Ano ang Isiling Ninyo sa Isa ka Ateista?

¹ “Ateista ako,” siling sang taga-Poland nga propesora sa isa ka misyonera sa Aprika. Apang, nasugilanon sang utod ang propesora kag ginhatagan sia sing libro nga Life​—⁠How Did It Get Here? By Evolution or by Creation? Sang nagbalik ang misyonera sang masunod nga semana, ang propesora nagsiling sa iya: “Indi na ako ateista!” Nabasa niya ang bug-os nga Creation nga libro kag nangabay karon sing isa ka pagtuon sa Biblia. Ano ang inyo himuon agod magmadinalag-on sa pagpanaksi sa mga nagasiling nga wala sila nagapati sa Dios? Una, binagbinaga ang lainlain nga mga rason kon ngaa nagasiling sing amo sini ang mga tawo.

² Mga Rason sang Indi Pagpati: Indi tanan nga ateista ginpadaku nga subong sina. Madamo ang nadayag sa isa ka porma sang relihion kag nagapati anay sa Dios. Apang, bangod sang malubha nga mga problema sa panglawas ukon pamilya ukon sang pila ka inhustisya nga naagihan nila, ang ila pagtuo nagluya. Para sa iban, ang mga kurso nga ginatudlo sa mga unibersidad may negatibo nga epekto sa ila ideya tuhoy sa Dios. Talupangda ang masunod nga mga halimbawa sang mga ateista nga nagpalambo sang ulihi sing mabakod nga pagtuo kay Jehova nga Dios kag nangin mga Saksi niya.

³ Isa ka babayi sa Paris ang nabun-ag nga may nagapaluya sang tul-an nga balatian. Bisan pa ginbunyagan subong Katoliko, ginkabig niya ang iya kaugalingon nga isa ka ateista. Sang ginpamangkot niya ang mga madre kon ngaa gintugutan sang Dios nga mabun-ag sia nga may subong sini nga balatian, ang ila sabat amo: “Bangod palangga ka niya.” Indi niya mabaton inang di-makatarunganon nga ideya. Subong man, binagbinaga ang isa ka pamatan-on nga lalaki sa Finland nga nasayasat nga may di-mabulong nga balatian sa maskulo kag nagawheelchair na lamang. Gindala sia sang iya iloy sa isa ka Pentecostal nga makaayo kuno sang mga masakiton. Apang wala sing milagruso nga pag-ayo nga natabo. Subong resulta, ang pamatan-on nadulaan sing interes sa Dios kag nangin ateista.

⁴ Isa ka lalaki sa Honduras ang ginpadaku nga Katoliko apang nagtuon sing Sosyalista nga pilosopiya kag ateismo. Bangod nakumbinsi sia sa panudlo sa unibersidad nga ang mga tawo produkto sang ebolusyon, wala na sia magpati sa Dios. Subong man, isa ka babayi sa Estados Unidos ang ginpadaku nga Metodista. Sa kolehiyo, nagkuha sia sing mga klase sa sikolohiya. Paano naapektuhan ang iya pagtuluuhan? Sia nagsiling: “Sang isa ka tig-ilinit ginguba nila ang akon tanan nga pagtuo sa relihion.”

⁵ Paglab-ot sa Tagipusuon sang mga Sinsero: Madamong indibiduwal nga nagasiling nga wala sila nagapati sa Dios ang magaapresyar sa paghibalo kon may solusyon sa mga problema tuhoy sa mapigaw nga kapagros, indi paghiusa sa pamilya, inhustisya, kag iban pa. Interesado gid sila nga makakita sing sabat sa mga pamangkot subong sang: ‘Ngaa nagaluntad ang kalautan?’ ‘Ngaa nagakahanabo ang malain nga mga butang sa maayo nga mga tawo?’ kag ‘Ano ang kahulugan sang kabuhi?’

⁶ Isa ka mag-asawa nga nagapuyo sa Switzerland ang ginpadaku subong mga ateista. Sang una sila nga masugilanon tuhoy sa kamatuoran, indi sila interesado. Apang may mabug-at sila nga problema sa pamilya kag nagahunahuna nga magdiborsio. Sang ginduaw sila liwat sang mga Saksi, ginpakita nila sa mag-asawa gikan sa Biblia kon paano malubad ang ila mga problema. Nakibot ang mag-asawa sa praktikal nga laygay sa Kasulatan, kag nagpasugot sila nga magtuon sa Biblia. Ang ila pag-asawahay nagbakod, nag-uswag sila sa espirituwal, kag nabawtismuhan sila.

⁷ Kon Ano ang Isiling Ninyo sa Ateista: Kon may magsiling sa inyo nga ateista sia, panikasugi nga mahibaluan ang rason kon ngaa nasiling niya ina. Bangod bala ini sa edukasyon nga natigayon niya, sa mga problema nga naagihan niya, ukon sa pagkasalimpapaw kag butig nga mga panudlo sang relihion nga nakita niya? Mahimo ninyo sia pamangkuton: “Amo na bala sini pirme ang imo balatyagon?” ukon “Ano ang rason tungod sang imo konklusion?” Ang iya sabat magabulig sa inyo nga mahibaluan kon ano ang dapat isiling. Kon kinahanglan ang mabakod nga mga argumento, ang libro nga Is There a Creator Who Cares About You? mahimo nga amo gid ang kinahanglanon.

⁸ Mahimo ninyo mapadayon ang pagpakighambal sa isa ka ateista paagi sa pagpamangkot:

◼ “Napamangkot mo na bala: ‘Kon may Dios, ngaa tuman kadamo sang pag-antos kag inhustisya sa kalibutan?’ [Pasabta sia.] Mahimo ko bala mapakita sa imo ang pagtamod sang Biblia tuhoy sa sini nga topiko?” Basaha ang Jeremias 10:⁠23. Pagkatapos ini mabasa, pangayua ang iya opinyon tuhoy sa teksto. Nian ipakita sa iya ang mga pahina 16 kag 17 sa brosyur nga Will There Ever Be a World Without War? Ukon, sa baylo, mahimo ninyo gamiton ang kapitulo 10 sang Creator nga libro. Hayluha sia nga batunon ang publikasyon kag basahon ang materyal.​—⁠Para sa dugang pa nga mga panugda, tan-awa ang Reasoning nga libro, pahina 150-1.

⁹ Matuod, indi tanan nga ateista magabaton sang kamatuoran. Apang madamo ang handa sa pagbinagbinag sa iban pa nga pagtamod. Gamita ang pangatarungan, pagbuyok kag, labaw sa tanan, ang gahom sang Pulong sang Dios agod buligan sila nga makita ang kamatuoran.​—⁠Binu. 28:​23, 24; Heb. 4:⁠12.