Ihanda ang mga Estudyante sa Biblia Para sa Ministeryo
1 Ang aton tulumuron sa pagdumala sing mga pagtuon sa Biblia amo ang paghimo sing bag-ong mga disipulo nga magabuylog sa aton sa pagtudlo sa iban. (Mat. 28:19, 20) Gani indi lamang ang pagpaambit sang ihibalo ang aton katuyuan; luyag naton nga ipatudok ang tinagipusuon nga pagtuo sa aton mga estudyante kag buligan sila sa pagpaambit sang ila paglaum sa iban. (2 Cor. 4:13) Paano naton sila mabuligan nga mangin kalipikado sa pagtudlo sa iban?—2 Tim. 2:2.
2 Ipahamtang ang Ministeryo Subong Tulumuron: Kutob gid sa ginsuguran, athaga nga ang matuod nga pagsimba nagalakip sang “dayag nga pagpahayag para sa kaluwasan.” (Roma 10:10) Ang aton mismo ngalan, mga Saksi ni Jehova, nagapakita nga dapat kita makighambal sa iban. Buligi sila sa paghangop nga ang pagtudlo sa ila indi lamang para sa ila kaluwasan. Kon sila mangin mga manunudlo, yadtong nagapamati sa ila may kahigayunan man para sa kaluwasan.—1 Tim. 4:16.
3 Repasuha ang Natun-an: Ang pulupanag-on nga mga repaso nagabulig sa estudyante sa pagtubo sa espirituwal samtang ang bag-ong natun-an nga mga kamatuoran ginatanom sa ila hunahuna kag tagipusuon. Naeksperiensiahan naton ini gid kon nagasabat sang repaso nga mga pamangkot nga ginalakip sa Pagtinuon sa Lalantawan kada semana. Maghanda sing simple nga mga pamangkot kada semana para masabat sang imo estudyante sa iya kaugalingon nga mga tinaga.
4 Ang imo repaso mahimo nga sa dagway sang isa ka danyag sa pag-alagad sa latagon. Maghatag sing pamangkot nga kinaandan nga masumalang kon nagapanaksi sa iban. Subong ikaw ang tagbalay, ipapasundayag sa imo estudyante kon ano ang isiling niya. Dayawa sia sa nahimo niya, kag maghatag sing mga panugda nga magabulig sa iya nga mangin labi pa ka epektibo sa masunod nga tion. Ini nga paghanas magatudlo sa iya kon paano gamiton ang iya natun-an kag mapalambo ang iya ikasarang sa paggamit sang Biblia.
5 Reasoning nga Libro: Pat-ura nga ang imo estudyante may isa ka kopya sang Reasoning nga libro, kag hanasa sia sa paggamit sini. Ipakita kon paano ini nagahatag sing mga panugda sa pagsugod sing mga paghambalanay, pagsabat sa mga pamangkot sa Biblia, ukon sa pag-atubang sa mga pamatok. Gamita ang libro sa pagtuon kada semana sa pagpasundayag sang mga paagi sa pagpakighambal sa iban. Ini nga libro makapalig-on sang iya pagsalig, nagapauswag sang iya inisyatibo sa pagpahayag sang mensahe sang Ginharian.
6 Ipadaku ang Importansia sang mga Miting: Ang mga miting sa kongregasyon, ilabi na ang Miting sa Serbisyo kag ang Teokratikong Eskwelahan sa Pagministro, gindesinyo sa paghanda sa aton sa pag-alagad sa latagon. Ipadaku ang importansia sang mga miting, kag buligi sia sa pagtambong. Ang tayuyon nga pagtambong makahatag sa imo estudyante sing pangpapagsik nga mangin matuod nga disipulo ni Jesus.
7 Indi dapat pagpasapayanan ang imo personal nga halimbawa. Ang imo pagkatayuyon sa pagbantala nga hilikuton nagapakita sang imo tudok nga apresasyon sa kamatuoran. Ina nga dalanon nagapalig-on sa imo estudyante nga himuon ang labi pa agod mapakita ang iya pagtuo. (Luc. 6:40) Ini tanan makabulig sa bag-uhan sa pagtamod sa ministeryo subong isa ka pribilehiyo kag malipay sa pagpakigbahin sa sini.—1 Tim. 1:12.