Ang Aton Daku nga Manunuga Nagaulikid sa Aton!

¹ Sa iya panikasog nga mangatarungan upod sa dimatinumanon nga Israel, si Jehova namangkot: “Wala ka bala makahibalo ukon wala ka bala makabati? Si Jehova, nga Manunuga sang mga ukbong sang duta, isa ka Dios nga wala sing katubtuban.” (Isa. 40:28) Kilala naton ang aton Daku nga Manunuga, kag nakita naton ang iya mahigugmaon nga pag-ulikid sa aton. Apang, minilyon ka tawo ang nagaduhaduha sa iya pagluntad ukon may ideya tuhoy sa iya nga wala nagahisanto sa kon ano ang masapwan sa Biblia. Paano naton sila mabuligan?

² Ang bag-ong libro nga Is There a Creator Who Cares About You? gindesinyo agod buligan ini nga mga tawo. Ginaagda sini ang nagahunahuna nga mga tawo nga mangatarungan sa mga katunayan. Ang makawiwili nga materyal kag makahalaylo nga mga argumento sa sini nga libro dapat magabihag sa mga nagabasa sini.

³ Mangin Pamilyar sa Creator nga Libro: Hunahunaa ang sadsaran nga balayan sang mga kaundan sini. Ang kapitulo 2 tubtob 5 nagabinagbinag kon paano ang uniberso, kabuhi, kag tawo nagluntad kag kon ano ang sa likod sini tanan. Ang kapitulo 6 tubtob 9 nagausisa sa Biblia kag sa Awtor sini kag, ilabi na, sa kon bala ang rekord sang Genesis tuhoy sa pagpanuga masaligan. Ang kapitulo 10 nagahatag sing makaalayaw nga sabat sa isa sang labing masibod nga pamangkot sang tawo: “Kon ang Manunuga nagaulikid, ngaa tuman kadamo ang pag-antos?”

⁴ Tinguhai nga Mangatarungan Upod sa mga Nagaduhaduha: Ang pahina 78-9 sa Creator nga libro nagapresentar sing argumento nga sarang mo magamit agod buligan ang iban nga makahimo sing husto nga konklusion tuhoy sa Dios. Pamangkuta sila: “May ginsuguran bala ang uniberso?” Ang kalabanan magaugyon nga may yara. Kon amo, mamangkot: “May nagpahanabo bala ukon wala sadto nga ginsuguran?” Ang kalabanan nakahibalo nga ginpahanabo ini. Nagadul-ong ini sa katapusan nga pamangkot: “Ginpahanabo bala ang ginsuguran sang uniberso sang isa ka butang nga dayon ukon sang Isa nga dayon?” Sa sini nga paagi mahangpan sang madamo nga may yara gid Manunuga.

⁵ Ang Creator nga libro amo gid ang ginakinahanglan sang madamo nga tawo. Ipaambit ini sa imo mga himata, mga kaupod sa trabaho, mga kabutho, kag iban nga mga kakilala. Dalha ini sa ministeryo agod mapahamtang mo ini sa mga masumalang mo nga nagaduhaduha sa pagluntad sang Dios. Kon mas pamilyar kita sa sini nga libro, mangin mas mabaskog ang aton gugma sa aton Manunuga, nagapahulag sa aton nga magpadayon sa paglakat suno sa iya mataas nga mga talaksan.​—⁠Efe. 5:​1; Bug. 4:⁠11.