Pagbulig sa mga Tawo nga Indi Relihioso

1. Ano nga pagbag-o ang natabo sa pila ka lugar sang nagligad lang nga mga tinuig?

LINIBO na ka tuig nga ang kalabanan nga tawo sa bilog nga kalibutan may relihion. Pero nagbag-o ang kahimtangan sang nagligad lang nga mga tinuig. Madamo na ang wala sing relihion. Sa iban nga pungsod, ang kalabanan nga tawo nagasiling nga indi sila relihioso.b—Mat. 24:12.

2. Ano ang pila ka rason kon ngaa madamo na nga tawo ang indi relihioso?

² Ngaa madamo na nga tawo ang nagasiling nga indi sila relihioso?c Mahimo nga ang iban nawili sa paglipaylipay ukon natublag sa ila mga problema. (Luc. 8:14) Ang iban wala na nagpati nga may Dios. Ang iban naman nagapati nga may Dios, pero para sa ila, ang relihion indi na praktikal, wala sing mabulig, kag indi magsanto sa siensia kag pagpangatarungan. Mahimo nga nabatian nila sa ila mga abyan, mga manunudlo, ukon sa kilala nga mga tawo sa media nga ang kabuhi nagsugod paagi sa ebolusyon, pero wala sila sing mabatian nga maayo nga mga rason para magpati nga may Dios. Ang iban naugot sa mga lider sang relihion nga nagapanguarta lang kag nagahingamo nga kontrolon ang iban. Sa pila ka lugar, indi hilway sa pagsimba ang mga tawo bangod sang mga kasuguan sang gobierno.

3. Ano ang katuyuan sini nga artikulo?

³ Ginsugo kita ni Jesus nga ‘tudluan ang mga tawo sa tanan nga pungsod agod mangin disipulo niya.’ (Mat. 28:19) Paano naton mabuligan ang indi relihioso nga mga tawo nga higugmaon ang Dios kag mangin disipulo sang Cristo? Dapat naton mabal-an nga nagadepende sa lugar nga gindak-an sang isa ang iya reaksion sa aton mensahe. Halimbawa, indi pareho ang reaksion sang mga taga-Europe kag sang mga taga-Asia kon nagabantala kita sa ila. Ngaa? Sa Europe, ang mga indi relihioso may nabal-an parte sa Biblia kag sa ideya nga may Manunuga. Pero sa iban nga pungsod sa Asia, ang mga indi relihioso mahimo nga wala gid sing nabal-an parte sa Biblia kag mahimo nga wala sila nagapati nga may Manunuga. Katuyuan sini nga artikulo nga buligan kita kon paano magbantala sa tanan, ano man ang ila ginapatihan ukon lugar nga ginhalinan.

PIRME MANGIN POSITIBO

4. Ngaa puede kita mangin positibo pirme?

⁴ Mangin Positibo. Kada tuig, may mga tawo nga indi relihioso nga nangin mga Saksi ni Jehova. Antes sila nangin Saksi, madamo sa ila ang may maayo na nga paggawi kag naugot sa malain nga ginahimo sang mga relihion. Ang iban may imoral nga pagkabuhi kag madamo sa ila ang may malain nga mga batasan nga dapat nila bag-uhon. Sa bulig ni Jehova, makita gid naton ang mga tawo nga “may husto nga panimuot sa pagtigayon sing kabuhi nga wala sing katapusan.”—Binu. 13:48; 1 Tim. 2:3, 4.

5. Ano sa masami ang rason nga nagapamati sa aton mensahe ang mga tawo?

⁵ Mangin Mainayuhon kag Mataktikanhon. Masami nga nagapamati sa aton mensahe ang mga tawo, indi bangod sa kon ano ang aton ginasiling, kundi sa kon paano naton ini ginasiling. Nanamian sila mamati kon mainayuhon kita, mataktikanhon, kag nagapakita gid sang kabalaka sa ila. Wala naton sila ginapilit nga mamati sa aton. Sa baylo, ginahangop naton ang ila opinyon parte sa relihion. Halimbawa, indi gusto sang iban nga istoryahan ang relihion sa indi nila kilala. Para naman sa iban, indi maayo nga pamatasan nga mamangkot kon ano ang ginahunahuna sang isa parte sa Dios. Kag may ara man nga nahuya nga makita sila sang iban nga nagabasa sang Biblia, ilabi na upod sang isa ka Saksi ni Jehova. Gani ginatinguhaan naton nga hangpon ang ila ginahunahuna kag ginabatyag.—2 Tim. 2:24, footnote.

