Magtambong sa mga Miting Sing “Labi Na Gid”

¹ Ang pagtipon sing tingob importante pirme para sa katawhan ni Jehova. Ang mga Israelinhon anay may templo kag mga sinagoga subong mga sentro para sa matuod nga pagsimba, sa pagtuon sa Dios, kag sa makalilipay nga paghiliupod. Tungod sini man nga rason nga ang unang mga Cristiano wala magpatumbaya sa pagtipon sing tingob. Samtang nagadamo ang mga pag-ipit kag mga pagtilaw sa sining ital-ital nga katapusan nga mga adlaw, kinahanglan man naton ang espirituwal nga pagpalig-on nga ginahatag sang aton mga miting sa kongregasyon kag kinahanglan naton ini sing “labi na gid.” (Heb. 10:25) Talupangda ang tatlo ka rason kon ngaa nagatambong kita sa mga miting.

² Para sa Paghiliupod: Ang Kasulatan nagalaygay sa aton nga “padayon nga maglinaygayay kag maglinig-unay.” (1 Tes. 5:11) Ang diosnon nga paghiliupod nagapuno sang aton mga painuino sing makapalig-on nga mga panghunahuna kag nagapahulag sa aton sa paghimo sing maayo. Apang kon ihamulag naton ang aton kaugalingon, mahimo naton hunahunaon ang binuang, makagod, ukon imoral pa gani nga mga ideya.​—⁠Hulu. 18:⁠1.

³ Para sa Panudlo: Ang Cristianong mga miting nagaaman sing padayon nga programa sang pagpanudlo sa Biblia nga gindesinyo agod huptan nga buhi sa aton mga tagipusuon ang gugma sa Dios. Nagahatag ini sing praktikal nga panuytoy sa pag-aplikar sang “tanan nga laygay sang Dios.” (Binu. 20:27) Ang mga miting nagahanas sa aton sa arte sang pagbantala kag pagtudlo sing maayong balita, mga ikasarang nga kinahanglan labi na gid karon agod maagom ang dimalaragway nga kalipay sa pagpangita kag sa pagbulig sa mga magabaton sing kamatuoran sang Biblia.

⁴ Para sa Pangamlig: Sa sining malauton nga kalibutan, ang kongregasyon isa ka matuod nga espirituwal nga dalangpan​—⁠dalangpan nga may paghidait kag gugma. Kon nagatambong kita sa mga miting sa kongregasyon, ang balaan nga espiritu sang Dios may makusog nga impluwensia sa aton, nagapatubas sing bunga sang “gugma, kalipay, paghidait, pagbatas, kalulo, kaayo, pagtuo, kalum-ok, pagpugong sa kaugalingon.” (Gal. 5:​22, 23) Ang mga miting nagapabakod sa aton sa pagtindog nga mapag-on kag malig-on sa pagtuo. Nagasangkap ini sa aton nga mangin handa para sa mga pagtilaw sa unahan.

⁵ Paagi sa tayuyon nga pagtambong sa mga miting, maagom naton ang ginalaragway sang salmista, suno sa narekord sa Salmo 133:​1, 3: “Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiusa!” Bisan diin man nagaalagad kag nagatipon sing tingob ang katawhan sang Dios karon, “didto si Jehova nagsugo sang pagpakamaayo, bisan sang kabuhi tubtob sa tion nga walay katubtuban.”