‘Natilawan May Kaangtanan sa Katakus’—Paano?
1 Bangod sang dalayon nga pag-uswag sa organisasyon ni Jehova, kinahanglan karon ang kalipikado nga mga kauturan nga lalaki agod mag-alagad subong mga ministeryal nga alagad. Ang kalabanan nga kauturan nga lalaki nga wala pa matangdo, lakip na ang mga tin-edyer, nagahandum sa pag-alagad sa kongregasyon. Kon ginahatagan sila sing dugang nga hilikuton, nagabatyag sila nga mapuslanon kag may hinimuan. Ang ila dugang nga pag-uswag nasandig sa ila ‘pagkanatilawan may kaangtanan sa katakus.’ (1 Tim. 3:10) Paano ini ginahimo?
2 Ang Papel sang mga Gulang: Subong bahin sang pagtakus sa isa ka utod nga lalaki paagi sa Makasulatanhon nga mga kalipikasyon para sa mga ministeryal nga alagad nga masapwan sa 1 Timoteo 3:8-13, ang mga gulang magatilaw sang katakus sang utod sa pag-uyat sing mga responsabilidad. Mahimo nila sia tangduan sa pagbulig sa pagpanagtag sing mga magasin kag mga literatura, pag-uyat sing mga mikropono, pagmentinar sa Kingdom Hall, kag iban pa. Ang mga gulang magapanilag kon paano niya ginahimo kag ginaatipan ang iya mga hilikuton. Pangitaon nila ang mga kinaiya nga pagkamasaligan, pag-abot sing temprano, kapisan, kaugdang, pagkamabinuligon, kag ikasarang sa pagpakigbagay sa iban. (Filip. 2:20) Huwaran bala sia sa iya pamayo kag pamustura? Masaligan bala sia? Luyag nila makita “sa iya maayo nga paggawi ang iya mga binuhatan nga may kalulo nga natungod sa kaalam.” (Sant. 3:13) Nagahimulat gid bala sia nga makabulig sa kongregasyon? Ginatuman bala niya ang sugo ni Jesus nga “maghimo sing mga disipulo sa mga tawo” paagi sa makugi nga pagpakigbahin sa ministeryo sa latagon?—Mat. 28:19; tan-awa ang Septiembre 1, 1990, Lalantawan, pahina 18-28.
3 Bisan pa nga wala sing gintalana nga pinakamanubo nga edad para sa isa agod matangdo nga ministeryal nga alagad, ang Biblia nagapatuhoy sa sini nga mga kauturan subong “mga lalaki nga nagaalagad.” Indi naton mapaabot nga mga tin-edyer pa lamang sila, ilabi na kay ginasambit ang posibilidad nga may asawa sila kag mga anak. (1 Tim. 3:12, 13) Ini nga mga lalaki dapat nga wala nagapadala sa “mga kailigbon nga pinamatan-on” kundi dapat nagagawi sing serioso, may maayo nga tindog kag matinlo nga konsiensia sa atubangan sang Dios kag sang mga tawo.—2 Tim. 2:22.
4 Bisan pa nga ang kinaugali nga ikasarang mapuslanon, ang panimuot kag espiritu sang isa amo gid ang importante. Mapainubuson bala nga handum sang utod nga dayawon ang Dios kag alagaran ang iya mga kauturan? Kon amo, pakamaayuhon ni Jehova ang iya mga panikasog nga mag-uswag sa kongregasyon.