6. Paano nagpasibu si apostol Pablo sa iya mga ginbantalaan, kag paano naton sia mailog?

⁶ Ano ang himuon naton kon indi gusto sang aton mga ginaistorya nga sambiton naton ang mga tinaga pareho sang “Biblia,” “Dios,” ukon “relihion”? Ilugon naton si apostol Pablo kag ipasibu naton sa ila ang aton isiling. Sang nagbantala si Pablo sa mga Judiyo, gingamit niya ang Kasulatan. Pero sang nagbantala sia sa Griego nga mga manunudlo sa Areopago, wala niya ginsiling nga nagakutlo sia sa Biblia. (Binu. 17:2, 3, 22-31) Paano naton mailog si Pablo? Kon nagaistorya ka sa tawo nga wala nagapati sa Biblia, mas maayo kon indi mo pag-isiling nga nagakutlo ka sa sini. Kon sa banta mo indi gusto sang imo ginaistorya nga makita sia sang iban nga nagabasa kamo sang Biblia, puede mo ipakita sa iya ang mga teksto nga indi matalupangdan sang iban, halimbawa paagi sa imo gadyet.

7. Ano ang puede naton himuon para mailog naton ang ginhimo ni Pablo nga ginsiling sa 1 Corinto 9:20-23?

⁷ Mangin Mahinangpanon kag Magpamati. Dapat naton hangpon ang ginahunahuna kag ginabatyag sang mga tawo nga ginaistorya naton. (Hulu. 20:5) Binagbinaga liwat ang ginhimo ni Pablo. Isa sia ka Judiyo. Gani nagpasibu gid sia sa iya pagbantala sa mga Gentil, kay diutay lang ukon wala gid sila sing nabal-an parte kay Jehova kag sa Kasulatan. Para mahangpan naton ang ginahunahuna kag ginabatyag sang mga tawo sa aton teritoryo, puede kita mag-research ukon mamangkot sa eksperiensiado nga mga kauturan.—Basaha ang 1 Corinto 9:20-23.

8. Ano ang isa ka paagi para maistorya ang mga tawo parte sa Biblia?

⁸ Gusto naton nga makita ang mga “tawo nga takus.” (Mat. 10:11) Para mahimo ini, dapat naton pamangkuton ang mga tawo sang ila opinyon kag mamati kita dayon sing maayo. Halimbawa, ginapamangkot sang isa ka utod sa England ang mga tawo kon paano mangin malipayon ang mag-asawa, paano magpadaku sang mga bata, ukon paano mabatas ang inhustisya. Pagkatapos niya pamatian ang ila sabat, nagasiling sia, “Ano ang masiling mo sa sini nga laygay nga ginsulat mga 2,000 ka tuig na sang una?” Dayon, ginapakita niya sa ila ang nahanda niya nga mga teksto sa iya gadyet, nga wala ginasambit ang tinaga nga “Biblia.”

KON PAANO MAGBANTALA SA MGA TAWO

9. Paano naton mabuligan ang mga tawo nga masami nga nagalikaw istoryahan ang parte sa Dios?

⁹ Para mabantalaan naton ang mga tawo nga masami nga nagalikaw istoryahan ang parte sa Dios, hambalan naton ang topiko nga interesado sila. Halimbawa, madamo ang nagadayaw sa mga butang sa duta kag sa langit. Gani puede naton isiling: “Indi bala nga madamo sang naimbento sang mga sientipiko ang ginsunod lang nila sa mga butang nga ara na nga daan sa kalibutan? Halimbawa, gintun-an sang mga nagdesinyo sang mikropono ang parte sa dulunggan, kag gintun-an sang mga nagdesinyo sang kamera ang parte sa mata. Ti, may nagdesinyo man bala sang dulunggan kag mata nga ila gintun-an?” Pagkatapos pamatian sing maayo ang ila sabat, puede naton idugang: “Nakapahunahuna gid sa akon ang ginsiling sang isa ka mamalaybay sang una: ‘Indi bala makabati ang Isa nga amo ang naghimo sing dulunggan? Indi bala makakita ang Isa nga amo ang naghimo sing mata? . . . Sia ang Isa nga nagatudlo sa mga tawo sing ihibalo!’ Nakita sang pila ka sientipiko nga husto ini kay nagapati sila nga may nagtuga sa aton.” (Sal. 94:9, 10) Dayon, puede naton ipalantaw ang video nga makita sa jw.org/hil sa “Interbyu kag Eksperiensia” sa seksion nga “Ginhalinan sang Kabuhi.” (Buksi ang PUBLIKASYON > VIDEO.) Ukon puede naton ihatag sa iya ang brosyur nga Gintuga Bala ang Kabuhi? ukon ang brosyur nga The Origin of Life—Five Questions Worth Asking.

