Gamita sing Maayo ang Daan nga mga Libro
1 Ang tawo nakatipon sing minilyon ka daan nga libro sa mga librarya sa tanan nga hilit sang duta. Apang, ano ang walay katapusan nga kapuslanan sini sa tawhanon nga rasa? (Manugw. 12:12) Ang mga publikasyon nga nagatuon sing igtalupangod sa Ginharian sang Dios kag sa kon ano ang himuon sini para sa katawhan daku pa ang kapuslanan. Ang kalabanan nga mga kongregasyon may lainlain sang subong sini nga mga libro nga ginbalhag antes sang 1985 sa ila mga talaguan. Sa Enero itanyag naton ining daan nga mga libro sa publiko, nagagamit ilabi na sang Nahiusa sa Pagsimba nga libro kag ang gamay nga edisyon sang Mabuhi sing Dayon nga libro.
2 May Daku Ini nga Kabilihanan: Walay sapayan nga ang pila sa aton mahimo magabatyag nga ining mga libro karaan na kon ipaanggid sa aton mas bag-o nga mga publikasyon, dapat naton dumdumon nga nagaunod ini sing Makasulatanhon nga kamatuoran. Ang mensahe sang Ginharian nga ginapaathag sini hamili gihapon sa karon kag, kon tumanon, mahimo nga makaluwas sing kabuhi. (Juan 17:3) Gani, dapat kita manikasog sing labi pa nga gamiton sing maayo ining daan nga mga libro.
3 Ang eksperiensia sang isa ka babayi nga nakapanubli sing pila ka daan nga mga publikasyon sang Watch Tower gikan sa iya lola nagapakita sang kabilihanan sini. Ginpamangkot sang isa ka Saksi ang babayi kon nahibaluan niya ang daku nga kabilihanan sang mga publikasyon. Ang babayi nagsabat: “Wala ako makahibalo sang daku nga kabilihanan sini, apang paano ko mahibaluan?” Ang babayi nagbaton sing isa ka pagtuon sa Biblia, nagsulod sa kamatuoran, kag pagkatapos sadto ginpakabahandi ang librarya sang iya lola. Daw ano ka hamili nga panublion yadtong koleksion sang daan nga mga libro!
4 Ipalapnag Ini: Dugang sa pagtanyag sa daan nga mga libro sa pamalaybalay, pat-ura nga itanyag ini kon nagaduaw liwat sa mga tawo nga nahibaluan mo nga maluyagon sa pagbasa sang aton mga publikasyon, lakip na ang mga nagasuskribe sa Ang Lalantawan kag Magmata! kag ang imo ruta sa magasin. Para sa mga nagatuon sing Biblia upod sa imo, ang pinili nga daan nga mga libro makahatag sing dugang nga ihibalo nga magapasangkad sang ila paghangop sa kamatuoran. Indi malipat sa pagkuha sing bisan ano man sa daan nga mga libro nga wala sa imo personal nga koleksion, ilabi na ang mga libro nga Nahiusa sa Pagsimba kag Mabuhi sing Dayon. Sa sining paagi, makatipon ka sing isa ka hamili nga teokratikong librarya, nga sarang magamit sa pagpauswag sang kalidad sang imo mga panag-on sang personal nga pagtuon.
5 Sa baylo nga taguon lamang ang aton daan nga mga libro, gamiton naton ini sing maayo sa pagpahulag sa mga tawo nga masumalang naton nga “magkahadlok sa matuod nga Dios kag magtuman sa iya mga sugo.”—Manugw. 12:13.