Pag-atipan sa mga Pagkabutang Sang Agalon

¹ Sadtong panahon sang Biblia, ang tulugyanan may masaligan nga katungdanan. Ginsugo ni Abraham ang iya tulugyanan nga pangitaan sing asawa ang iya anak, nga si Isaac. (Gen. 24:​1-4) Sa katunayan, ang tulugyanan amo ang may salabton sa pagpat-od nga ang kaliwat ni Abraham magpadayon. Daku gid nga salabton! Indi katingalahan nga si apostol Pablo nagsiling: “Ang ginapangita sa mga tulugyanan amo nga ang isa ka tawo masapwan nga matutom”!​—⁠1 Cor. 4:⁠2.

Ang Cristianong Pagkatulugyanan

² Ang pila ka bahin sang Cristianong ministeryo ginalaragway sa Biblia subong mga pagkatinugyanan. Halimbawa, si apostol Pablo nagpamulong sa mga taga-Efeso tuhoy sa “pagkatinugyanan sang dibagay nga kaayo sang Dios nga ginhatag sa akon nga sa inyo.” (Efe. 3:​2; Col. 1:25) Ginkabig niya ang sugo nga dalhon ang maayong balita sa mga pungsod subong pagkatinugyanan nga dapat niya himuon sing matutom. (Binu. 9:​15; 22:21) Si apostol Pedro nagsulat sa iya hinaplas nga mga kauturan: “Magmaabiabihon kamo sa isa kag isa nga walay pagkumod. Suno sa hiyas nga nabaton sang kada isa, gamita ini sa pag-alagad sa isa kag isa subong maayong mga tulugyanan sang dibagay nga kaayo sang Dios nga ginpakita sa lainlain nga paagi.” (1 Ped. 4:​9, 10; Heb. 13:16) Ang bisan ano man nga materyal nga ginapanag-iyahan sadtong unang-siglo nga mga Cristiano resulta sang dibagay nga kaayo ni Jehova. Busa, mga tinugyanan sila sadto nga mga butang kag dapat nila ini gamiton sa Cristianong paagi.

³ Sa karon, ang mga Saksi ni Jehova may amo man nga pagtamod sa mga bagay. Gindedikar nila ang ila kaugalingon kay Jehova nga Dios kag ginkabig ang tanan nga ginapanag-iyahan nila​—⁠ang ila kabuhi, ang ila pisikal nga kusog, ang ila materyal nga mga pagkabutang​—⁠subong mga bunga sang “dibagay nga kaayo sang Dios nga ginpakita sa lainlain nga paagi.” Subong maayong mga tulugyanan, may salabton sila kay Jehova nga Dios sa kon paano nila ginagamit ini nga mga butang. Isa pa, ginhatagan sila sing ihibalo tuhoy sa maayong balita. Isa man ini ka gintulin nga butang nga luyag nila gamiton sa pinakamaayo gid nga paagi: ang pakadakuon ang ngalan ni Jehova kag buligan ang iban nga makahibalo sang kamatuoran.​—⁠Mat. 28:​19, 20; 1 Tim. 2:​3, 4; 2 Tim. 1:​13, 14.

⁴ Paano ginahimo sang mga Saksi ni Jehova ang ila mga responsabilidad subong mga tulugyanan? Ginapakita sang tuigan nga report sang nagligad nga tuig lamang, sa bug-os nga kalibutan naghinguyang sila sing kapin sa isa ka bilyon ka oras nga nagabantala sing “maayong balita sang ginharian” kag nagdumala sing kapin sa 4,500,000 ka pagtuon sa Biblia sa puluy-an upod sa mga interesado. (Mat. 24:14) Ginpakita man nila ang ila katutom subong mga tulugyanan ni Jehova paagi sa ila maalwan nga mga amot sa bug-os kalibutan nga hilikuton kag sa pagsuporta sa lokal nga mga Kingdom Hall, paagi sa ila pagkamaabiabihon sa nagalakbay nga mga manugtatap kag sa iban pa, kag paagi sa ila dikinaandan nga kaayo sa mga nagakinahanglan sing daku​—⁠subong sang mga biktima sang mga inaway. Subong isa ka grupo, ginaatipan sing maayo sang matuod nga mga Cristiano ang mga pagkabutang sang Agalon.

