Mangin mga Manunudlo sang Pulong sang Dios—Nagagamit sing mga Brosyur
1 Ang tagsa ka dedikadong alagad ni Jehova dapat mangin manunudlo sang Pulong sang Dios. Si Jesus nagsugo sa aton nga “maghimo sing mga disipulo sa mga tawo sang tanan nga kapungsuran, . . . nagatudlo sa ila.” (Mat. 28:18-20) Gani, ang pagpakigbahin sa pagbantala sing maayong balita nagakinahanglan nga mangin mga manunudlo kita!—2 Tim. 2:2.
2 Sa Agosto sarang naton magamit ang aton mga ikasarang sa pagpanudlo kon nagatanyag sing mga brosyur. Mahimo kita makapili sing pila ka makawiwili nga Makasulatanhon nga mga panghunahuna sa sini kag makahanda sing pila ka komento nga magabulig sa aton sa pag-umpisa sing isa ka paghambalanay.
3 Kon nagatanyag sing brosyur nga “Nagaulikid Gid Bala ang Dios sa Aton?” mahimo ka makasiling:
◼ “Nasapwan namon nga madamo sa inyo mga kaingod ang nabalaka sa ma- dasig nga pagdamo sang krimen, terorismo, kag kasingki. Sa opinyon mo, ngaa nangin problema gid ini? [Pasabta sia.] Talalupangdon nga gintagna ini sang Biblia nga mahanabo. [Basaha ang 2 Timoteo 3:1-3.] Talupangda nga mahanabo ini sa ‘katapusan nga mga adlaw,’ Nagakahulugan ini nga may butang nga matapos. Ano ini sa banta mo?” Pasabta sia. Buksi ang pahina 22, ipakita ang ilustrasyon, kag ipaathag ang isa ukon duha ka kasulatan nga ginbalikwat sa sinang pahina. Maghimo sing mga kahimusan sa pagbalik.
4 Ayhan luyag mo gamiton ining pagpalapit kon nagatanyag sing brosyur nga “Ano ang Katuyuan sang Kabuhi?—Paano Mo Masapwan Ini?”:
◼ “Madamong tawo ang nabudlayan nga makakita sing matuod nga katuyuan sa kabuhi. Samtang ang pila nagaagom sing kalipay, ang kabuhi sang kalabanan napun-an sing kapaslawan kag pag-antos. Sa banta mo, amo bala ini ang paagi nga luyag sang Dios nga magkabuhi kita? [Pasabta sia.] Ginapakita sang Biblia nga luyag sang Dios nga magkabuhi kita sa isa ka kalibutan kaangay sini.” Ipakita ang ilustrasyon sa pahina 21, kag nian buksi ang mga pahina 25 kag 26, mga parapo 4-6. Ihatag ining pamangkot para mahambalan sa pagbalik mo: “Paano kita makapat-od nga tumanon sang Dios ang iya mga saad?”
5 Mahimo mo matanyag ang brosyur nga “Agoma ang Kabuhi sa Duta sing Dayon!” paagi sa pagpakita sang bug-os nga laragway sa atubang kag likod nga panghapin kag mamangkot:
◼ “Luyag mo bala magpuyo sa kalibutan nga kaangay sini? [Pasabta sia.] Ang Biblia nagasugid sa aton nga ginahigugma sang Dios ang katawhan kag luyag niya nga magkabuhi sila sing dayon nga may kalipay sa duta.” Buksi ang larawan numero 49, kag basaha ang isa sa ginhinambitan nga mga teksto. Nian, sa larawan numero 50, ipakita kon ano ang dapat naton himuon agod magkabuhi sa Paraiso. Magtanyag sa pagbalik para sa dugang nga paghambalanay.
6 Nahamuot si Jehova kon ‘ginapadayag naton ang aton pag-uswag paagi sa paghatag sing igtalupangod sa aton pagpanudlo.’ (1 Tim. 4:15, 16) Ang aton mga brosyur mangin daku gid nga bulig sa aton mga panikasog nga buligan yadtong nalangkag nga makabati sing “maayong mga balita sang butang nga maayo pa.”—Isa. 52:7.