May Dugang Pa Bala Kamo nga Mahimo sa Pagpadungog kay Jehova?

¹ Isa ina ka importante nga pamangkot para binagbinagon naton tanan. Subong matutom nga mga manug-ilog sang aton Agalon, nga si Jesucristo, ginapadunggan naton karon ang Dios paagi sa pagpahayag sing dayag sang iya ngalan. Isa ini ka salabton nga dapat naton abagahon agod matigayon naton ang kahamuot sang Dios. (Mar. 13:10; Luc. 4:18; Binu. 4:20; Heb. 13:15) Isa gid ka dimalaragway nga pribilehiyo​—huo, kadungganan—​ang dalhon ining maayong balita sa nabilin nga naalaplaag nga “mga karnero” nga mahimo pa mangin bahin sang bug-os uniberso nga toril ni Jehova!​—Juan 10:16.

² Makahimo bala kamo kag ang inyo kabataan sing dugang pa sa pagpadungog kay Jehova paagi sa pagpauswag sang inyo hilikuton sa ministeryo? Sa pirme nagadugang nga kadamuon sa bug-os nga kalibutan, ang inyo mga kauturan nga lalaki kag babayi nagasulod sa payunir nga pag-alagad. Sadtong bulan sang Abril 1992, may kataason nga 34,313 sa Pilipinas ang yara sa espesyal, regular, ukon auxiliary payunir nga pag-alagad. Personal na bala ninyo nga nabinagbinag sing serioso ang pagpayunir? Ginapalig-on bala ninyo ang inyo kabataan nga himud-usan ang karera sang bug-os tion nga ministeryo?

³ Ngaa indi ninyo binagbinagon sing maayo ang inyo personal nga mga balatyagon nahanungod sa payunir nga pag-alagad? Kon ginahambalan ini, maabtik bala kamo nga nagahinakop nga ang inyo mga kahimtangan wala nagatugot sa inyo nga mag-alagad subong payunir nga ministro? Matuod nga ang pagpayunir indi posible para sa tanan. Ang Makasulatanhon nga mga salabton kag iban pa nga mga limitasyon nagapugong sa madamo sa pag-alagad sing bug-os tion. (1 Tim. 5:8) Apang nabinagbinag na bala ninyo ini nga butang sing mapangamuyuon sining karon lang? Nahambalan na bala ninyo ini subong isa ka pamilya agod hibaluon kon mahimo bala nga makapayunir maski ang isa ka katapo? Ang Mayo 15, 1982 nga guwa sang Ang Lalantawan nagasambit sing makapahunahuna nga pinamulong sa pahina 24: “Sa pagkamatuod, dapat binagbinagon sing mapangamuyuon sang tagsa ka Cristianong ministro kon bala makapayunir sia ukon indi. Ang isa ka taga-Bagatnan nga Aprika nga mag-asawa nga nagpayunir sa napulog-lima ka tuig nagsiling: ‘Ngaa nagapayunir kami? Makapaathag gid bala kami kay Jehova kon wala kami magpayunir?’ Madamo sang indi mga payunir ang makapamangkot man sini: ‘Mapaathag ko gid bala kay Jehova ang katunayan nga indi ako payunir?’ ”

⁴ Isa pa ka artikulo sa Lalantawan tuhoy sini nga tema ang nagkomento sing prangka: “Ang kada isa sa aton dapat mangin tampad sa iya kaugalingon. Nagasiling ka bala, ‘Ang espiritu luyag, apang ang unod maluya’? Apang luyag gid bala sang espiritu? Likawan naton ang paggamit sang kaluyahon sang unod subong balibad nga ang espiritu indi luyag.”​—l79 2/15, p. 25.