“Ang Matutom nga Tulugyanan, ang Isa nga Mainandamon”

⁵ Ang pagkatulugyanan indi lamang sa indibiduwal nga paagi kundi sa organisasyon man. Gintawag ni Jesus ang hinaplas nga Cristianong kongregasyon sa duta nga “ang matutom nga tulugyanan, ang isa nga mainandamon.” (Luc. 12:42) Ang responsabilidad sining “matutom nga tulugyanan” amo ang pag-aman sing “pagkaon” kag ang pagpanguna sa internasyonal nga pagbantala sing maayong balita. (Bug. 12:17) May kaangtanan sa sini, ang matutom nga tulugyanan nga klase, nga ginatiglawas sang Nagadumala nga Hubon, may hatag-Dios nga salabton kon paano gamiton sing nagakaigo ang materyal kag espirituwal nga “mga talanton” sini. (Mat. 25:15) Nahisuno sa halimbawa sang “matutom nga tulugyanan,” ang tagsa ka korporasyon sang sanga nagapanikasog nga gamiton ang tanan pinansial nga amot sing maalamon, sa pagpauswag sang mga intereses sang Ginharian. Ining tanan nga donasyon ginhatag nga may pagsalig, kag “ang matutom nga tulugyanan, ang isa nga mainandamon” amo ang may salabton sa pagpat-od nga ginagamit ini suno sa katuyuan sini kag ginaatipan ini sing maalamon, sing makinuton, kag sing epektibo.

⁶ Ang isa ka halimbawa sang maalamon nga paggamit sa gin-amot nga mga pundo makita sa pag-uswag sa hilikuton nga pag-imprinta sang mga Saksi ni Jehova sa sining ika-20 nga siglo. Ang pagpanagtag sa mga Biblia subong man sa mga literatura sa Biblia​—⁠mga magasin, libro, brosyur, bukleta, ­tract, kag Kingdom News​—⁠daku ang nabulig sa paglapnag sing “maayong balita” sa sining “katapusan nga mga adlaw.” (Mar. 13:​10; 2 Tim. 3:1) Kag ang magasin nga Lalantawan nangin panguna nga instrumento sa paghatag sing “pagkaon sa nagakaigo nga tion” sa “panimalay sang Dios” kag sa ila mga kaupdanan, ang “dakung kadam-an” sang “iban nga mga karnero.”​—⁠Mat. 24:​45; Efe. 2:​19; Bug. 7:​9; Juan 10:⁠16.

⁷ Sang una, ang tanan nga literatura sang mga Saksi ni Jehova ginbalhag sang komersial nga mga manug-imprinta. Apang sang katuigan 1920, ginpamat-od nga mas maayo kag mas mapuslanon sa espirituwal kon mga alagad na mismo ni Jehova ang magaimprinta. Nagsugod sa diutay nga paagi sang 1920, ang hilikuton sa pag-imprinta amat-amat nga nag-uswag sa ­Brooklyn, New York, tubtob nga nagdaku ini katama. Sang 1967 apat ka bloke sang siudad ang nahamtangan sining mga pasilidad. Ginhimo man ang pag-imprinta sa iban nga mga kadutaan, apang nauntat ang kalabanan sini bangod sang Inaway Kalibutanon II.

⁸ Bisan pa nga nag-uswag ang hilikuton sa pag-imprinta sa Estados Unidos, indi sini masarangan nga sangkapan ang bug-os nga kalibutan. Gani, sang mga tinuig pagkatapos sang inaway, ang mga imprintahan gintukod ukon ginatukod pa lang sa madamong iban pa nga pungsod, lakip na ang ­Canada, ­Denmark, Inglaterra, Gresya, Bagatnan nga Aprika, ­Switzerland, kag Katundan nga Alemanya. Sang maaga nga bahin sang 1970, ang ­Australia, ­Brazil, ­Finland, ­Ghana, ­Japan, ­Nigeria, kag Pilipinas gindugang sa listahan. Ang iban sini nga mga pungsod nagabalhag man sing mga libro. Subong man sang maaga nga bahin sang 1970, ang mga misyonero sa ­Gilead ginhanas sa pag-imprinta kag ginpadala sa pila sining mga kadutaan sa pagbulig sa lokal nga mga kauturan sa hilikuton sa pag-imprinta.

