Ang Tanan Nga Sahi Sang Tawo Maluwas
1 Kabubut-on ni Jehova “nga ang tanan nga tawo maluwas kag makadangat sa sibu nga ihibalo sang kamatuoran.” (1 Tim. 2:4) Bisan pa nga ang mga tawo naimpluwensiahan sa pila ka kasangkaron sang ila pinanubli kag palibot, makapamat-od sila kag sarang makapili sing indibiduwal kon paano nila gamiton ang ila kabuhi. (Mat. 7:13, 14) Paano ini makaapektar sa aton pagtamod sa mga tawo nga aton ginabantalaan?
2 Indi kita dapat maghaumhaum nga ang interes sang isa ka tawo sa kamatuoran ginadiktahan sang iya pungsudnon ukon kultural nga ginhalinan ukon sang posisyon sa katilingban. Ang kamatuoran mahimo makaganyat sa mga may diutay man ukon mataas nga edukasyon, sa mga yara sa politika, kag sa mga propesyonal, mga ateista, kag bisan sa kilala nga mga nagahimo sing kalainan. Ginbag-o sang mga tawo gikan sa tanan nga ginhalinan kag tindog sa katilingban ang ila anay paggawi kag nagapaabot na karon sing kabuhi sa bag-ong kalibutan sang Dios. (Hulu. 11:19) Gani, indi kita dapat mangalag-ag sa pagpalapit sa mga tawo sang tanan nga sahi sang pangabuhi nga dala ang mensahe sang Ginharian.
3 Binagbinaga Ining mga Halimbawa: Isa ka tawo ang nagbuko nga patyon ang iya tiyo apang wala niya mahimo. Sang ulihi namat-od sia sa paghikog apang wala man niya ini madayon. Pagkatapos nabilanggo bangod sang pagpangawat kag pagbaligya sing droga, ang iya pag-asawahay naguba. Karon may malipayon na sia nga pag-asawahay kag may maayo man nga kaangtanan sa iya tiyo. Ano ang natabo? Nagtuon sia sing Biblia upod sa mga Saksi ni Jehova kag gin-aplikar niya ang iya natun-an. Wala sia pagkabiga ni Jehova nga indi na matubos.
4 Ang kabantugan sang isa ka lamharon nga babayi subong artista sa telebisyon wala magpahalipay sa iya. Apang, bangod nahamuot sa maayong pagginawi sa moral sang mga Saksi, ginbaton niya ang isa ka pagtuon sa Biblia, kag wala madugay nagbantala na sia sa iban. Bisan diin man sia magkadto sa pagministeryo sa pamalaybalay nakilal-an sia, apang ginpaathag niya nga luyag niya makilal-an subong isa sang mga Saksi ni Jehova sa baylo nga isa ka artista.
5 Sang ginsugdan sang isa ka Saksi ang pagtuon sa Biblia upod sa isa ka manugsuskriber sang Lalantawan, nabatian ini sang kaingod kag nagtambong sa pagtuon. Gilayon nga nakilala sang kaingod ang kamatuoran nga madugay na niya ginapangita! Ginkanselar nila sang iya bana ang dekrito sang diborsio nga ginhatag sa ila kag nag-uliay sila. Nadalahig sia sa astrolohiya kag nagapakig-upod sa isa ka kulto sang mga espiritista, apang gilayon niya nga ginpanghaboy ang iya malahalon nga mga libro kag ang tanan pa nga iban nga ginapanag-iyahan niya nga may kaangtanan sa demonismo. Wala madugay nagtambong sia sa mga miting kag nagsugid sa iya mga himata kag mga abyan nahanungod sa iya bag-ong nasapwan nga kamatuoran. Karon mapagsik sia nga nagapanaksi sa iban.
6 Indi naton dapat paghukman ang iban. Sa baylo, ipaambit naton ang maayong balita sa mga tawo bisan diin. Makasalig kita nga si Jehova, nga “nagatan-aw sa tagipusuon,” mangin “Manluluwas sang tanan nga sahi sang tawo.”—1 Sam. 16:7; 1 Tim. 4:10.