Ang Katinlo Nagapadungog sa Dios
1 Ang Mosaikong Kasuguan nagaunod sing estrikto nga mga kasuguan sa katinlo. Ginapain sini ang Israel subong katawhan nga dapat magpabilin nga matinlo sa pisikal kag espirituwal. (Lev. 11:35, 36; 15:1-11; Isa. 52:11) Ining matinlo nga kahimtangan nagpadungog sa Dios kag nag-amot sa kapagros sang pungsod.
2 Sa karon man, ang katinlo isa ka nagapakilala nga tanda sang katawhan ni Jehova. Apang samtang nagapakilala ini sa katawhan ni Jehova subong isa ka grupo, matuod bala ini sa tagsatagsa sa aton sing indibiduwal? Ang aton pagkabalaka sa kahinlo kag personal nga katinlo nagapabanaag kon daw ano ka daku nga ginaapresyar naton ang mga kasuguan ni Jehova.
3 Kamusta ang hitsura sang aton puluy-an? Nagahimutig bala ini sa mensahe sang Ginharian? Posible bala nga mahimo pangduhaduhaan sang iban ang aton sinseridad kon maghambal kita tuhoy sa paghimo nga paraiso sa duta samtang ang aton kaugalingon nga puluy-an mahigko kag madamo sing hilamon ang ugsaran? Kon ang aton puluy-an dimahim-ong ang hitsura ukon maisog ang baho bangod sang mahigko nga mga batasan, masiling bala nga napalambo naton ang “mga pagsinalayo sa katinlo nga nagakabagay sa bag-ong kalibutan sa idalom sang Ginharian sang Dios”?—om p. 130-1.
4 Kamusta ang aton panapot, bag, kag personal nga pamustora? Mahipid bala ini kag presentable? Rasonable bala nga huptan naton ang aton kaugalingon kag ang aton panapton nga matinlo paagi sa regular nga pagpaligo kag pagpanglaba?—l89 6/1 p. 16-19.
5 Kamusta kon ang personal nga pag-atipan sa katinlo ukon mga palibot nangin pasipala sa kongregasyon? Ayhan nagakinahanglan lamang sia sing mahigugmaon nga bulig bangod sang edad ukon balatian. Kon amo, mangin kalulo ang buligan sia. Ang isa pa ka utod nga lalaki mahimo nga may problema apang mahimo nga wala makahibalo sini; ang malulo nga laygay magapahulag sa iya nga tadlungon ang kahimtangan. Ang mga indibiduwal nga padayon nga nagapahamtang sing mapigaw nga halimbawa sa sini nga bahin indi kalipikado para sa tumalagsahon nga mga pribilehiyo sa kongregasyon. Sa pagkamatuod, ang mga gulang dapat magbantay batok sa pagpatuman sang ila kaugalingon nga personal nga mga talaksan ukon mga luyag.
6 Sa masami nalangkag kita nga agdahon ang mga interesado sa pagtambong sa mga miting bangod ang aton Kingdom Hall matahom kag matinlo. Tan-awa ang palibot sang tilipunan. Matinlo bala ang mga siya, salog, kag dingding? Ginanusnusan bala sing regular ang mga kasilyas? Kon maanad kita sa pagtan-aw sa mahigko nga salog ukon sa mga dingding nga nagakalaukab ang pintura, ayhan tamdon naton ini sa ulihi subong kalahamut-an. Apang, ang mga bisita mahimo nga may dimaayo nga impresyon. Dapat naton himuon ang aton bug-os nga masarangan nga huptan ang isa ka matahom nga tilipunan, nagahimo sang aton bahin kon nagaabot ang tion para sa pagpaninlo ukon pagkay-o.
7 Sa walay pulong, mahimo naton mahimaya ang Dios paagi sa aton personal nga hitsura kag kahipid sang aton puluy-an, salakyan, kag Kingdom Hall. Ang aton halimbawa indi magahatag sing bisan ano nga rason sang kasandaran kundi magapakita nga ang aton pagsimba matinlo kag matadlong.—1 Cor. 10:31. 32; Sant. 1:27.