Magpamulong sing Masidla
1 Sining ulihi nga mga tinuig nasapwan sang mga manugbantala sa pila ka lugar nga labi pa gid nga nagabudlay nga masugilanon ang mga tawo sa ila puluy-an. Madamo ang nagareport nga sa ila teritoryo kapin sa 50 porsiento sang mga tawo ang wala sa balay kon magpamalaybalay sila.
2 Sang tinuig nga nagliligad madamo nga tawo ang makita sa puluy-an kon Domingo, kay ginkabig ini subong isa ka adlaw sang pahuway. Nagbag-o ang kinabatasan. Kinaandan na karon para sa mga tawo ang magpamugon, mag-atipan sang mga kinahanglanon sang pamilya subong sang pagpamalaklon, ukon ang maglingawlingaw, nga nagapahilayo sa ila sa balay. Gani bisan kon Domingo, nangin problema ang pagpakigsugilanon sa mga tawo sa pamalaybalay.
3 Sanglit ang aton tulumuron amo ang magpakigsugilanon sa mga tawo, ngaa indi pagsugilanunon yadtong makita naton—sa mga dalan, sa merkado, ukon sa ulubrahan. Kinabatasan ni Pablo nga palapitan “yadtong natabuan nga malapit” agod panaksihan sila. (Binu. 17:17) Isa gihapon ini ka epektibo nga dagway sang pagpanaksi sa aton adlaw.
4 Kon nagapamalaybalay, masunson kita makakita sing mga tawo nga nagalabay ukon ayhan may ginahulat. Sa matahom nga adlaw, ayhan nagalingkod sila sa isa ka bangko sa parke ukon nagaobra ukon nagalimpyo sang ila salakyan. Ang isa ka mainabyanon nga yuhum kag panamyaw mahimo nga amo lamang ang ginakinahanglan sa pagsugod sing isa ka paghambalanay. Kon malapit lang ang ila balay, mahimo naton mahinambitan nga ayhan wala lang naton sila maabtan sa ila puluy-an kag karon nalipay kita nga may kahigayunan nga masugilanon sila. Paagi sa pagpakita sing diutay pa nga kasidla, madamo ang nakatigayon sing makaalayaw nga mga eksperiensia.
5 Ang Kasidla May mga Resulta: Ang isa ka utod nga lalaki nagpanaysayon nga ginapalapitan niya ang mga tawo nga nagatindog, nagahulat sing bus, nagadayandayan, ukon nagapungko sa ila salakyan. Nga may mainabyanon nga yuhum kag masinadyahon nga tingog, nagahulag sia kaangay sang isa ka mainabyanon nga kaingod nga luyag lamang makigsugilanon. Sa sining paagi nakapahamtang sia sing madamo nga literatura kag nakasugod man sing pila ka mga pagtuon sa Biblia.
6 Ang isa pa ka utod nga lalaki kag ang iya asawa nagapamalaybalay sang nasugata nila ang isa ka babayi nga nagabitbit sing daku nga puyo sang mga groseriya. Nakigsugilanon sila, gindayaw sia bangod sang pag-aman sa mga kinahanglanon sang iya pamilya. “Apang sin-o,” pamangkot nila, “ang makahatag sang mga kinahanglanon sang katawhan?” Nagpukaw ina sang interes sang babayi. Ang isa ka malip-ot nga paghambalanay nagdul-ong sa isa ka imbitasyon sa iya puluy-an, diin isa ka pagtuon sa Biblia ang ginsugdan.
7 Gani sa masunod nga tion nga nagapanaksi ka sa pamalaybalay, Domingo man ukon bisan anong iban pa nga adlaw, kag masapwan mo nga ang mga tawo wala sa balay, ngaa indi magtipon sing diutay pa nga kasidla kag sugilanunon ang mga tawo nga masumalang mo—sa dalan ukon sa iban pa nga lugar? (1 Tes. 2:2) Ayhan matigayon mo ang mas mabungahon nga ministeryo, kag maagom ang daku pa nga kalipay sa imo pag-alagad.