⁵ Mga Ginikanan nga Maluyag nga Magmadinalag-on ang Ila Kabataan: Ang Hulubaton 15:20 nagapasalig sa aton: “Ang anak nga maalam nagapahalipay sa amay.” Walay duhaduha nga malipay gid ang diosnon nga mga ginikanan kon ang ila mga anak nga lalaki kag babayi nagahimud-os sang kabuhi sang dedikado nga pag-alagad kay Jehova. Apang, ang inyo kabataan indi kinaugali nga magapili sang maalamon nga dalanon. Ang ganyat sining kalibutan tuman ka kusog. Mga ginikanan, ang inyo kaugalingon nga mga prinsipio sa moral amo ang nagadihon sing daku sang mga prinsipio sa moral sang inyo kabataan. Kon positibo pirme ang inyo ginahambal nahanungod sa mga benepisyo sang bug-os tion nga pag-alagad, kon ginapalig-on ninyo ang inyo kabataan nga makig-upod sa debotado nga mga payunir, kon kombinsido gid kamo nga ang bug-os tion nga ministeryo amo ang pinakadungganon nga karera nga mahimo sang inyo kabataan, ining positibo nga panimuot walay duhaduha nga may dakung epekto sa inyo kabataan. Buligi sila sa pag-apresyar sang kabilihanan sang paghimo sing maayong ngalan kay Jehova sa baylo nga sa mga tawo.

⁶ Mga pamatan-on, ginapadaku sang Hulubaton 22:1 ang pagpili nga dapat ninyo himuon: “Ang maayong ngalan dapat pilion sangsa dakung manggad; ang kahamuot maayo pa sa pilak kag bulawan.” Ano nga sahi sang ngalan ang inyo ginahimo para sa inyo kaugalingon? Binagbinaga ang mga lalaki kag mga babayi nga nabasa naton sa Biblia nga nakahimo sing ngalan sa Dios paagi sa dedikado nga pag-alagad. Yara si Lucas, ang hinigugma nga manugbulong, kag si Enoc, nga naglakat upod sa matuod nga Dios. Si Samuel nakabaton sing pinakamaayo nga edukasyon, nagsugod sang iya pag-alagad sa templo ni Jehova sa lamharon nga edad. Nagahunahuna bala kamo nga ginhinulsulan sining matutom nga mga alagad ang mga pagpili nga ila ginhimo? Ngaa magahinulsol sila? Sila tanan nagkabuhi sing makalilipay, mapatubason, kag makaalayaw. Kag nabaton nila ang mapinadayunon nga kahamuot ni Jehova!​—Sal. 110:3; 148:​12, 13; Hulu. 20:29a; 1 Tim. 4:8b.

⁷ Kon ang kabataan nagamadinalag-on sa kabuhi, ginapabugal sila sang ila mga ginikanan. Ang ila ginhimo sa paghanas, pagdisiplina, kag pagtudlo sa sining “panublion gikan kay Jehova” madamong beses nga ginbayaran. (Sal. 127:3) Ano bala ang labi pa nga mapabugal sang bisan sin-o nga ginikanan sangsa anak nga lalaki ukon babayi nga nagahimo sang tanan niya nga masarangan sa pagpadungog kay Jehova? Madamong pamatan-on sa modernong tion ang nagasunod sang mga tikang ni Lucas, Enoc, kag Samuel, subong sang ginailustrar sang isa ka sulat: “Disiseis anyos ako. Nagsugod ako sa pagregular payunir . . . siam ka bulan pagkatapos ako mabawtismuhan, kag kutob sadto nakabaton ako sing mga pagpakamaayo gikan kay Jehova . . . Ang pagpayunir nagabulig man sa imo sa eskwelahan. Sang una, ginasunlog ako sang akon mga kabutho bangod Saksi ako. Karon, bangod dugang pa nga personal nga pagtuon ang ginahimo ko, ‘masabat [ko] na ang isa nga nagayaguta sa akon.’ ”

