Puede Ka Mangin Malipayon Bisan Subong

SA ULIHI, wala na sing balatian, pagtigulang, kag kamatayon. Puede mo ina maeksperiensiahan! Pero subong, ang kabuhi puno sing mga problema kag kabudlayan. May makabulig bala sa imo nga mangin malipayon? Ang Biblia may giya nga makabulig sa imo nga mangin malipayon bisan subong. Binagbinaga ang pila ka kabudlayan subong kag kon paano makabulig ang Biblia.

KON PAANO MANGIN KONTENTO

Ang Biblia nagalaygay: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo.”—Hebreo 13:5.

Ang kalibutan wala untat nga nagaganyat sa aton nga magbakal sang mga butang kag mga serbisyo nga kinahanglan kuno naton. Pero, ang Biblia nagasiling nga “mangin kontento [kita] sa mga butang nga yara sa [aton].” Paano?

Likawi “ang gugma sa kuarta.” Ginasakripisyo sang mga tawo ang ila lawas, pamilya, mga abyan, moralidad, bisan ang ila dignidad—bangod sa “gugma sa kuarta.” (1 Timoteo 6:10) Wala gid ini pulos nga sakripisyo! Kay man, ang nagahigugma sa manggad “indi maayawan.”—Manugwali 5:10.

Palabiha ang mga tawo sangsa pagkabutang. Huo, mapuslanon ang materyal nga mga butang. Pero ini nga mga pagkabutang indi makapalangga ukon makapasalamat sa aton; mga tawo lamang ang makahimo sina. Mabuligan ka sang isa ka “matuod nga abyan” nga mangin kontento sa kabuhi.—Hulubaton 17:17.

PUEDE KITA MANGIN MALIPAYON SUBONG PAAGI SA PAGSUNOD SA GIYA SANG BIBLIA

PAG-ATUBANG SA BALATIAN

Ang Biblia nagalaygay: “Ang tagipusuon nga malipayon maayo nga bulong.”—Hulubaton 17:22.

Pareho sang “maayo nga bulong,” ang kalipay makabulig sa aton kon may balatian kita. Pero paano kita mangin malipayon kon may balatian kita?

Mangin mapinasalamaton. Kon hunahunaon naton pirme ang aton balatian, ang aton “tanan nga adlaw” mangin masubo. (Hulubaton 15:15) Sa baylo, “ipakita nga mapinasalamaton kamo,” siling sang Biblia. (Colosas 3:15) Apresyaha ang tanan nga maayo nga butang sa kabuhi, bisan ano man ini kagamay. Ang matahom nga pagtunod sang adlaw, preska nga hangin, yuhum sang isa ka pinalangga—makapahalipay sa aton kabuhi.

Maghimo sang mga butang para sa iban. Bisan indi maayo ang aton panglawas, “mas malipayon ang nagahatag sangsa nagabaton.” (Binuhatan 20:35) Kon ginaapresyar sang iban ang aton ginahimo, maganami ang aton pamatyag, kag malipatan naton sing makadali ang aton mga problema. Mangin malipayon ang aton kabuhi kon buligan naton ang iban nga mangin malipayon.

PAGPABAKOD SANG PAG-ASAWAHAY

Ang Biblia nagalaygay: “[Pat-ura] ninyo ang mas importante nga mga butang.”—Filipos 1:10.

Mahimo maguba ang pag-asawahay kon talagsa lang nagaupdanay ang bana kag asawa. Dapat kabigon sang bana kag asawa ang ila pag-asawahay nga isa sa mas importante nga butang sa ila kabuhi.

Mag-updanay pirme sa mga buluhaton. Planuhi nga magkaupod kamo pirme sa paghimo sang pila ka butang sa baylo nga kon san-o lang. “Ang duha mas maayo sangsa isa,” siling sang Biblia. (Manugwali 4:9) Puede kamo mag-updanay sa pagluto, pag-exercise, pagpamahaw, ukon paglingawlingaw.

Ipabutyag ang imo gugma. Ginapalig-on sang Biblia ang bana kag ang asawa nga higugmaon kag respetuhon ang kada isa. (Efeso 5:28, 33) Ang pagyuhum, paghakos, ukon paghatag sing gamay nga regalo makapabakod gid sa pag-asawahay. Kag dapat nga ang seksuwal nga interes ipakita lang nila sa isa kag isa.—Hebreo 13:4.

“NAKIT-AN KO GID MAN ANG KATUYUAN SANG KABUHI!”

—Panugiron ni Ryoko Miyamoto, Japan.

Kabudlay sang akon kabuhi. Ang akon bana palahubog kag pirme lang wala sing trabaho. Iresponsable sia nga amay sang amon apat ka kabataan. Bisan ano ko ka bakabaka, daw indi kami makatibawas. Namensar ako, ‘Amo gid bala sini ang akon kapalaran, ukon basi silot ini sa mga sala ko sang nagligad ko nga kabuhi?’

Dayon, may isa ka Saksi ni Jehova nga nagbisita sa amon. Kanami sang iya yuhum samtang ginapaathag niya ang parte sa Ginharian sang Dios kag kabuhi nga wala sing katapusan. Gintanyagan niya ako sing isa ka pagtuon sa Biblia. Sang ulihi natun-an ko nga may Dios gid man kag maalam sia, makatarunganon, kag mahigugmaon. Natun-an ko man ang kahimtangan sang mga patay kag ang akon pag-antos indi bangod sa kapalaran.

Labaw sa tanan, naintiendihan ko nga mangin matuod ka nga malipayon kon may suod ka nga relasyon sa Dios. Ini nga kamatuoran sa Biblia nakahatag sa akon sing daku nga pagpalig-on, kahilwayan, kag kaumpawan. Nakit-an ko gid man ang katuyuan sang kabuhi!