Tudlui Ang Iban Sang Ginapatuman Sang Dios
1 Madamo gihapon nga tawo sa karon ang wala ‘makabati sang mga pulong ni Jehova.’ (Amos 8:11) Bisan pa nga ang iban nagapati nga ang Dios nagaluntad, wala sila makahibalo sang iya katuyuan kag mga ginapatuman. Busa, kinahanglan naton sila tudluan sang kamatuoran tuhoy sa Ginharian. Paagi sa maayo nga pagsangkap kag paghanda nga makapanaksi sa tanan nga kahigayunan, malab-ot naton ang mga maluyag makatuon sang ginapatuman ni Jehova.
2 Sa Abril kag Mayo, may yara kita suno-sa-tion nga mga guwa sang Ang Lalantawan kag Magmata! nga mapanagtag. Dugang pa, sa nahauna nga tion, gamiton naton ang brosyur nga Ano ang Ginapatuman sang Dios sa Aton? Ang matahom nga mga laragway kag nagapahunahuna nga mga pamangkot sini nagaganyat sa tanan nga sahi sang tawo. Ang masunod nga mga panugda ginahatag agod buligan kita nga magamit sing epektibo ang aton mga publikasyon.
3 Pagpangita sa mga Tawo: Sa mga lugar diin madamo nga tawo ang wala sa balay kon magpamalaybalay kita, mapuslanon nga pangitaon kag hambalon ang mga tawo diin man sila makita. Ang suplemento sang Septiembre 1996 sang Ang Aton Ministeryo sa Ginharian nagapalig-on sa aton nga ibantala ang maayong balita bisan diin—sa dalan, sa publiko nga transportasyon, kag sa mga parke, mga paradahan sang salakyan, kag sa mga duog sang negosyo. Nagtiklod man ini sa aton nga hunahunaon ang kinahanglanon nga magpautwas sing mga kahigayunan nga makapanaksi sing dipormal. Subong isa ka halimbawa sa sini, isa ka payunir nga utod nga babayi ang nagkadto sa zoo kag nagdala sing suplay sang Agosto 8, 1996 nga Awake! nga may mga serye nga “Endangered Species—Why Be Concerned?” Sa sulod sang isa ka oras, nakapahamtang sia sing 40 ka kopya sa tuman ka mainapresyahon nga mga maluyagon sa sapat! Ang Lalantawan kag Magmata! subong man ang Ginapatuman nga brosyur labi na nga nagakaigo sa tanan nga sahi sang pagpanaksi, kay nagaunod ini sing mga impormasyon nga nagaapektar sa kabuhi sang mga tawo kag nagapukaw sang ikasarang sa paghunahuna.
4 Pagsugod sing mga Paghambalanay: Ginapaathag sa likod nga pahina sang Oktubre 1996 nga Ang Aton Ministeryo sa Ginharian kon paano maghanda sing imo kaugalingon nga mga presentasyon para sa Lalantawan kag Magmata! nga mga magasin. Magamit man ini nga mga panugda kon nagahanda sing imo presentasyon para sa Ginapatuman nga brosyur. Ang aton komento mahimo nga pila ka dinalan ukon hustuhan lamang sing kalabaon agod malakip ang isa ka punto sa Kasulatan. Ang introduksion importante nga pilion sing maayo, kay amo ini ang magapat-od kon bala mamati pa ang tawo. Ang pila nangin madinalag-on paagi sa sining nagabukas nga komento: “Nakabasa ako sing artikulo nga makapalig-on gid sa akon, kag luyag ko ini nga ipaambit sa imo.” Ukon, mahimo mapautwas ang isa ka makawiwili nga pamangkot agod maganyat ang tawo nga makighambal.
