga epekto sang bulong. Mabudlay gid kon indi ka mapahamtang bangod sa malala nga balatian.

Sa diin kita makapangayo sing bulig? Madamo ang nabuligan sang pagpangamuyo sa Dios kag pagbasa sing makapaumpaw nga mensahe sa Biblia. Makabulig man ang pagpalangga kag pagsuporta sang pamilya kag mga abyan.

ANG NAKABULIG SA IBAN NGA MAGBATAS

Si Robert, nga 58 anyos nagsiling: “Ang pagtuo sa Dios makabulig sa imo nga mabatas ang imo balatian. Mangamuyo kay Jehova. Isugid sa iya ang imo ginabatyag. Pangabaya ang iya balaan nga espiritu. Mangayo sa iya sing kusog para mangin mabakod ka para sa imo pamilya kag mangin kalmado samtang ginabatas ang imo balatian.

“Daku gid nga bulig kon ara ang imo pamilya para buligan ka sa imo ginabatyag. Isa ukon duha sa ila ang nagatawag sa akon kada adlaw kag mamangkot, ‘Kamusta ka na?’ Ginapalig-on man ako sang akon mga abyan nga nagaistar sa sarisari nga lugar. Nagapaumpaw gid sila sa akon, kag nagabulig ini sa akon nga magpadayon.”

Kon nagabisita ka sa imo abyan nga may balatian, talupangda ang ginsiling ni Linda: “Gusto sang pasyente nga daw normal lang gihapon ang iya kabuhi kag mahimo indi niya gusto istoryahan ang parte sa balatian. Gani istoryahi ang masami ninyo ginaistoryahan.”

Ang kusog halin sa Dios kag paumpaw sa Kasulatan, pati na ang suporta sang mapinalanggaon nga pamilya kag mga abyan, makabulig sa aton nga mabatyagan nga may pulos ang aton kabuhi, bisan pa may malala kita nga balatian.

Mga Bersikulo sa Biblia nga Makabulig sa Imo

Magsalig sa Dios.

“Nagpamangkot ako kay Jehova, kag ginsabat niya ako. Ginluwas niya ako sa tanan nga ginakahadlukan ko. Ining kubos nagpanawag, kag ginpamatian sia ni Jehova.”—Salmo 34:4, 6.

Si Linda nga ginsambit kaina nagsiling: “Kon nagapangamuyo ako wala ako nagahambal nga ‘Ayuha ako.’ Kundi pirme ko ginahambal, ‘Tani mangin mabakod ako kag mabatas ko ang akon balatian.’”

Ang pagbasa sa Pulong sang Dios makabulig sa imo nga mangin mabakod.

“Wala sing pumuluyo nga magasiling: ‘Nagamasakit ako.’”—Isaias 33:24.

Pamensari ang mga promisa sang Dios. Makahatag ini sa imo sing paglaum nga makapabakod sa imo nga magbatas.

Magpabulig sa imo pamilya kag mga abyan.

“Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

“Indi pag-ipain ang imo kaugalingon,” siling ni Elise, nga ginsambit kaina. “Pasugti ang imo mga abyan nga magbulig sa imo. May mga tion nga abi mo nagaisahanon ka kag wala nagapamati ang Dios sa imo, pero indi gid pag-ipain ang imo kaugalingon.”