Mga Miting Nga Nagapukaw Sing Maayong Mga Buhat

¹ Ang duha ka kinahanglanon gid nga bahin sang aton pagsimba amo ang pagtambong sa mga miting sang kongregasyon kag ang pagpakigbahin sa pag-alagad sa latagon. Ang duha magkaupod. Ginaimpluwensiahan sang isa ang isa. Ang Cristianong mga miting nagapukaw sing maayong mga buhat, ang labing maayo sini amo ang pagbantala sing Ginharian kag paghimo sing disipulo nga hilikuton. (Heb. 10:24) Kon mag-untat kita sa pagtambong sa mga miting, sa ulihi magauntat man kita sa pagbantala bangod wala na kita ginapukaw sa paghimo sini.

² Sa semanal nga mga miting, nagabaton kita sing espirituwal nga panudlo nga gindesinyo agod papagsikon kita sa pagbantala. Ang pagkahilingagawon sang tion pirme ginapadaku, nga nagatiklod sa aton nga ibantala sa iban ang nagahatag-kabuhi nga mensahe sang Biblia. Ginapalig-on kag ginapabakod kita nga magbatas sa pagbantala nga hilikuton. (Mat. 24:​13, 14) Paagi sa paghimulos sa mga kahigayunan nga magkomento sa mga miting, mas maanad kita nga ipabutyag ang aton pagtuo sa atubangan sang iban. (Heb. 10:23) Paagi sa pagpalista sa Teokratikong Eskwelahan sa Pagministro, nagabaton kita sing paghanas agod mangin mas epektibo nga mga ministro kag agod mapauswag ang aton mga ikasarang sa pagtudlo.​—⁠2 Tim. 4:⁠2.

³ Kon Paano ang mga Miting sa Serbisyo Nagapukaw sa Aton sa Pagbantala: Tanan kita ginapalig-on nga basahon sing abanse ang materyal sa Ang Aton Ministeryo sa Ginharian. Nian ini nga impormasyon ginapatudok sa aton hunahuna samtang nagatambong kita sa Miting sa Serbisyo kag nagatan-aw sing mga presentasyon nga ginapasundayag gikan sa plataporma. Kon nagaalagad sa latagon, sarang naton liwat mahunahuna Ang Aton Ministeryo sa Ginharian, ginadumdom ang mga presentasyon nga ginpasundayag, kag busa makahatag sing mas epektibo nga panaksi. Naeksperiensiahan ini sang madamo nga manugbantala.

⁴ Bilang dugang pa nga paghinumdom sa mga Miting sa Serbisyo, ang iban nagahimo sing iskedyul upod sa iban nga mag-upuray sa ministeryo. Lab-as pa sa hunahuna sang mga manugbantala ang mga punto nga magamit sa latagon kag ginapahulag sila nga tilawan ini nga gamiton bangod ining mga miting nagpalig-on sa ila nga makigbahin sa pagbantala nga hilikuton kada semana.

⁵ Wala sing tal-us para sa aton Cristianong mga miting, diin nagatipon kita upod sa mga masigkasumilimba kag ginapukaw sa maayong mga buhat. Agod mag-uswag ang aton ministeryo, dapat kita magtambong sing tayuyon sa mga miting sang kongregasyon. Kabay nga magpakita kita sing apresasyon sa sining makalilipay nga aman halin kay Jehova paagi sa ‘indi pagpabaya sang aton pagtilipon sing tingob.’​—⁠Heb. 10:⁠25.