Ginatan-aw Mo Bala ang Naguwa Lamang nga Dagway?

¹ Samtang ginahimo naton ang aton publiko nga ministeryo, ayhan nagapangalag-ag kita nga ipaambit ang maayong balita sa pila ka tawo bangod sang aton una nga impresyon sa ila. Halimbawa, ano ang imo reaksion kon ang mabangis-tan-awon nga lalaki pirme nagatulok sa imo sing maduhaduhaon sang ginduaw mo ang iya kaingod nga interesado sa kamatuoran? Ang isa ka payunir nga utod nga babayi nga nakaeksperiensia sini namat-od nga palapitan ang lalaki kag sugilanunon sia. Malas-ay ang pagtamyaw sa iya sang lalaki. Apang, sing makapakibot, namati sia sa mensahe sang Biblia kag makunyagon nga nagpasugot sa pagtuon. Bangod sang indi paghukom sang utod nga babayi sa naguwa lamang nga dagway, nabuksan ang dalan agod matun-an sining lalaki kag sang iya asawa ang kamatuoran.

² Ang isa ka utod nga babayi nahadlok sang primero sa naguwa nga dagway sang malaba-sing-buhok nga pamatan-on nga lalaki apang pirme niya sia ginapanaksihan sing malip-ot kada magsulod sia sa balaligyaan nga ginatrabahuan sang utod nga babayi. Ang iya mga panikasog nagbunga, kag ang pamatan-on isa ka bawtismado nga Saksi na karon. Ano ang magapugong sa aton nga maghinakop sing padasudaso nga indi sila mamati?

³ Pag-ilog sa Halimbawa ni Jesus: Nahibaluan ni Jesus nga ihatag niya ang iya kabuhi para sa tanan. Gani, ang naguwa nga dagway sang iban wala makapugong sa iya. Nahibaluan niya nga bisan yadtong may malaw-ay sing reputasyon mahimo magbag-o kon hatagan sing nagakaigo nga bulig kag pangpapagsik. (Mat. 9:​9-13) Gintinguhaan niya nga buligan ang mga manggaranon kag mga imol. (Mat. 11:​5; Mar. 10:​17-22) Kabay nga indi naton paghukman ang mga tawo nga masumalang naton sa ministeryo bangod sang ila naguwa nga dagway, nagapiyong sang aton mga mata sa ayhan isa ka maayo nga kahimtangan sang tagipusuon. (Mat. 7:​1; Juan 7:24) Ano ang makabulig sa aton agod mailog ang tumalagsahon nga halimbawa ni Jesus?

⁴ Paagi sa pagtuon naton sang Biblia, nahangpan naton nga ang Pulong sang Dios may gahom sa pagbalhin sa panghunahuna, paggawi, kag personalidad sang isa. (Efe. 4:​22-24; Heb. 4:12) Busa, dapat naton huptan ang positibo nga panimuot kag itugyan ini sa kamot ni Jehova, ang Isa nga nagabasa sang mga tagipusuon sang tawo.​—⁠1 Sam. 16:​7; Binu. 10:​34, 35.

⁵ Kabay nga ang aton walay ginapasulabi nga pagpaambit sing maayong balita sa tanan nga sahi sang katawhan, bisan ano man ang ila naguwa nga dagway, makaamot sa dakung hilikuton sang pag-ani sa sining katapusan nga mga adlaw.​—⁠1 Tim. 2:​3, 4.