Pamangkot

◼ Sin-o ang dapat magdulot sang pangamuyo sa mga miting sang kongregasyon?

Ang pangamuyo sa kongregasyon isa ka kinahanglanon nga bahin sang aton pagsimba. Ang pagtiglawas sa iban sa atubangan ni Jehova isa ka hamili nga pribilehiyo kag isa ka mabug-at nga responsabilidad. Bangod sang pagkaimportante sini, ang mga gulang dapat mamat-od sing mahalungon kon nagadesisyon kon sin-o nga mga utod nga lalaki ang kalipikado sa pagdulot sing pangamuyo sa mga miting. Ang bawtismado nga mga utod nga lalaki nga nagatiglawas sang kongregasyon dapat hamtong nga Cristianong mga ministro nga kilala subong maayong mga halimbawa kag ginatahod sang kongregasyon. Ang ila matinahaon kag matinahuron nga mga pangamuyo dapat magpakita sing maayo nga kaangtanan kay Jehova nga Dios. Ang artikulo nga “Magpangamuyo sa Atubangan sang Iban Upod ang Mapainubuson nga Tagipusuon” sa Mayo 15, 1986, nga guwa sang Ang Lalantawan nagabalay sang importante nga mga prinsipio nga ilabi na nga makabulig sa mga nagapangamuyo sing dayag para sa kongregasyon.

Ang isa ka utod nga kilala sa maduhaduhaon ukon binuang nga paggawi indi dapat pagpilion sang mga gulang sa pagdulot sing pangamuyo. Ang utod nga may huyog nga mangin di-kontento ukon ginagamit ang publiko nga pangamuyo subong isa ka paagi agod ipahibalo ang personal nga mga di-paghangpanay indi dapat pagpilion. (1 Tim. 2:⁠8) Bisan pa ang isa ka tin-edyer nga utod nga lalaki bawtismado, dapat pat-uron sang mga gulang kon bala hamtong sia sa espirituwal sa pagpangamuyo tungod sa kongregasyon.​—⁠Binuhatan 16:​1, 2.

Sa pulupanag-on sa mga miting antes mag-alagad sa latagon, ayhan kinahanglan nga ang isa ka bawtismado nga utod nga babayi magdulot sing pangamuyo kon wala sing kalipikado nga utod nga lalaki nga magatiglawas sa grupo. Dapat sia magtabon sang iya ulo. Kon wala sing kalipikado nga utod nga lalaki sa pila ka miting sang pag-alagad, ang mga gulang dapat magtangdo sing isa ka kalipikado nga utod nga babayi sa pagpanguna.

Kinaandan na para sa tsirman sa Miting Publiko nga magdulot sang nagabukas nga pangamuyo. Apang, sa iban pa nga mga miting sa kongregasyon, kon madamo sing kalipikado nga mga utod nga lalaki, ang iban magluwas sa utod nga lalaki nga nagbukas sang miting ukon sa isa nga gintangdo sa katapusan nga bahin mahimo tawgon sa pagdulot sang nagabukas ukon nagatakop nga mga pangamuyo. Sa ano man nga kahimtangan, ang utod nga lalaki nga tawgon sa pagpangamuyo sa isa ka miting sang kongregasyon dapat pahibaluon antes agod mapamensaran niya ang ihambal niya. Nian makahatag sia sing isa ka maathag kag hanuot nga pangamuyo nga nagakabagay sa sinang partikular nga miting.

Ini nga mga pangamuyo indi kinahanglan nga mangin malawig. Kon ang isa ka utod nga lalaki nagadulot sing isa ka publiko nga pangamuyo, masami sia nga mahangpan sing mas maayo kon magtindog sia, ginapabutyag ang kaugalingon nga may nagakaigo nga tunog, kag nagahambal sing maathag. Magatugot ini nga mabatian sang tanan nga nagtilipon ang pangamuyo kag sa katapusan makasiling sing tinagipusuon nga “Amen!”​—⁠1 Cron. 16:36; 1 Cor. 14:⁠16.