Bug-os Kalibutan nga Pagsaulog sang Kamatayon ni Cristo
1 Si Jehova dagaya nga naghatag sa aton sing madamo nga dulot. Ang kabug-usan sang iya pagkamaayo kag mahigugmaon nga kaayo maathag nga ginlaragway subong ang “iya dimalaragway nga wala bayad nga dulot.” Huo, ang “dibagay nga kaayo sang Dios” tumalagsahon gid amo nga indi naton ini sarang malaragway.—2 Cor. 9:14, 15.
2 Ang Iya Labing Daku nga Dulot: Si Jesucristo, subong Manuggawad sang katawhan, amo ang labing daku nga dulot sa tanan. Bilang pagpakita sang iya daku nga gugma sa katawhan, ginhatag ni Jehova ang iya hinigugma kag bugtong nga Anak. (Juan 3:16) Takus gid dumdumon ining dibagay nga pagpakamaayo gikan sa Dios sa bug-os nga kalibutan. San-o kag paano? Sa gab-i sang Huebes, Abril 1, 1999, ang mga Cristiano sa bug-os nga kalibutan magasaulog sang Panihapon sang Ginuo, bilang Memoryal sang pinakabantog sa tanan nga halad.—1 Cor. 11:20, 23-26.
3 Napatay si Cristo para sa aton bisan “sang mga makasasala pa kita,” kag mapakita naton ang aton personal nga pagpasalamat paagi sa pagsaulog sa Memoryal sang iya kamatayon kag paagi sa pag-agda sa iban sa pagtambong upod sa aton sa sining pinakaimportante nga okasyon.—Roma 5:8.
4 Ang Pinakaimportante nga Okasyon: Ang panguna nga ginapadaku sang pagsaulog sa kamatayon ni Cristo amo ang pagsakdag niya sa pagkasoberano sang Dios sing himpit. Nagapahanumdom man ini sa aton nga maagom naton ang matinlo nga tindog sa atubangan ni Jehova paagi sa pagpakita sing pagtuo sa halad ni Jesus, sa amo ginapasalig ang kaluwasan. (Binu. 4:12) Sa pagkamatuod, amo ini ang labing importante nga okasyon sang tuig!
5 Mapakita naton ang aton gugma sa aton mga isigkatawo paagi sa pag-agda sa ila sa pagsaulog sang Panihapon sang Ginuo upod sa aton. Ang mga benepisyo sang gawad matigayon gihapon sang minilyon nga nakahibalo sang daku gid nga bili sini. (Filip. 3:8) Ang mga nagatuo sa halad ni Cristo makatigayon sing malig-on nga paglaum nga kabuhi nga walay katapusan.—Juan 17:3.
6 Ang panahon sang Memoryal nagahatag sa aton sing pinasahi nga mga kahigayunan nga mapakita ang pagpasalamat sa labaw gid nga dibagay nga kaayo sang Dios. Amo ini ang labing maayo nga tion sa pagpakigbahin sing makugi sa pagbantala sing maayong balita sang Ginharian sang Dios. May daku nga mga benepisyo nga nagahulat sa tanan nga mapinangamuyuon nga nagabinagbinag sang dimalaragway nga wala bayad nga dulot ni Jehova kag nagahimo sing kahimusan agod makatambong sa selebrasyon sang Panihapon sang Ginuo sini nga tuig!