Nagahulag Ka Bala sa Gugma ni Cristo?
1 Nagabinagbinag sang pagkabuhi sang iya Agalon, si apostol Juan nagsulat: “Si Jesus, nga naghigugma sang mga iya nga yari sa kalibutan, naghigugma sa ila tubtob sa katapusan.” (Juan 13:1) Sa sining panahon sang Memoryal, ginahunahuna naton ang labing daku nga pagpakita sang gugma ni Cristo. Makahulag kita sa sina nga gugma paagi sa pagtuo sa gawad, sa pagpakigbahin sing makugi sa pagbantala nga hilikuton kag, kaangay ni Jesus, sa pagbatas “tubtob sa katapusan.”—Mat. 24:13; 28:19, 20; Juan 3:16.
2 Nagahulag sa Gugma ni Cristo: Si Jesus masako katama sa katapusan nga semana sang iya dutan-on nga pagkabuhi. (Mat. 21:23; 23:1; 24:3) Subong mga manug-ilog ni Cristo, ang gugma nagapahulag man sa aton nga ‘manikasog kita sing lakas’ sa pag-alagad kay Jehova. (Luc. 13:24) Himuslan mo bala ang mga kahimusan para sa dugang pa nga hilikuton sa pagpanaksi sa Abril paagi sa pagdugang sang oras nga ginahinguyang mo sa ministeryo?
3 Sini nga tuig ang Panihapon sang Ginuo nagatupa sa Mierkoles sang gab-i, Abril 19. Pila ang magatambong sa sining importante nga okasyon? Sa daku nga kasangkaron, nagadepende ina sa aton. Nakahimo ka na bala sing listahan sang ginaplano mo nga agdahon—ang imo mga estudyante sa Biblia kag iban pa nga mga interesado, mga himata, mga kilala sa negosyo, kag mga kabutho? Nasugilanon mo na bala sila kag naagda sing tinagipusuon? Pahanumdumon mo bala sila pila ka adlaw antes sang Memoryal? Kinahanglan bala nila ang imo bulig sa pagkadto didto? Ginaagda man sang mga gulang ang bisan sin-o nga nangin indi aktibo sa ministeryo. Bisan pa ang Memoryal hiwaton sa isa ka gab-i sang semana sa baylo sang talipuspusan sang semana, importante gid nga makatambong ang tanan.
4 Magtambong nga Handa: Kinahanglan kita nga mangin handa kag may nagakaigo nga panimuot sa hunahuna kon magtambong kita sa Memoryal. Ginlaygayan ni Pablo ang mga masigkatumuluo nga huptan sa hunahuna ang pagkaserioso sang okasyon. (1 Cor. 11:20-26) Mahimo ninyo basahon ang kapitulo 13 tubtob 17 sang Ebanghelyo ni Juan sa tion sang inyo pangpamilya nga pagtuon sa Biblia kag nian ipasaysay sa tagsa ka katapo sang pamilya ang kahulugan sang halad ni Jesus sa iya. Indi man pagkalimti ang adlaw-adlaw nga pagbasa sing Biblia para sa semana sang Memoryal!
5 Ang aton gugma kay Cristo daku gid, kag nagalampas pa ini sa Abril 19. Determinado kita nga ipakita sa iya ang aton gugma sing dayon! Ang pagsaulog sa Memoryal sini nga tuig magabulig sa aton agod mapabakod ina nga pamat-od.