Kinahanglan Naton ang Kongregasyon
1 Ang mga anak nga lalaki ni Core nagpabutyag anay sang ila apresasyon para sa kongregasyon ni Jehova sa sining paagi: “Ang isa ka adlaw sa sulod sang imo mga luwang labi pa kaayo sa isa ka libo bisan diin.” (Sal. 84:10) Para sa ila, wala sing kaanggid nga butang nga mahatag ang kalibutan. Kon amo man sina ang imo balatyagon, dapat mo himuon ang kongregasyon nga sentro nga bahin sang imo kabuhi.
2 Kutob sa ginsuguran sini pirme ginpakita sang Cristianong kongregasyon nga ginapakamaayo ini ni Jehova. (Binu. 16:4, 5) Wala sa aton ang dapat magpasapayan sang kongregasyon ukon magbatyag nga isa lamang ini ka paagi agod tipunon kita sing tingob sa pisikal. Ang kongregasyon amo ang duog nga nagaganyat sa mga Saksi ni Jehova sa tagsa ka komunidad. Nagaaman ini sing nahiusa nga pag-inupdanay agod matudluan kita ni Jehova kag maorganisar para sa hilikuton sang Ginharian.—Isa. 2:2.
3 Ang Cristianong kongregasyon amo ang sadsaran nga alagyan para matudluan kita sang kamatuoran. (1 Tim. 3:15) Ang mga sumulunod ni Jesus dapat “tanan mangin isa”—nga nahiusa sa Dios, kay Cristo, kag sa isa kag isa. (Juan 17:20, 21; ipaanggid ang Isaias 54:13.) Bisan diin man kita magkadto sa kalibutan, ang aton mga kauturan nagapati sa mga panudlo kag mga prinsipio sang Biblia kag nagagawi sang ila kaugalingon nahisanto sa sini.
4 Ginhanas kag ginsangkapan kita sa pagtuman sang aton hilikuton sa paghimo sing mga disipulo. Kada bulan, ang Lalantawan, Magmata!, kag Ang Aton Ministeryo sa Ginharian nagahatag sing mabuligon nga impormasyon sa pagbulig sa aton nga makasugod sing mga paghambalanay sa Kasulatan. Ang mga miting gindesinyo agod ipakita sa aton kon paano makakita kag mapalambo ang interes. Ang pag-uswag nga nakita naton sa bug-os nga kalibutan nagapamatuod nga ang Dios nagasakdag sa aton sa sining hilikuton.—Mat. 28:18-20.
5 Paagi sa kongregasyon, nagabaton kita sing adlaw-adlaw nga mga pangpalig-on nga ‘nagapukaw sa aton sa gugma kag maayong mga buhat.’ (Heb. 10:24, 25) Ginapabakod kita nga mabatas ang mga pagtilaw sing matutom. Ang mahigugmaon nga mga manugtatap nagabulig sa aton sa paglandas sang mga pag-ipit kag mga kabalaka. (Manugw. 4:9-12) Ginahatagan kita sing kinahanglanon nga laygay kon yara kita sa katalagman nga magtalang. Ano pa nga organisasyon ang nagaaman sinang mahigugmaon nga pag-atipan?—1 Tes. 5:14.
6 Kabubut-on ni Jehova nga magpabilin kita nga suod sa iya organisasyon sa pag-amlig sang aton paghiusa. (Juan 10:16) Ang isa ka paagi nga ginabuligan kita sang kongregasyon sa pagpabilin nga nagapakig-angot sa matutom nga ulipon nga klase amo ang pagpadala sing nagalakbay nga mga manugtatap para palig-unon kita. Ang paghulag naton sa mahigugmaon nga panuytoy nagaganyat sa aton sing tingob sa pagkasuod nga nagabulig agod huptan kita nga mabakod sa espirituwal.
7 Ang kongregasyon kinahanglanon sa aton espirituwal nga kaluwasan. Imposible maalagad si Jehova sing kalahamut-an nga nahamulag sa sini. Busa, magpabilin kita nga suod sa kon ano ang ginaaman ni Jehova. Kabay nga magapanghikot kita nahisanto sa mga tulumuron sini kag hanuot nga iaplikar ang laygay nga mabaton naton didto. Amo lamang ini ang paagi nga mapakita naton kon daw ano gid ka importante ang kongregasyon sa aton.—Sal. 27:4.