⁹ Sang katuigan 1980, ang mga pungsod nga nagaimprinta sing mga magasin naglab-ot sa kadamuon nga 51.⁠a Daw ano gid kaayo nga paggamit sa pagkabutang sang Agalon ini tanan! Daw ano ka daku nga ebidensia sa pag-uswag sang hilikuton sang Ginharian! Kag daw ano ka daku nga pamatuod sang maalwan nga suporta sang minilyon ka indibiduwal nga mga Saksi ni Jehova nga ‘nagpadungog kay Jehova paagi sa ila hamili nga mga butang’! (Hulu. 3:9) Gani, ginpamatud-an nila ang ila kaugalingon subong maayo nga mga tulugyanan sang kon ano ang ginpakamaayo ni Jehova sa ila sa lainlain nga paagi.

Pagbalhin Sing Konsentrasyon

¹⁰ Sang katuigan 1970 kag maaga nga bahin sang 1980, nag-uswag sing daku ang teknolohiya sa pag-imprinta, kag gingamit sang mga Saksi ni Jehova ang mas bag-o nga mga pamaagi sa pag-imprinta. Sang nagligad, gingamit nila ang kinaandan na nga ­letterpress nga estilo sa pag-imprinta. Amat-amat ini nga nagbalhin sang nagsugod sila sa paggamit sing mas moderno off­set nga pag-imprinta. Subong resulta, ginbalhag ang matahom nga mga publikasyon nga may de-kolor nga mga ilustrasyon, sa baylo sang duha-sing-duag nga mga laragway (itom kag isa pa ka duag) nga amo lamang ang masarangan sang daan nga mga ­letterpress. Dugang pa, ginbag-o sang teknolohiya sa kompyuter ang bug-os nga hilikuton antes sang pag-imprinta (paghanda para sa pag-imprinta). Ang mga Saksi ni Jehova nakahimo sing ­Multilanguage ­Electronic ­Phototypesetting ­System (MEPS), isa ka de-kompyuter nga sistema nga nagasuporta karon sa pag-imprinta sa kapin sa 370 ka lainlain nga pamulong. Wala sing komersial nga programa ang makatupong sa ikasarang sang MEPS sa pagpanghikot sa tuman kadamo nga pamulong.

¹¹ Paagi sa bulig sang teknolohiya sang MEPS nga kompyuter kag sa paggamit sing iban pa bag-ong ideya subong sang ­electronic ­mail, isa pa ka daku nga pag-uswag ang ginhimo sa pagpatubas sing pagkaon sa nagakaigo nga tion. Sang nagligad, nagagamit sing daan nga teknolohiya, ang impormasyon sa indi-Ingles nga mga magasin ulihi sing binulan ukon isa pa gani ka tuig sa Ingles. Karon, Ang Lalantawan ginabalhag sing dungan sa 115 ka lainlain nga pamulong, kag ang Magmata! sa 62. Nagakahulugan ini nga sa bug-os nga kalibutan kapin sa 95 porsiento sadtong nagatambong sa semanal nga Pagtinuon sa Lalantawan sang mga Saksi ni Jehova ang nagabinagbinag sing palareho nga materyal sa pareho man nga tion. Daw ano gid ini nga pagpakamaayo! Isa gid ka maayo nga paggamit sa mga pagkabutang sang Agalon ang gamiton ini sa tanan sining bag-ong teknolohiya!

Lainlain nga mga Kinahanglanon Sang Organisasyon

¹² Ginbag-o sining bag-ong mga sistema ang mga kinahanglanon sang organisasyon tuhoy sa bug-os kalibutan nga hilikuton sa pag-imprinta sang mga Saksi ni Jehova. Ang mga web off­set ­press mas madasig sangsa daan nga mga ­letterpress, apang mas mahal man kaayo. Ang mga sistema sang kompyuter nga nagasuporta sa may kaangtanan nga hilikuton, subong sang pagsulat, pagbadbad, arte, kag ­graphics, walay sapayan nga mas madamo ang mahimo sangsa daan nga mga sistema, mas mahal man. Nakita sang ulihi nga ang pag-imprinta sing mga magasin sa 51 ka lainlain nga pungsod indi makinot. Gani, sang katuigan 1990, gin-usisa liwat sang “matutom nga tulugyanan” ang kahimtangan. Ano ang konklusion?

