Ikaw Bala May “Ungon sa Unod”?

¹ Luyag gid naton nga tumanon ang aton hilikuton nga pagbantala sing maayong balita tubtob sa labing masarangan naton. Apang, madamo sa aton mahal nga mga kauturan nga lalaki kag babayi ang nabudlayan sa pagpakigbahin sing bug-os bangod sang malubha nga balatian ukon pagkainutil, kag bangod sini indi nila mahimo ang luyag nila. Nabudlayan gid sila sa pagbato sa pagluya sing buot, labi na kon makita nila ang iban sa palibot nila nga aktibo kaayo sa ministeryo.​—⁠1 Cor. 9:⁠16.

² Isa ka Halimbawa nga Ilugon: Dapat batason ni apostol Pablo ang “ungon sa unod.” Makatlo sia nga nakitluoy kay Jehova nga kuhaon ining nagapahanusbo nga sablag, nga sa paglaragway niya “isa ka anghel ni Satanas” ang dalayon nga nagatampa sa iya. Apang, walay sapayan sini, si Pablo nagbatas kag nagpadayon sa iya ministeryo. Wala niya ginkaluuyan ang iya kaugalingon ukon nangin reklamador. Ginhimo niya ang bug-os niya nga masarangan. Ang sekreto sang iya kadalag-an sa pagbatas amo ining pasalig halin sa Dios: “Ang akon dibagay nga kaayo nagakaigo na para sa imo; kay ang akon gahom ginapahimpit sa kaluyahon.” Ang kaluyahon ni Pablo nangin isa ka kusog sang natun-an niya nga batunon ang iya kahimtangan kag magsalig kay Jehova kag sa balaan nga espiritu agod makabatas.​—⁠2 Cor. 12:​7-10.

3 Kon Paano Ka Makabatas: Ang tawhanon bala nga kahuyangon nagalatid sang imo pag-alagad sa Dios? Kon amo, iluga ang panimuot ni Pablo. Bisan pa nga ang imo balatian ukon masakit indi na mabulong sa sining sistema sang mga butang, makasalig ka sing bug-os kay Jehova, nga nakahangop sang imo mga kinahanglanon kag magahatag sing “kusog nga labaw sa kinaandan.” (2 Cor. 4:7) Himusli ang bulig nga imo matigayon sa kongregasyon, nga wala nagahamulag sang imo kaugalingon. (Hulu. 18:1) Kon nabudlayan ka sa pagpakigbahin sa pamalaybalay nga hilikuton, mangita sing praktikal nga mga paagi agod makapanaksi sing dipormal ukon sa telepono.

⁴ Bisan pa nga ang ungon sa unod mahimo nga magalatid sang imo masarangan nga himuon sa ministeryo, indi ka dapat magbatyag nga wala ka nagapakigbahin sa ministeryo. Kaangay ni Pablo, ‘makapanaksi [man ikaw] sing bug-os sa maayong balita sang dibagay nga kaayo sang Dios,’ nagahimo sang kon ano ang ginatugot sang imo kusog kag kahimtangan. (Binu. 20:24) Samtang nagapanikasog ka sa paghimo sang imo ministeryo, dumduma nga nahamuot gid si Jehova.​—⁠Heb. 6:⁠10.