Dayawa si Jehova Adlaw-adlaw

¹ Ang aton Dios, nga si Jehova, amo ang Tuburan sang tanan nga kabuhi kag kalipay. Takus sia nga dayawon sang tanan niya nga tinuga. Sing indibiduwal, handum naton nga makasiling kaangay sang salmista: “Magadayaw ako sa imo sing labi kag labi pa. Ang akon baba magasugid sang imo pagkamatarong, sang imo kaluwasan sa bug-os nga adlaw.” (Sal. 71:​14, 15) Agod mahimo ini, dapat kita mangita sing mga paagi nga madayaw si Jehova sa adlaw-adlaw.

² Ang unang mga Cristiano nagpahamtang sing maayo nga halimbawa sa pagdayaw kay Jehova. Nahanungod sa 3,000 nga ginbawtismuhan sadtong Pentecostes, ang Binuhatan 2:​46, 47 nagasiling: “Sa adlaw-adlaw nag-alagad sila sing tayuyon sa templo nga may paghiusa . . . nga nagadayaw sa Dios kag nakasapo sing kahamuot sa tanan nga katawhan.” Natun-an nila ang makatilingala nga mga kamatuoran nahanungod kay Jehova kag sa iya Mesias. Ang ila kalipay nagpalig-on sa iban pa nga mamati kag magtuon kag dayawon si Jehova.

³ Ang mga Kahigayunan Matigayon Kada Adlaw: Nasapwan sang madamo sa karon nga mahimo nila madayaw si Jehova sa adlaw-adlaw paagi sa di-pormal nga pagpanaksi. Ang abanse nga pagplano nagabulig sa ila nga mangin mas mapatubason. Nasapwan sang isa ka utod nga babayi nga namat-od nga makigbahin sa di-pormal nga pagpanaksi nga may nagbuka sang iya duha ka bintana kag nangawat sa iya salakyan. Nanawag sia sing manugkay-o kag nian naghanda sa pagpanaksi sa iya. Lakip sa iya paghanda amo ang pagpangamuyo sing panuytoy ni Jehova. Ginpanaksihan niya ang manugkay-o sing salakyan sa isa ka oras kag nakapahamtang sing Mabuhi sing Dayon nga libro sa iya.

⁴ Masunson masumalang sang isa pa ka utod nga babayi ang iya kaingod samtang ginadayandayan nila ang ila mga ido. Isa ka adlaw, ginhambalan nila ang nahanungod sa mga problema sa kabuhi, kag nagdul-ong yadto sa dugang pa nga paghambalanay. Sang ulihi, isa ka pagtuon sa Biblia ang ginsugdan. Sing makawiwili, ang kaingod nagtu-ad sang ulihi nga indi gid sia kuntani magapamati sa mga Saksi ni Jehova kon nagduaw sila sa iya ganhaan, kay wala sia nagapati sa Dios ukon sa Biblia.

⁵ Ang iban nakapanaksi sa mga ahente nga nagaduaw sa ila ganhaan. Ang isa ka utod nga babayi sa Ireland ginduaw sang isa ka tawo nga nagabaligya sing paseguro. Ginpaathag niya nga nagalaum sia nga maagom ang kabuhi nga walay katapusan. Bag-o ini para sa sining Romano Katoliko nga tawo. Ginbaton niya ang Mabuhi sing Dayon nga libro, nagtambong sa miting pagkadason nga semana, kag nagpasugot sa pagtuon sa Biblia. Karon ining ahente isa na ka bawtismado nga utod.

⁶ Mangin alisto kita tanan sa mga kahigayunan nga madayaw si Jehova sa adlaw-adlaw. Ibutang ang pila ka magasin ukon tract sa lugar nga madali makit-an kag itanyag ini sa mga bisita. Ginatungtong sang pila ka Saksi nga mga pamatan-on sa eskwelahan ang literatura tuhoy sa Biblia sa ila lamesa subong isa ka paagi agod masugdan ang pagpakighambal sa isa nga nakatalupangod sini kag nagapamangkot. Dumduma ang isa ukon duha ka teksto sa Kasulatan nga sarang mo magamit. Mangayo sing bulig kay Jehova. Pagapakamaayuhon ikaw tungod sang paghimo sini.​—1 Juan 5:14.