Magpakita Sing Matuod Nga Pag-ulikid Sa Tanan Nga Interesado Nga Nakit-an
1 Yadtong sa organisasyon ni Jehova nagapangabudlay nga may pagkahilingagawon. Ang bug-os kalibutan nga pagbantala sa Ginharian malapit na matapos, nga pagkatapos sini ang tanan nga ‘wala makakilala sa Dios’ pagalaglagon. (2 Tes. 1:7-9) Busa, bangod sang matuod nga pag-ulikid sa kabuhi sang iban, ang katawhan ni Jehova ginapahulag nga palab-uton sa madamo kon mahimo pa ang mensahe sang Ginharian.—Sof. 2:3.
2 Kada bulan, minilyon ka oras ang ginahinguyang sa pagpangita sa mga luyag makabati sang “maayong balita tuhoy sa butang nga maayo pa.” (Isa. 52:7) Bilang sabat sa ulihi nga tanyag nga literatura, madamong indibiduwal ang nagbaton sing Ang Lalantawan kag Magmata! ukon sing brosyur nga Ano ang Ginapatuman sang Dios sa Aton? Ang matuod nga pag-ulikid para sa sining mga tawo dapat magpahulag sa aton nga padayon nga palambuon ang tanan nga interes nga nasapwan.—Hulu. 3:27.
3 Maghupot sing Husto nga mga Rekord: Madamo pa ang mahimo paagi sa paghupot sing kompleto kag husto nga rekord sang mga interesado nga makit-an. Ang impormasyon subong sa ngalan kag direksion sang tagbalay, adlaw kag oras sang imo pagduaw, literatura nga napahamtang, kag topiko nga ginhambalan magabulig sa imo nga mangin mas epektibo sa pagbalik. Subong man, kon ginasulat mo ang komento sang tagbalay sa inyo una nga paghambalanay, mahinambitan mo ini samtang ginapadayon mo ang paghambalanay sa pagduaw liwat.
4 Magduaw Liwat sa Gilayon: Pila sa mga nagbaton sing literatura gikan sa imo sang nagligad nga bulan ang ginduaw mo liwat? Nagligad bala ang mga senemana nga wala sing dugang pa nga pagpakigsugilanon? Ang matuod nga pag-ulikid sa ila kaayuhan dapat magpahulag sa imo nga magbalik sa gilayon kon mahimo, ayhan sa sulod sang pila ka adlaw, agod ang paghambalanay mangin lab-as pa sa hunahuna. Paagi sa pagbalik sa gilayon, maupangan mo ang mga panikasog ni Satanas antes sia ‘mag-abot kag magkuha sang pulong nga ginsab-ug sa ila.’—Mar. 4:15.
5 Ang Paghanda Kinahanglanon: Ang imo pagkaepektibo sa mga pagduaw liwat nagasandig sa kon daw ano kaayo ikaw nagahanda. Ang likod nga pahina sang Abril 1997 nga Ang Aton Ministeryo sa Ginharian nagahatag sing pila ka presentasyon nga mahimo magamit kon nagatanyag ka sing mga magasin ukon Ginapatuman nga brosyur. Ang masunod amo ang paghinumdom sa pila ka punto nga mapaambit mo sa imo pagbalik. Ano ang mahimo isiling sa pagtatap sang interes? Paano masugdan ang isa ka pagtuon sa Biblia? Mahimo nimo tilawan ining mga panugda.
6 Kon ginapadayon ang paghambalanay kon ano ang dapat himuon agod tinluan ang duta kag himuon ini nga paraiso, mahimo ka makasiling:
◼ “Sang nagligad ko nga pagduaw, nag-ugyunay kita nga dapat himuon ang lakas nga mga tikang antes ang duta mangin isa ka mahidaiton nga paraiso. Sa banta mo, may ikasarang bala ang mga tawo sa paghimo sini? [Pasabta sia.] Talupangda palihug kon ngaa kinahanglan nga magpasilabot ang Dios sa mga hilikuton sang tawo.” Basaha ang Salmo 37:38. Nian buksi ang leksion 5 sa Ginapatuman nga brosyur, kag gamita ang pinili nga mga bahin sang mga parapo 4-5 agod ipakita kon paano tumanon sang Dios ini nga tagna. Magpadayon paagi sa pagtanyag sing isa ka pagtuon sa Biblia nga nagagamit sa brosyur.