5 Kon nagakabagay sa inyo lugar, mahimo nimo tilawan nga ipamangkot ang masunod sa imo mga presentasyon sini nga bulan:
◼ “Madamo kita karon sing makita nga graffiti, sagbot, ukon polusyon. Ano sa banta mo ang kinahanglan agod matinluan ang duta kag himuon ini nga isa ka mas maayo nga duog puy-an?” Pahanuguti sia sa pagsabat, kag nian hinambiti nga may impormasyon ka nga nagapaathag kon paano kag kon san-o ang duta mangin isa ka tugob-globo nga hardin. Ipakita ang isa ka espesipiko nga komento, isa ka malip-ot nga kasulatan, kag isa ka maduagon nga laragway gikan sa magasin, kag nian itanyag ini sa iya. Antes tapuson ang hambalanay, maghimo sing kahimusan nga makaduaw liwat.
◼ “Sa banta mo gintuyo bala sang Dios nga magkabuhi kita nga napalibutan sing mga problema subong sa kahimtangan naton karon?” Sa tapos sia makasabat, mahimo ka makasiling: “Ayhan pamilyar ka sa pangamuyo nga gintudlo ni Jesus sa iya mga sumulunod, nga nagapangabay nga magkari ang Ginharian sang Dios. Nabinagbinag mo na bala kon ano gid ang Ginharian sang Dios?” Buksi ang leksion 6 sa Ginapatuman nga brosyur, kag basaha ang mga pamangkot sa panugod sang leksion. Nian, samtang ginabasa mo ang parapo 1, ipakita ang sabat sa nahaunang pamangkot. Ipaathag nga ang iban pa nga mga pamangkot ginasabat man sing malip-ot. Itanyag ang brosyur, kag magpanugda nga magaduaw liwat nga may dugang pa nga impormasyon tuhoy sa Ginharian.
◼ “Ginakabig karon sang madamong mahunahunaon nga tawo ang relihion sang kalibutan subong ang ginatunaan sang mga problema sang tawo sa baylo nga ang solusyon. Ano ang opinyon mo tuhoy sina?” Pagkatapos mabatian ang iya panghunahuna, ipakita gikan sa isa sang bag-ong mga magasin ang pila ka butang nga mahimo makaganyat sang iya interes tuhoy sa kapaslawan sang butig nga relihion. Pamangkuta sia kon bala luyag niya ini basahon. Pangilalaha sia, kag magsiling nga magakitaay kamo liwat agod imo mapaathag kon paano nga wala ginpaslaw sang matuod nga relihion ang katawhan.
◼ “Bangod sang tuman kadamo nga problema sa pagkabuhi sang pamilya sa karon, napaligban mo na bala kon ano ang sekreto sang kalipay sa pamilya?” Maghulat sing sabat, kag nian ipaathag nga ginasugid sang Dios sa Biblia ang tunay nga sekreto sang kalipay sa pamilya. Ayhan mabasa mo ang Isaias 48:17. Nian buksi ang leksion 8 sa Ginapatuman nga brosyur, kag ipakita ang pila ka bersikulo sa Biblia nga nagahatag sing panuytoy para sa tagsa ka katapo sang pamilya. Basaha ang listahan sang mga pamangkot sa pamuno sang leksion. Pamangkuta sia kon luyag niya basahon ang mga sabat. Kon luyag niya, tanyagi sia sing brosyur. Magpanugda sa pagbalik sa lain nga tion agod mahambalan ang dugang pa praktikal nga panuytoy para sa malipayon nga pagkabuhi sa pamilya.
6 Ang suplemento sa Marso 1997 nga Ang Aton Ministeryo sa Ginharian nagapalig-on sa aton nga magtipon sing kasidla agod makaduaw liwat. Ginrekomendar sini ang paggamit sa bag-ong brosyur sa pagsugod sing mga pagtuon sa Biblia, kon indi sa nahauna nga pagduaw, nian sa liwat nga pagduaw. Ang labing daku nga kinahanglanon sang tawo amo ang pagtuon sang ginapatuman sang Dios kag nian ang pag-aplikar sini. (Col. 1:9, 10) Mabuligan gid naton ang iban sa Abril kag Mayo kon matudluan naton sila sang nahibaluan naton tuhoy sa mga ginapatuman ni Jehova para sa kabuhi.—1 Cor. 9:23.