Ginagamit Mo Bala sing Husto ang Pulong sang Dios?

¹ Si Jesucristo amo ang pinakabantog nga manunudlo nga nagkabuhi sa duta. Natandog niya ang tagipusuon sang tawo, napukaw ang ila mga balatyagon, kag napahulag sila sa maayong mga buhat. (Mat. 7:​28, 29) Pirme niya gingamit ang Pulong sang Dios subong sadsaran para sa iya panudlo. (Luc. 24:​44, 45) Nagpahamtang si Jesus sing labing maayo nga halimbawa para sa iya mga sumulunod paagi sa husto nga paggamit sang Pulong sang Dios.​—2 Tim. 2:15.

² Si apostol Pablo isa man ka tumalagsahon nga halimbawa sang paggamit sing epektibo sang Pulong sang Dios. Wala lamang niya ginbasa ang Kasulatan sa iban; ginpaathag kag nangatarungan sia sa ginbasa niya, naghatag sing pamatuod gikan sa Pulong sang Dios nga si Jesus amo ang Cristo. (Binu. 17:​2-4) Subong man, si disipulo Apolos “sampaton sa Kasulatan,” kag gingamit niya ini sing husto sa pagpahayag sang kamatuoran.​—Binu. 18:​24, 28.

³ Mangin Manunudlo sang Pulong sang Dios: Ang modernong-adlaw nga mga manugbantala sang Ginharian nakaagom sing dakung kadalag-an sa pagtudlo sa mga tawo paagi sa pagpatuhoy kag sa pagpangatarungan gikan sa Biblia. Sa isa ka hitabo, gingamit sang isa ka utod nga lalaki ang Ezequiel 18:4 kag ang may kaangtanan nga mga teksto sa pagpangatarungan sa isa ka pastor kag sa tatlo niya ka parokyano nahanungod sa kapalaran sang mga malauton kag sang mga matarong. Subong resulta, ang pila ka katapo sang iglesia nagsugod sa pagtuon, kag sang ulihi ginbaton sang isa sa ila ang kamatuoran. Sa isa pa ka hitabo, ang isa ka utod nga babayi ginpangabay nga paathagan ang nagapamatok nga bana sang isa ka interesado kon ngaa wala nagasaulog sing Krismas kag mga kaadlawan ang mga Saksi ni Jehova. Samtang ginabasa niya ang Makasulatanhon nga mga sabat sing direkta gikan sa Reasoning nga libro, ang tawo nagpabutyag sang iya pag-ugyon. Nalipay gid ang iya asawa nga nakasiling sia: “Matambong kami sa inyo mga miting.” Kag ang bana nagpasugot!

⁴ Gamita ang Bulig nga Matigayon: Ang Aton Ministeryo sang Ginharian kag ang programa sa Miting sa Serbisyo nagabulig sa aton sa paggamit sang Pulong sang Dios. Madamong manugbantala ang nagpabutyag sing apresasyon sa nanuhaytuhay nga mga presentasyon nga ginbalhag kag ginpasundayag para sa aton kaayuhan. Ang Reasoning From the Scriptures nagaunod sing madamong panugda sa kon paano ipaathag sing husto ang kapin sa 70 ka pangunang tema gikan sa Pulong sang Dios. Ang Ihibalo nga Nagadul-ong sa Kabuhi nga Walay Katapusan nagaaman sing malip-ot nga sumaryo sang tanan nga sadsaran nga mga panudlo sa Biblia nga dapat mahangpan sang mga bag-uhan. Ang Study 24 kag 25 sang Theocratic Ministry School Guidebook nagapakita sa aton kon paano mapakilala, mabasa, kag maaplikar sing nagakaigo sang lantip nga mga manunudlo ang mga kasulatan. Dapat naton gamiton sing maayo ining tanan nga bulig nga madali naton matigayon.

⁵ Kon ginagamit naton sing husto ang Pulong sang Dios, masapwan naton nga ini “buhi kag gamhanan . . . kag may ikasarang sa paghantop sang mga hunahuna kag mga tinutuyo sang tagipusuon” sang mga ginabantalaan naton. (Heb 4:12) Ang kadalag-an nga maagom naton sa sini magapahulag sa aton nga ipamulong ang kamatuoran sing labi pa kasidla!​—Binu. 4:31.