7 Kon ginhambalan ninyo ang Ginharian sang Dios kag nakapahamtang sing “Ginapatuman” nga brosyur sa nahaunang pagduaw, sa pagbalik mahimo nimo ini masiling:
◼ “Sang nagligad naton nga paghambalanay, ginkilala naton ang Ginharian sang Dios subong ang matuod nga gobierno nga magagahom sa bug-os nga duta. Ginapakita sang Biblia nga si Cristo Jesus ang magahari sa sini. May nakita ka bala nga mga benepisyo sa sini nga sahi sang gobierno kag lider?” Pasabta sia. Buksi ang Ginapatuman nga brosyur sa leksion 6. Ginagamit ang mga punto sa mga parapo 6-7 kag ang larawan sa pahina 13, ipakita kon ano ang himuon sang Ginharian sang Dios para sa katawhan. Basaha ang Daniel 2:44, kag kon nagakaigo, ipakita ang Ihibalo nga libro kag magtanyag sing isa ka pagtuon sa Biblia.
8 Kon may nasalapuan ka nga nagaugyon nga ang mga relihion sang kalibutan ang naghatag sing mga problema sa katawhan, mahimo nimo ini mapamangkot sa pagduaw liwat:
◼ “Napaligban mo na bala kon paano naton makilal-an ang relihion nga ginakahamut-an sang Dios? [Pasabta sia.] Ginahatag sining brosyur nga Ano ang Ginapatuman sang Dios sa Aton? ang nagapakilala nga mga tanda sang matuod nga relihion.” Buksi ang leksion 13, kag ipadaku ang lima ka punto sa nagahilay nga mga tinaga sa mga parapo 3-7. Mahimo ka magpadayon paagi sa pagsiling: “Dugang sa pagpangita sa matuod nga relihion, dapat naton hibaluon kon ano ang ginapatuman sang Dios sa aton subong mga indibiduwal.” Basaha ang Juan 4:23, 24. Magpanugda nga ipaathag ini sing dugang. Buksi ang leksion 1 sa brosyur, kag ipasundayag kon paano kita nagatuon.
9 Kon magbalik ka agod padayunon ang paghambalanay tuhoy sa kalipay sa pamilya, mahimo mo masiling ang kaangay sini:
◼ “Sang magkitaay kita primero, ginhambalan naton ang sekreto sang kalipay sa pamilya, nga amo ang pag-aplikar sa laygay nga masapwan sa Biblia. Kon nagatalupangod sa mga kinahanglanon sang isa ka moderno nga pamilya, nagapati ka bala nga ang Biblia karaan na ukon sibu-sa-tion?” Pasabta sia. Itanyag ang Ihibalo nga libro. Buksi sa kapitulo 2, kag basaha ang binalikwat sa parapo 13. Nagagamit sang mga punto sa parapo 3, magtanyag sing isa ka pangpamilya nga pagtuon sa Biblia.
10 Ang Ginapatuman nga brosyur makabulig gid sing daku sa iban nga matun-an ang mga ginapatuman sang Dios. Ang malip-ot kag maathag nga mensahe sini, kag ang matahom nga desinyo sini nagapahapos sang pagsugod sing pagtuon. Sa gilayon kon mahimo, depende sa interes kag ikasarang sang estudyante, ang pagtuon sarang maliton sa Ihibalo nga libro.
11 Himuslan naton ang tanan nga kahigayunan nga ipakita ang matuod nga pag-ulikid sa tanan nga interesado sa aton teritoryo. Paagi sa paghupot sing sibu nga mga rekord, paghanda sing maayo, kag pagbalik sa gilayon mapakita naton ang gugma sa isigkatawo nga magaganyat sa ila sa kamatuoran.—Mat. 22:39; Gal. 6:10.