Bag-ong Programa sang Sirkito nga Asambleya
1 Bilang pagtuman sa pinamulong ni Jesus sa Mateo 6:33, ang matuod nga mga Cristiano pirme nagauna sang Ginharian sa ila kabuhi. Gani, ang “Padayon nga Pangitaa Anay ang Ginharian” isa ka nagakaigo nga tema para sa programa sang sirkito nga asambleya nga magasugod sa Pebrero, 1994.
2 Gikan sa pamuno igapatalupangod sang programa ang pagkatunay sang Ginharian, nagapadaku nga isa ini ka nagapanghikot nga gobierno nga may teritoryo, mga gumalahom, mga sakop, kag mga kasuguan. Sa katunayan, madamo sa mga kasuguan sang tawhanon nga mga gobierno nga nagabulig sa katilingban karon ang napasad sa mga kasuguan sang Biblia. Sugod sang 1914 nakita naton ang mga epekto sang gobierno sang Ginharian sa mga sakop sini, nga yara na karon sa 229 ka lainlain nga kapungsuran sa duta.
3 Ang pangamlig kag pagpakamaayo nga nabaton naton gikan sa pag-una sang Ginharian sa tanan nga bahin sang aton kabuhi pagabinagbinagon. Ang mabuligon nga laygay igahatag agod ipakita kon paano naton malikawan ang dikinahanglanon nga paghimud-os. Ang mga pamulongpulong, mga pasundayag, kag mga paghinun-anon magapakita kon ngaa importante gid nga huptan ang aton mata nga simple.
4 Sa Sabado sang asambleya, ang kalipikado nga mga kandidato sa bawtismo magahimo sang ila dayag nga pagpahayag sang ila dedikasyon kay Jehova. Kag sa Domingo, kita tanan luyag nga makapamati sa pamulongpulong publiko, nga natig-uluhan “Kon Ano ang Pagahimuon sang Ginharian sang Dios sa Katawhan.”
5 Pat-ura nga matambungan mo ang duha ka adlaw sang sirkito nga asambleya, kag agdaha yadtong ginatun-an mo sang Biblia nga magtambong man. Ang inyo manugtatap sa sirkito magapahibalo sa inyo sang petsa para sa sini sa natalana nga tion. Ang programa sang asambleya, nga ginaupdan sang makalilipay nga pag-ululupod sang mga kauturan, magahatag sing makapapagsik kag makapaumpaw nga pagpalig-on nga wala sing isa sa aton ang luyag nga mawasi.