10. Ano ang isiling naton sa tawo nga indi gusto istoryahan ang parte sa Dios?

¹⁰ Gusto gid sang kalabanan ang maayo nga palaabuton. Pero nahadlok ang madamo kay abi nila maguba ang duta ukon indi na ini maistaran sa ulihi. Ang isa ka manugtatap sang sirkito sa Norway nagsiling nga ang mga tawo nga indi gusto istoryahan ang parte sa Dios masami nga interesado sa nagakatabo sa kalibutan. Pagkatapos niya matamyaw ang mga tawo, nagasiling sia: “Sa banta mo, may maayo pa ayhan kita nga palaabuton? Sin-o ayhan ang masaligan naton para matabo ini? Ang mga pulitiko, mga sientipiko, ukon iban pa?” Ginapamatian niya sing maayo ang ila sabat, dayon nagabasa sia ukon nagakutlo sang isa ka teksto parte sa maayo nga palaabuton. Ang iban nangin interesado sa ginpromisa sang Biblia nga ang duta magapabilin sing dayon kag ang maayo nga mga tawo magaistar sa sini sing wala sing katapusan.—Sal. 37:29; Man. 1:4.

11. Ngaa dapat may lainlain kita nga introduksion para sa mga maistorya naton, kag paano naton mailog si Pablo suno sa Roma 1:14-16?

¹¹ Dapat may lainlain kita nga introduksion para sa mga maistorya naton. Ngaa? Bangod lainlain man ang mga tawo. Ang makapainteres sa isa nga mamati mahimo indi naman gusto sang iban. Gusto sang iban nga istoryahan ang parte sa Dios ukon sa Biblia pero ang iban mas gusto nga istoryahan anay ang iban nga topiko. Dapat naton tinguhaan nga maistorya ang tanan nga klase sang tawo. (Basaha ang Roma 1:14-16.) Dumdumon man naton nga si Jehova ang nagapatubo sang kamatuoran sa tagipusuon sang mga nagapabalor sa kon ano ang husto.—1 Cor. 3:6, 7.

PAGBANTALA SA MGA TAWO NGA WALA NAGAPATI NGA MAY DIOS

12. Paano naton mabuligan ang mga tawo nga halin sa iban nga pungsod sa Asia nga indi interesado kon bala may Manunuga ukon wala?

¹² Sa bilog nga kalibutan, madamo nga manugbantala ang makaistorya sa mga tawo nga wala nagapati sa matuod nga Dios, ang iban sa ila halin sa mga lugar nga indi hilway sa pagsimba ang mga tawo bangod sang mga kasuguan sang gobierno. Sa iban nga pungsod sa Asia, madamo ang indi interesado kon bala may Manunuga ukon wala. Pero may pila nga gusto nga makabalo parte sa sini kag nagasugot sila dayon nga magtuon sang Biblia. May iban naman nga indi interesado nga magtuon sang bag-o nga mga ideya sa primero. Paano naton sila mabuligan? Nangin epektibo ang pila ka eksperiensiado nga mga manugbantala paagi sa pag-istorya sing mainabyanon kag pagpakita sing kabalaka. Dayon, kon nagakabagay na sa sitwasyon, ginasugid nila kon paano nakabulig ang mga prinsipio sa Biblia nga nangin malipayon ang ila kabuhi.

13. Ano ang makabulig para mangin interesado ang mga tawo sa Biblia? (Tan-awa ang piktyur sa kober.)

¹³ Madamo ang nangin interesado sa maayo nga mga prinsipio sa Biblia. (Man. 7:12) Sa New York, ang utod nga nagabantala sa mga nagahambal sing Mandarin nagsiling: “Nagapakita ako sang kabalaka sa mga tawo kag ginapamatian ko sila. Kon magsiling sila nga bag-o pa lang sila makasaylo halin sa iban nga pungsod, puede ko ipamangkot: ‘Kamusta, medyo naka-adjust na kamo? May nakita na kamo nga trabaho? Ginaayuhan man bala kamo sang mga tawo diri?’” Kon kaisa, makabulig ini sa utod para masugid niya ang ginatudlo sang Biblia. Kon nagakabagay sa sitwasyon, mahimo pa niya isiling: “Ano sa banta mo ang makabulig para mangin maayo ang pagtamdanay sang mga tawo? May gusto ako tani nga ipakita sa imo nga hulubaton sa Biblia. Siling diri: ‘Ang pagsugod sang away kaangay sa pagbukas sang buhangan; gani antes magsugod ang baisay, maghalin ka na.’ Sa banta mo, makabulig ayhan ini nga laygay para mangin maayo ang kaangtanan naton sa iban?” (Hulu. 17:14) Paagi sa sini nga pag-istoryahanay, mahimo naton makita ang mga tawo nga gusto pa gid magtuon.

