Ano ang Mas Maayo Sangsa Sini nga Kabuhi?

INDI amo sini nga kabuhi ang gusto sang Dios para sa aton. Ang duta dapat puno sang mga tawo nga nagarespeto sa paggahom sang aton Manunuga, nagapagiya sa iya, kag nagasunod sa iya mahigugmaon nga personalidad. Dapat malipayon sila nga nagakooperar sa isa kag isa samtang nagahimo sila sang pamilya, nagadiskubre sang bag-o nga mga butang, kag nagahimo sa bilog nga duta nga isa ka paraiso.

NAGPROMISA ANG DIOS NGA BAG-UHON NIYA ANG KABUHI SA DUTA SUNO GID SA IYA KATUYUAN PARA SA SINI

• “Ginapauntat niya ang mga inaway sa bug-os nga duta.”—Salmo 46:9.

• “Nag-abot man ang imo gintalana nga tion . . . sa paglaglag sa mga nagalaglag sang duta.”—Bugna 11:18.

• “Wala sing pumuluyo nga magasiling: ‘Nagamasakit ako.’”—Isaias 33:24.

• “Ang akon mga pinili magakalipay sa binuhatan sang ila kamot.”—Isaias 65:22.

Paano matuman ini nga mga tagna? Gintangdo sang Dios ang iya Anak, si Jesus, bilang Hari sang isa ka perpekto nga gobierno nga magagahom sa duta halin sa langit. Ginatawag ini sang Biblia nga Ginharian sang Dios. (Daniel 2:44) Ang Biblia nagsiling parte kay Jesus: “Ihatag ni Jehova nga Dios sa iya ang trono . . . kag magahari sia.”—Lucas 1:32, 33.

Sang ari si Jesus sa duta, naghimo sia sing mga milagro para ipakita nga sia ang Manuggahom nga makapabag-o sa kabuhi sang mga tawo.

GINPAKITA NI JESUS KON ANO ANG HIMUON NIYA PARA SA MATINUMANON NGA KATAWHAN

• Paagi sa pag-ayo sa bisan ano nga balatian, ginpamatud-an ni Jesus kon paano niya dulaon ang tanan nga kasablagan sang tawo.—Mateo 9:35.

• Paagi sa pagpakalma sa dagat, ginpakita niya kon paano niya proteksionan ang mga tawo paagi sa pagkontrol sa puersa sang kinaugali.—Marcos 4:36-39.

• Paagi sa pagpakaon sa linibo, ginpakita niya nga mahatag niya ang mga kinahanglanon sang tawo.—Marcos 6:41-44.

• Paagi sa paghimo sang tubig nga mangin alak sa isa ka kasal, ginpamatud-an niya nga buligan niya ang mga tawo nga magkalipay sa ila kabuhi.—Juan 2:7-11.

Paano mo maeksperiensiahan ang klase sang kabuhi nga gusto sang Dios para sa mga nagahigugma sa iya? May “dalan” nga dapat mo laktan. Ginatawag ini sang Biblia nga “dalan nga nagapadulong sa kabuhi, kag pila lamang ang nakatultol sini.”—Mateo 7:14.

PAGPANGITA SANG DALAN NGA NAGAPADULONG SA MAS MAAYO NGA KABUHI

Ano ang dalan padulong sa kabuhi? Ang Dios nagsiling: “Ako si Jehova nga imo Dios, ang nagatudlo sa imo para sa imo kaayuhan, ang nagatuytoy sa imo sa dalanon nga dapat mo laktan.” (Isaias 48:17) Ang paglakat sa sini nga dalan amo ang pinakamaayo nga pagkabuhi.

Si Jesus nagsiling: “Ako amo ang dalan kag ang kamatuoran kag ang kabuhi.” (Juan 14:6) Paagi sa pagpati sa mga kamatuoran nga gintudlo ni Jesus kag pagsunod sa iya halimbawa, mangin suod kita sa Dios kag makabenepisyo gid.

Paano mo makita ang dalan padulong sa kabuhi? Madamo sing relihion, pero nagpaandam si Jesus: “Indi tanan nga nagasiling sa akon, ‘Ginuo, Ginuo,’ makasulod sa Ginharian sang langit, kundi ang nagahimo lamang sang kabubut-on sang akon Amay sa langit.” (Mateo 7:21) Nagsiling man sia: “Makilala ninyo sila sa ila mga bunga.” (Mateo 7:16) Ang Biblia makabulig sa imo nga makilala kon ano ang matuod nga relihion.—Juan 17:17.

Paano ka makalakat sa dalan padulong sa kabuhi? Dapat makilala mo kon sin-o ang naghatag sang kabuhi sa tanan: Sin-o sia? Ano ang iya ngalan? Ano sia nga klase sang persona? Ano ang ginahimo niya para sa aton? Ano ang gusto niya nga himuon naton?a

Indi lang gusto sang Dios nga ang mga tawo magtrabaho, magkaon, maghampang, kag magsagod sang pamilya. Puede naton makilala ang aton Manunuga kag mangin abyan niya. Mapakita naton nga ginahigugma naton sia paagi sa paghimo sang iya kabubut-on. Si Jesus nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios.”—Juan 17:3.

PAGHIMO SANG UNA NGA TIKANG SA IMO PAGLAKBAY

Kon matun-an naton kon ano ang gusto sang lamang matuod nga Dios, mahimo kinahanglan kita maghimo sing mga pagbag-o. Daw mabudlay ini himuon. Pero ang matuod, makalilipay ini nga paglakbay, pero pareho sang iban nga paglakbay, kinahanglan mo himuon ang una nga tikang. Para makita mo ang mga sabat sa importante nga mga pamangkot parte sa Dios, ang mga Saksi ni Jehova may isa ka libre nga programa sang pagtuon sa Biblia sa oras kag lugar nga gusto mo. Puede mo kami makontak sa amon website sa www.jw.org/hil.