Ipadayag ang Imo Pag-uswag
1 Hinumduma ang tion nga una mo nga nabatian ang mensahe sang Ginharian. Ginpukaw sang simple nga mga kamatuoran ang imo paghandum sing ihibalo. Sang ulihi nakita mo ang kinahanglanon nga maghimo sing mga pagbalhin sa imo kabuhi agod masunod ang mataas nga mga talaksan ni Jehova. (Isa. 55:8, 9) Nag-uswag ka, nagdedikar sang imo kabuhi, kag nagpabawtismo.
2 Bisan sa tapos makahimo sing mga pag-uswag, may mga kaluyahon gihapon nga dapat landason. (Roma 12:2) Ayhan nahadlok ka sa tawo, nga bangod sini nagapangalag-ag ka sa pagpakigbahin sa pag-alagad sa latagon. Ukon ayhan wala mo ginapakita ang bunga sang espiritu sang Dios. Apang determinado ka nga mag-uswag paagi sa pagpahamtang sing teokratikong mga tulumuron para sa imo kaugalingon.
3 Ayhan pila ka tuig na ang nagligad kutob sang nagdedikar ka. Sa paghinumdom, ano na nga pag-uswag ang nahimo mo? Natigayon mo bala ang pila sang imo mga tulumuron? May amo gihapon bala ikaw nga kakugi “sa pamuno”? (Heb. 3:14) Si Timoteo isa na ka hamtong nga Cristiano sang ginlaygayan sia ni Pablo: “Binagbinaga ining mga butang; ukuri ini, agod nga ang imo pag-uswag mapadayag sa tanan.”—1 Tim. 4:15.
4 Kinahanglan ang Personal nga Pag-usisa: Kon aton ginabinagbinag ang aton nagligad nga dalanon, yara bala gihapon ang aton pila ka kaluyahon sang nagsugod kita? Nalugaw-an bala kita sa paglab-ot sa pila sang mga tulumuron nga ginpahamtang naton? Kon amo, ngaa? Walay sapayan nga maayo ang aton mga tinutuyo, ayhan hungod naton ini nga ginpalantang. Ayhan gintugutan naton ang mga kabalaka sa kabuhi sa pagpugong sa aton.—Luc. 17:28-30.
5 Walay sapayan nga indi naton mabag-o ang nagligad, may mahimo gid kita tuhoy sa palaabuton. Sarang naton mahibaluan kon diin kita nagkulang, kag nian makapanikasog sing hanuot sa pag-uswag. Ayhan dapat naton pauswagon ang pagpakita sing mga bunga sang espiritu sang Dios, subong sang pagpugong sa kaugalingon ukon pagkamabinatason. (Gal. 5:22, 23) Kon nabudlayan kita sa pagpakigkooperar sa mga gulang, dapat naton palambuon ang pagkamapainubuson kag pagpaubos sang hunahuna.—Filip. 2:2, 3.
6 Mapadayag bala naton ang aton pag-uswag paagi sa paglab-ot sa mga pribilehiyo sa pag-alagad? Paagi sa dugang pa nga panikasog ang mga kauturan nga lalaki mahimo makalipikar subong ministeryal nga mga alagad ukon mga gulang. Madamo sa aton ang makapalista subong regular ukon auxiliary payunir. Ang iban mahimo manikasog nga mapauswag ang mga batasan sang personal nga pagtuon ukon makigbahin sing kapin pa sa mga miting sang kongregasyon.
7 Sa pagkamatuod, ang kada isa sa aton amo ang dapat mamat-od kon diin kita dapat mag-uswag. Makapat-od kita nga ang aton hanuot nga panikasog nga “magpadayon sa pagkahamtong” magadugang sing daku sa aton kalipay.—Heb. 6:1.