⁸ Edukasyon sa Pagsangkap sa Isa sa Ministeryo: Sa sining punto mahimo naton binagbinagon ang pamangkot tuhoy sa sekular nga edukasyon. Isa ini ka bahin diin ang timbang nga pagtamod ilabi na nga ginakinahanglan. Ang Nobiembre 1, 1992 nga Lalantawan nagbinagbinag sang artikulo nga “Edukasyon nga May Katuyuan.” Sa ubos sang subtitulo nga “Nagakaigo nga Edukasyon,” ginhimo ini nga punto: “Dapat supurtahan sang mga Cristiano ang ila kaugalingon, bisan pa nga sila bug-os tion nga payunir nga mga ministro. (2 Tesalonica 3:​10-12) . . . Daw ano bala ka daku nga edukasyon ang ginakinahanglan sang isa ka lamharon nga Cristiano agod masunod ining mga prinsipio sa Biblia kag matuman ang iya Cristianong mga obligasyon? . . . Ano ang [suweldo] nga mahimo matawag nga “igoigo” . . . para sa sadtong maluyag mangin payunir nga mga ministeryo sang maayong balita? Ang kalabanan sa ila nagakinahanglan sing part-time nga trabaho agod indi “mapabug-atan” ang ila mga kauturan ukon ang ila pamilya.​—1 Tesalonica 2:9.”

⁹ Kon ang dugang nga edukasyon daw ginakinahanglan sang isa ka palaabuton nga payunir agod makabulig sa iya sa pagsulod sa bug-os tion nga pag-alagad, ang Nobiembre 1, 1992 nga Lalantawan nagarekomendar: “Mas maayo, kon posible gid man, nga himuon ini sang isa ka lamharon nga Saksi samtang nagapuyo sa balay, busa nagapaposible nga mahuptan nga normal ang Cristianong batasan sa pagtuon, pagtambong sa mga miting, kag pagbantala nga hilikuton.”

¹⁰ May isa ka eksperiensia gikan sa Aprika tuhoy sa 22-anyos nga pamatan-on nga kinahanglan mag-eskwela sa trade school, bisan pa nga ang iya tagipusuon yara sa pagpayunir. Samtang nagaeskwela sa trade school, nag-auxiliary payunir sia. Ginkadlawan sia sang iya mga katubotubo, nagasiling nga indi gid sia makapasar sa iya mga eksaminasyon. Ang sabat niya sa ila amo pirme ang: “Pangitaa anay ang Ginharian sang Dios kag ang iya pagkamatarong.” Nagapakita sing pagpugong sa kaugalingon, nagabugtaw sia sing temprano pa kada aga kag nagahimo sing duha ka oras nga paghanda para sa klase kag ugaling magguwa sa latagon sa hapon pagkatapos sang klase. Nakibot ang bug-os nga klase sang ining pamatan-on nangin pangatlo sa pinasahi nga eksaminasyon sa pagpili sa tatlong pinakamaalam nga estudyante para sa special sponsorship award. Ang estudyante nga nangin pang-ikaduha amo ang interesado nga ginatun-an sang aton payunir nga utod sing Biblia sa eskwelahan. Ang estudyante nga nanguna isa pa ka makugi nga Saksi nga pamatan-on sa eskwelahan.

¹¹ Ang mga Gulang Nagahimo sang Ila Bahin: Ang mga gulang sa kongregasyon, nga nagapabugal sang ginahimo sang mga payunir, nagahatag sing pagpalig-on sa sining makugi nga mga ministro. Nalipay ang mga gulang sa paghimo sini bangod nakahibalo sila nga ang mapisan, mapatubason nga mga payunir isa ka pagpakamaayo sa bisan ano nga kongregasyon. Pagkatapos makahinguyang sing isa ka tuig ukon kapin pa sa regular payunir nga pag-alagad, nangin kalipikado sila para sa dugang nga paghanas sa Eskwelahan sang Payunir nga Pag-alagad. Ang kurso isa gid ka importante nga kasangkapan sa pagpauswag sang pagkaepektibo sang mga payunir. Bisan pa ang mga payunir yara sa unahan sang hilikuton, nagakinahanglan man sila sing mahigugmaon nga pagpalig-on, kag ang mga gulang dapat mangin alisto sa pagpaayaw sini nga kinahanglanon.​—1 Ped. 5:​1-3.