¹³ Ginpakita sang mga pagtuon nga ang “hamili nga mga butang” nga gin-amot sang mga Saksi ni Jehova kag sang ila mga abyan mahimo magamit sing mas maayo kon ang hilikuton sa pag-imprinta tingubon na lamang. Gani madamong sanga nga nagaimprinta ang amat-amat nga ginbuhinan. Ang Alemanya amo na ang nagaimprinta sing mga magasin kag mga literatura para sa madamong kadutaan sa Nasidlangan kag Nakatundan nga Europa, lakip na ang pila nga nagahimo anay sang ila kaugalingon nga pag-imprinta. Ang Italya nagasuplay sing mga magasin kag mga literatura sa mga bahin sang Aprika kag bagatnan-sidlangan nga Europa, lakip na ang Gresya kag ­Albania. Sa Aprika, ang pag-imprinta sing magasin ginahimo na lamang sa ­Nigeria kag Bagatnan nga Aprika. Ang kaanggid nga pagtingob ginhimo sa bug-os nga kalibutan.

Mga Butang nga Dapat Tulutimbangon

¹⁴ Sa Hulyo 1998, ang pag-imprinta sing mga magasin untaton na sa madamong pungsod sa Europa, lakip na ang ­Austria, ­Denmark, Pransia, Gresya, ­Netherlands, kag ­Switzerland. Ang hilikuton sa pag-imprinta sa Europa himuon sang Britanya, ­Finland, Alemanya, Italya, Espanya, kag ­Sweden. Sa sining paagi, ang dikinahanglanon nga mga gastos malikawan kag ang mga amot magamit sa mas maayo nga paagi para sa bug-os kalibutan nga hilikuton. Paano ginpamat-uran kon diin nga mga pungsod ang magapadayon sa pag-imprinta kag kon diin ang magauntat na? Nahisuno sa sugo nga gamiton sing maalamon ang mga pagkabutang sang Agalon, mahalungon nga gintun-an sang “matutom nga tulugyanan” ang pagkapraktikal sang pag-imprinta sa tagsa ka duog.

¹⁵ Ang daku nga rason kon ngaa gin-untat ang pag-imprinta sa pila ka pungsod kag gintingob na lang sa iban amo ang pagkapraktikal. Ang pag-imprinta sang isa ka pungsod sing mga literatura para sa iban pa nga kadutaan mas kombeniente kag mas maayo nga paggamit sa malahalon nga kasangkapan. Ang pag-imprinta ginahimo karon sa kon diin ang gasto mas manubo, ang materyales sarang matigayon, kag ang mga pasilidad sa pagpadala maayo. Gani, ang mga pagkabutang sang Agalon ginagamit sing nagakaigo. Apang, ang indi na pag-imprinta sang isa ka pungsod wala nagakahulugan nga magauntat na didto ang pagbantala nga hilikuton. Matigayon gihapon ang madamo nga suplay sang balasahon, kag ang ginatos ka libo ka Saksi ni Jehova sa sadtong kadutaan padayon nga magabantala sing makugi sa ila mga isigkatawo sing “maayong balita sang paghidait.” (Efe. 2:17) Dugang pa, ining pagbag-o sa palakat nagresulta sa iban pa nga mga benepisyo.

¹⁶ Sa paghinambit sa isa ka benepisyo, ang kalabanan sa modernong mga makina sa pag-imprinta sa ­Denmark, Gresya, ­Netherlands, kag ­Switzerland ginpadala sa ­Nigeria kag Pilipinas. Ang lantip nga mga manugpadalagan sining mga makina gikan sa mga pungsod sa Europa gin-agda nga mag-upod sa mga makina kag maghanas sa lokal nga mga magagamit sini. Gani, ini nga mga pungsod may mataas na karon sing kalidad nga mga magasin subong sang iban nga mga pungsod.

¹⁷ Binagbinaga ang isa pa ka benepisyo: Ang gasto sa pag-imprinta sing mga magasin ginaabaga karon sang pila ka kadutaan diin nagapadayon ang pag-imprinta. Subong resulta, sa mga kadutaan diin gin-untat na ang pag-imprinta, ang pundo magamit na karon para sa iban pa nga mga katuyuan, subong sang pagpatindog sing mga Kingdom Hall kag pagbulig nga maatipan ang mga kinahanglanon sang aton mga kauturan sa mas pigado nga kadutaan. Gani, ang mahalungon nga paggamit sa mga pagkabutang sang Agalon nagakahulugan nga ang pinamulong ni Pablo sa mga taga-Corinto sarang maaplikar sing mas epektibo sa internasyonal nga kasangkaron: “Indi ko tuyo nga mahapusan ang iban, apang kamo mabudlayan; kundi paagi sa pag-alangay matimbangan sang inyo sobra sa karon ang ila kinawad-on . . . agod may pag-alangay.”​—⁠2 Cor. 8:​13, 14.