14. Paano ginabuligan sang isa ka utod sa Asia ang mga tawo nga nagasiling nga wala sila nagapati nga may Dios?

¹⁴ Ano ang puede naton isiling kon sugiran kita sang mga tawo nga wala sila nagapati nga may Dios? Ang isa ka utod nga madugay na nga nagabantala sa mga indi relihioso sa Asia nagpaathag: “Kinaandan na nga kon magsiling ang taga-diri nga ‘Wala ako nagapati nga may Dios,’ buot niya silingon wala sia nagapati nga dapat simbahon ang mga dios nga ginasimba sang mga tawo sa ila lugar. Gani ginasiling ko nga husto sia nga ang kalabanan nga dios ginhimo lang sang mga tawo kag indi matuod nga dios. Masami nga ginabasa ko ang Jeremias 16:20: ‘Makahimo bala ang tawo sing matuod nga dios? Indi matuod nga mga dios ang ginahimo nila.’ Dayon mamangkot ako: ‘Paano naton mabal-an kon matuod ang isa ka dios ukon ginhimo lang ini sang mga tawo?’ Pamatian ko sia sing maayo, kag dayon basahon ko ang Isaias 41:23: ‘Isugid sa amon ang mahanabo sa palaabuton, agod mahibaluan namon nga mga dios kamo.’ Dayon ipakita ko ang isa ka halimbawa sang gintagna ni Jehova nga natuman.”

15. Ano ang matun-an naton sa ginahimo sang isa ka utod sa East Asia?

¹⁵ Amo ini ang ginsiling sang isa ka utod sa East Asia nga ginahimo niya kon nagabalik sia sa mga interesado: “Ginapakita ko sa ila ang mga halimbawa sang mga prinsipio sa Biblia, mga tagna sa Biblia nga natuman na, kag mga kasuguan nga nagakontrol sa uniberso. Dayon ginapaathag ko nga ini tanan nagapamatuod nga may isa ka buhi kag maalam nga Manunuga. Kon magsiling ang isa ka tawo nga posible gid man nga may Dios, ipakita ko sa iya ang ginasiling sang Biblia parte kay Jehova.”

16. Suno sa Hebreo 11:6, ngaa dapat magtuo sa Dios kag sa Biblia ang mga ginatudluan naton, kag paano naton sila mabuligan nga magbakod ang ila pagtuo?

¹⁶ Kon ginatudluan naton sang Biblia ang mga tawo nga indi relihioso, dapat padayon naton sila nga buligan nga magbakod ang ila pagtuo sa Dios. (Basaha ang Hebreo 11:6.) Buligan man naton sila nga magbakod ang ila pagtuo sa Biblia. Para mahimo ini, dapat naton ipaathag ang pila ka kamatuoran sing madamo nga beses. Sa kada pagtuon naton, mahimo nga dapat naton binagbinagon ang mga pamatuod nga ang Biblia Pulong sang Dios. Puede naton binagbinagon sing makadali ang mga tagna sa Biblia nga natuman na, ang mga ginasiling sini nga husto sa siensia kag kasaysayan, ukon ang mga prinsipio sa sini nga nakabulig sa aton.

17. Ano ang resulta kon magpakita kita sang gugma sa mga tawo?

¹⁷ Mabuligan naton ang mga tawo nga mangin disipulo sang Cristo kon magpakita kita sang gugma sa ila, relihioso man sila ukon indi. (1 Cor. 13:1) Kon ginatudluan naton sila, ginatinguhaan naton nga makita nila nga palangga sila sang Dios kag gusto niya nga palanggaon man nila sia. Kada tuig, linibo ka tawo nga sang una diutay lang ukon wala gid sing interes sa relihion ang nagpabawtismo bangod natun-an nila nga palanggaon ang Dios. Gani mangin positibo, kag magpakita sang gugma kag kabalaka sa tanan nga klase sang tawo. Pamatii sila. Tinguhai nga mahangpan ang ila ginahunahuna kag ginabatyag. Paagi sa imo halimbawa, tudlui sila nga mangin disipulo sang Cristo.