¹² Paano makahatag sing pangpapagsik ang mga gulang sa payunir nga hilikuton? Ang maayong panugod amo ang paghibalo sa pulupanag-on kon sin-o ang mahimo nga makahimulos sa sining pribilehiyo. Sarang mapalapitan sang mga gulang ang mga indibiduwal nga daw yara sa maayo nga posisyon nga makapayunir, lakip ang madamo nga regular nga nagaauxiliary payunir, mga retirado, mga ginang sa puluy-an, kag mga estudyante. Bisan pa wala sing isa ang dapat magbatyag nga obligado sa pagpalista, yadtong may handum apang nagapang-alag-ag mahimo, paagi sa pila ka praktikal nga pagpalig-on, makarealisar nga masarangan nila ang pagpayunir.

¹³ Sa paghatag sing pagpalig-on sa mga maluyag mag-aplay, dapat dumdumon sang mga gulang nga indi kinahanglan para sa aplikante nga maghinguyang sing pila ka bulan sa auxiliary payunir nga hilikuton antes magpalista subong regular payunir. (km 9/86 nga suplemento par. 24-26) Sa pagkamatuod, luyag sang mga gulang siguraduhon sing makatarunganon nga ang aplikante yara sa posisyon sa paglab-ot sang tulumuron nga oras.

¹⁴ Pagkatapos marepaso sang Komite sa Pag-alagad sang Kongregasyon kag mausisa sing maayo sang sekretaryo ang aplikasyon agod pat-uron nga ang tanan nga pamangkot nasabat, dapat ini sa gilayon ipadala sa Sosiedad.

¹⁵ Dapat pirme pahibaluon sang sekretaryo ang mga gulang sang bisan anong problema nga mahimo naeksperiensiahan sang mga payunir. Importante ini ilabi na sa mga kongregasyon diin madamo sing payunir. Dugang sa pagrepaso sang hilikuton sang mga payunir pagkatapos sang tuig sa pag-alagad, subong sang ginapangabay sa Congregation Analysis Report (S-10), dapat agdahon sang sekretaryo ang manugtatap sa pag-alagad nga makigsapol sa iya sa unang bahin sang Marso agod hibaluon kon sin-o ang wala pa makalab-ot sang tulumuron nga oras kag nagakinahanglan sing personal nga igtalupangod. (Tan-awa ang Marso 1993 nga Ang Aton Ministeryo sang Ginharian, Mga Pahibalo.) Kon gilayon nga ginahatag ang bulig, mahimo nga matapos sang payunir ang tuig sa pag-alagad sing madinalag-on.

¹⁶ Madamong bag-ong mga payunir ang bataon pa sa edad kag halos bag-o pa sa kamatuoran. Ang ila malangkagon nga espiritu nagapahalipay gid sa aton! Apang ining mga bag-uhan dapat pa mahanas sa pagpalambo sing kalantip sa pamalaybalay nga hilikuton, sa paghimo sing epektibo nga mga pagduaw liwat, kag sa pagtudlo sa mga pagtuon sa Biblia. Kon indi sila makahanas, ang bag-uhan mahimo nga magluya pagligad sang isa ka tuig ukon kapin pa kag sa ulihi magauntat sa pagpayunir bangod sang indi mabungahon nga ministeryo. Ang alisto nga mga gulang mahimo makamutik sang magagmay nga mga problema ukon paghinay sa hilikuton. Kon ginahatag ang gilayon nga igtalupangod kag ang payunir ginabuligan sa iya problema, mahimo sia makaalagad sing mabungahon sa madamong tinuig.

¹⁷ Makapangisda Bala Kamo sa Malayo nga Kadagatan? Ang iban sa mga disipulo ni Jesus mga mangingisda. May mga tion nga, pagkatapos sang pagpangisda sa bug-os nga gab-i, ang ila mga pukot walay unod gihapon. (Juan 21:3) Sa mga bahin sining pungsod diin ang ‘pagpangisda sa mga tawo’ ginhimo sing tinuig na, ang iban nga mga payunir mahimo maghinakop nga diutay nga “isda” na lamang ang nabilin sa “tubig” sang ila kongregasyon. (Mat. 4:19) Sa kabaliskaran, wala bala kita malipay sa pagbasa sing mga report halin sa iban nga mga kadutaan diin ang mga manugbantala kag mga payunir nagadumala sing madamong pagtuon sa Biblia? Ang kalipay nga naeksperiensiahan sang mga payunir sa sining mga kadutaan maathag gid. (l92 9/1 p. 20 par. 15) Busa, kon ang pila ka mapisan nga mga payunir yara sa posisyon sa pagkadto sa iban nga pungsod sa ila kaugalingon nga gasto diin mas daku ang kinahanglanon, dapat nila ini binagbinagon upod sa sanga talatapan antes ini himuon.

