Pagdumala Sing Progresibo Nga Mga Pagtuon Sa Biblia Sa Puluy-an
1 Sa ano magkapareho ang isa ka nars sa Tanzania, ang isa ka bata sa Argentina, kag ang isa ka iloy sa Latvia? Ginareport sang 1997 Yearbook (p. 8, 46, kag 56) nga sila nga tatlo madasig nga nag-uswag sa ila mga pagtuon sa Biblia sa puluy-an, bangod handa sila nga magtuon sing kapin sa kada semana sa Ihibalo nga libro. Ginarekomendar nga kon posible, dapat panikasugan sang mga manugbantala nga hinun-anunan ang isa ka kapitulo sang libro sa kada pagtuon. Apang, nabudlayan ang iban sa sini. Bisan pa nga nasandig ang daku sa mga kahimtangan kag ikasarang sang tagsa ka estudyante, ang eksperiensiado nga mga manunudlo nangin madinalag-on sa paghimo sa masunod nga mga panugda.
2 Suno sa ginpaathag sa suplemento sang Hunyo 1996 nga Ang Aton Ministeryo sa Ginharian, ang imo mga estudyante kinahanglan nga hanason sa paghanda para sa pagtuon. Sa umpisa gid, maayo nga ipaathag kag ipakita kon paano ini himuon. Ipakita sa ila ang imo personal nga kopya sang Ihibalo nga libro. Handai sing magkaupod ang nahauna nga leksion. Buligi ang mga estudyante sa pagpangita sa yabi nga mga tinaga ukon mga dinalan nga nagasabat sing direkta sa naimprinta nga pamangkot kag nian kuritan ukon markahan ini. Ginahatagan pa gani sang iban nga manugbantala ang ila mga estudyante sing magamit nga inugtanda. Palig-una sila nga tan-awon ang tanan nga kasulatan samtang nagahanda sila para sa pagtuon. Paagi sa sini, ginahanas mo man sila sa paghanda para sa pagtambong sa Pagtinuon sang Kongregasyon sa Libro kag sa Pagtinuon sa Lalantawan.—Luc. 6:40.
3 Ginapahambal sang maayo nga manunudlo ang estudyante kag indi nga sia lang ang pirme nga nagahambal. Ginalikawan niya nga maglikday sa magagmay nga mga punto. Talagsa lang niya ginahinambitan ang dugang pa nga materyal. Sa baylo, ginapadaku niya ang pangunang mga punto sang leksion. Ginhatagan sang iban ang mga estudyante sing dugang pa nga literatura agod buligan sila nga makita ang mga sabat sa mga pamangkot. Dugang pa, ang mga interesado makabaton sing dugang pa detalyado nga impormasyon paagi sa pagtambong sa mga miting sa kongregasyon.
4 Indi kinahanglan nga tan-awon ang tanan ginsitar nga kasulatan sa leksion. Ang pila ka pangunang mga punto mahimo ginapaathag sa ginbalikwat nga mga teksto sa parapo. Sa tion sang repaso, ipadaku ang sadsaran nga mga kasulatan nga ginhambalan kag palig-una ang estudyante nga dumdumon ini.
5 Daw Ano Kalawig ang Kada Sesyon?: Ang pagtuon indi kinahanglan nga limitehan sa isa ka oras. Ang pila ka tagbalay may madamo nga oras kag mahimo maluyag nga magtuon sing malawiglawig. Ukon ayhan luyag sang estudyante nga magtuon sing kapin sa makaisa sa isa ka semana. Mabuligon ini para sa mga makahimo sini.
6 Subong sa ginalarawan sa Isaias 60:8, ginatos ka libo ka bag-ong dumalayaw ni Jehova karon ang “nagalupad subong sa panganod, kag subong sa mga tukmo sa ila mga talambuan” sa mga kongregasyon sang iya katawhan. Himuon naton tanan ang aton bahin sa pagpangabudlay sing suod kay Jehova samtang ginapadasig niya ang pagtipon sa mga katulad-karnero.—Isa. 60:22.