Sa Balay-balay Walay Untat
1 Sa dumaan nga Israel, ang mga halad ginadulot adlaw-adlaw. (Ex. 29:38-42) Karon, ginalaygayan kita sa “paghalad sa Dios sing halad sang pagdayaw, nga amo, ang bunga sang mga bibig nga nagapahayag sing dayag sang iya ngalan.” (Heb. 13:15) Ginasimba naton si Jehova paagi sa walay untat nga pagdayaw sa iya.—Isa. 43:21; Binu. 5:42.
2 Gintudluan kita ni Jesus kon paano naton dapat himuon ang putli nga pagsimba paagi sa paghalad sing mga halad sang pagdayaw. Nahibaluan niya nga ang labing epektibo nga paagi agod malab-ot ang mga tawo sang maayong balita amo ang pagpakighambal sa ila sing personal sa ila mga puluy-an. (Mat. 10:7, 12) Gani masapwan naton nga ginsunod sang iya mga apostoles ang iya inspirado nga sugo nga magbantala sa balay-balay.—Binu. 20:20.
3 Pareho man ini sa karon. Subong mga disipulo ni Jesus, ginasunod sang matuod nga mga Cristiano ang iya halimbawa paagi sa pagbantala sang maayong balita sa balay-balay. Bisan pa mahimo kita mulayon kag hingabuton tungod sina, minilyon ang nakatuon sang kamatuoran kag ginatos ka libo sang bag-ong mga disipulo ang nagabuylog sa dakung kadam-an kada tuig, nagahatag sing pamatuod nga amo ini ang paagi ni Jehova sa pagtuman sang iya kabubut-on. Amo ina kon ngaa nagapadayon kita sa aton ministeryo.
4 Mga Benepisyo sang Pamalaybalay nga Pagbantala. “Ang Dios walay ginapasulabi . . . Ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binu. 10:34, 35) Paagi sa pagduaw sa tagsa ka balay sa aton teritoryo ginapakita naton ang pagkawalay ginapasulabi, nagahatag sa tanan sing palareho nga kahigayunan agod makabati sang mensahe sang Ginharian. Sa amo ang mga nagapamati makabaton sing personal nga bulig suno sa ila indibiduwal nga mga kinahanglanon.
5 Halos ang tanan nga mga manugbantala, lakip ang mga kabataan, mga tigulang, kag bisan yadtong mga bag-uhan, mahimo makapakigbahin sa pamalaybalay nga hilikuton. Sa sining paagi ang kada isa makahimo sing “dayag nga pagpahayag para sa kaluwasan.” (Roma 10:10) Ang pagpakig-upod sa iban sa pamalaybalay nga ministeryo nagahiusa sa aton sa higot sang gugma kag paghiusa. Sa amo man nga tion, ginahatagan kita sing kahigayunan sa pagpakita sang aton pagbatas kon makasumalang kita sing dipagsapak ukon pagpamatok. Ang tanan maathag nga nagapakita nga ginapakamaayo ni Jehova ang pamalaybalay nga hilikuton kag ginagamit ini sa pagtipon sa dakung kadam-an sa iya “balay” sang putli nga pagsimba.—Isa. 2:2-4.
6 Magpadayon kita sa walay untat nga pagbantala sa balay-balay tubtob magsiling si Jehova nga husto na. (Isa. 6:11) Sa sini, pagapadyaan kita sing kalipay nga nagahalin sa pagpakigbahin sa sining hilikuton.—1 Cor. 15:58.