¹⁸ Sa primero, ang iban mahimo nga nagpayunir bangod nahibaluan nila nga amo ini ang husto nga butang nga himuon apang nagpalibog sila kon bala magamadinalag-on sila sa sini. Ayhan nag-aplay sila nga may pila ka pangduhaduha kag pang-alag-ag. Sa umpisa, ang ila mga bunga sa latagon mahimo nga diutay. Apang, sang ulihi, ang ila kalantip nag-uswag, kag may pamatuod sang pagpakamaayo ni Jehova sa ila hilikuton. Gani, ang ila kalipay kag pagsalig nagdugang. Para sa iban, ang pagpayunir napamatud-an nga nangin tungtungan-bato padulong sa pag-alagad sa Bethel, pagmisyonero, Ministerial Training School, kag bisan sa nagalakbay nga hilikuton.

¹⁹ Ayhan indi posible para sa inyo nga magsaylo sa iban nga lugar ukon magmisyonero sa iban nga pungsod, apang may mga kahigayunan gihapon nga makapangisda sa iban nga mga tubig sa sulod sining pungsod kon ang inyo karon teritoryo indi tuman ka mabungahon. Ina nga pagsaylo mahimo nga nagakinahanglan sing pagbag-o sa inyo estilo sang pagkabuhi, apang ang espirituwal nga mga padya daku gid katama.​—Mat. 6:​19-21.

²⁰ Ukon kon ginatugot sang inyo kahimtangan, ayhan mahimo kamo makabulig sa isa ka malapit nga kongregasyon sa inyo kaugalingon nga sirkito. Kon ikaw kalipikado, ang inyo manugtatap sa sirkito malipay sa paghatag sing mga panugda sa mga kongregasyon sa sirkito nga makabenepisyo gikan sa isa pa ka payunir.

²¹ Ang iban nga mga payunir kag mga manugbantala nakabulig sa kaugalingon nga lugar samtang nagapabilin mismo sa ila puluy-an. Ayhan makahibalo sila maghambal sing iban nga pamulong. Nasapwan bala ninyo sa sulod sang inyo teritoryo nga madamo nga bahin sang populasyon ang nagahambal sing lain nga pamulong? May mga tawo bala nga dapat makabaton sing mensahe sang Ginharian gikan sa isa nga nagagamit sing pamulong paagi sa senyas? Yadtong makahibalo sang lain nga pamulong makabulig sing daku sa paglab-ot sa tanan nga sahi sang mga tawo upod ang mensahe sang Ginharian. Bisan pa isa gid ini ka daku nga hangkat, mangin makapaladya man ini.​—1 Tim. 2:4; Tito 2:11.

²² Kon ginahimo ninyo karon ang tanan nga inyo masarangan sa pagpadungog kay Jehova, magkalipay sa inyo karon mga pribilehiyo sa pag-alagad. Kon ginahunahuna ninyo nga makahimo kamo sing dugang pa, ipangamuyo ini kay Jehova. Usisaa sing realistiko kon anong mga pagbag-o ang ginatugot sang inyo kahimtangan nga himuon ninyo. Ipakigsugilanon ang inyo mga plano upod sa isa ka gulang nga may espiritu sang pagpayunir ukon upod sa manugtatap sa sirkito. Kon nakahimo na kamo sing mapangamuyuon, praktikal nga desisyon, himua ini sa gilayon, nagasalig sa saad ni Jehova nga padunggan yadtong nagapadungog sa iya.​—Heb. 13:​5, 6; 1 Sam. 2:30.