¹⁸ Bangod sini nga pagtingob, ang mga Saksi ni Jehova sa bug-os nga kalibutan labi pa gid nga nagsuod sangsa nagligad. Indi problema para sa mga Saksi sa ­Denmark nga ang ila mga magasin ginaimprinta sa Alemanya, walay sapayan nga sadto anay sila mismo ang nagaimprinta sini. Nagapasalamat sila sa ginahimo sang ila Aleman nga mga kauturan. Naakig bala ang mga Saksi ni Jehova sa Alemanya bangod ang ila mga amot ginagamit sa pag-aman sing mga literatura sa Biblia para sa ­Denmark​—⁠ukon para sa Rusya, ­Ukraine, kag iban pa nga kadutaan? Wala! Nalipay sila makahibalo nga ang mga amot sang ila kauturan sa sadtong kadutaan ginagamit na karon para sa iban pa kinahanglanon nga mga katuyuan.

Pag-atipan sa mga Pagkabutang

¹⁹ Sa tanan nga Kingdom Hall sang mga Saksi ni Jehova sa bug-os nga kalibutan, may yara isa ka kahon-alamutan nga may sulat nga ­“Contributions for the ­Society’s ­Worldwide Work​—⁠­Matthew 24:⁠14.” Ang wala ginapangayo nga mga amot nga ginhulog sa sining mga kahon ginagamit kon may yara kinahanglanon. Ang “matutom nga tulugyanan” kag ang tagsa ka korporasyon sang sanga amo ang nagapamat-od kon paano gamiton ang mga amot. Gani, kon diin ginatugot sang kasuguan, ang kuwarta nga ginahulog sa kahon-alamutan sa isa ka pungsod mahimo magsuporta sa mga hilikuton sang mga Saksi ni Jehova sa iban nga pungsod nga linibo ka kilometro ang kalayuon. Ang mga amot ginagamit sa iban nga mga kadutaan sa pagbulig sing hilingagawon sa mga masigkatumuluo nga nagaantos bangod sang mga bagyo, buhawi, linog, kag inaway sibil. Kag ini nga mga donasyon ginagamit sa pagsuporta sa mga misyonero sa kapin sa 200 ka kadutaan.

²⁰ Sa masami, sa mga kongregasyon sang mga Saksi ni Jehova, ang report sa kuwenta ginahinambitan sing makaisa lamang sa isa ka bulan​—⁠kag sa sulod lamang sang pila ka minuto. Wala sing mga plato sa pagpangolekta ang ginalibot sa mga Kingdom Hall ukon sa mga asambleya. Ang mga indibiduwal wala ginapangayuan sing kuwarta. Wala sing isa ang ginatangduan sa paghimo sing ­fund-raising (pagpangolekta sing pundo). Sa masami, Ang Lalantawan may isa lamang ka artikulo sa isa ka tuig nga nagapaathag kon ano ang himuon sadtong mga luyag mag-amot sa Watch Tower Bible and Tract Society agod masuportahan ang bug-os kalibutan nga hilikuton. Wala sing tayuyon nga pagsambit sa Magmata! tuhoy sa pundo sang Sosiedad. Paano, nian, ginahimo ang daku nga hilikuton sang pagbantala sing maayong balita sa bug-os nga kalibutan, pagtukod sing kinahanglanon nga mga Kingdom Hall, pag-atipan sadtong yara sa pinasahi bug-os tion nga pag-alagad, kag pagbulig sa mga Cristiano nga nagakinahanglan? Ginapakamaayo ni Jehova ang iya katawhan sa makatilingala nga paagi sing espiritu sang pagkaalwan. (2 Cor. 8:2) Ginahimuslan namon ini nga kahigayunan agod pasalamatan ang tanan nga nakigbahin sa ‘pagpadungog kay Jehova paagi sa ila hamili nga mga butang.’ Makapat-od sila nga “ang matutom nga tulugyanan” padayon nga magaatipan sa mga pagkabutang sang Agalon. Kag ginapangamuyo namon nga padayon nga pakamaayuhon ni Jehova ang tanan nga kahimusan para sa pagpasangkad sa bug-os kalibutan nga hilikuton.

[Mga footnote]