Ikaw Bala Mismo Nagapanginpulos?

¹ Minilyon ka tawo sa karon ang luyag mahibaluan kon paano malubad ang mga problema kag maagom ang malipayon nga pagkabuhi. Malangkagon sila nga nagabasa sing mga self-help book (mga giya sa pagpauswag sa kaugalingon) ukon nagapangayo sing laygay sa mga grupo kag mga organisasyon kon paano pauswagon ang ila kabuhi. Ayhan mahimo itudlo sang iban ang limitado nga mga bulig nga ila natigayon. Apang, pasad sa kalidad sang kabuhi sa karon, natun-an bala sang mga tawo sa kabilugan ang magkabuhi sing mahidaiton kag makaalayaw gid paagi sa tawhanon nga mga programa sang instruksion? Masiling gid nga wala!​—⁠1 Cor. 3:​18-20.

² Sa pihak nga bahin, ang aton Manunuga walay bayad nga nagaaman sang labing mabuligon nga instruksion sa tanan nga magapamati. Luyag ni Jehova nga makapanginpulos ang tanan paagi sa iya panudlo. Maalwan nga gin-aman niya ang iya inspirado nga Pulong agod tuytuyan ang katawhan sa pagkamatarong, kag ginpabantala niya ang maayong balita sang iya Ginharian sa bug-os nga duta. (Sal. 19:​7, 8; Mat. 24:​14; 2 Tim. 3:16) Ang isa ka makalilipay gid nga kabuhi may yara direkta nga kaangtanan sa pagpamati sing maayo sa mga sugo ni Jehova.​—⁠Isa. 48:​17, 18.

³ Ang panuytoy ni Jehova labaw gid sangsa mahatag sang bisan anong mga self-help book ukon mga programa sa pagpauswag sa kaugalingon nga ginatan-ay sang kalibutan. Matigayon naton ang matuod nga bulig kag dayon nga mga kapuslanan kon himuslan naton sing bug-os ang mga aman ni Jehova suno sa ginabalay sa iya Pulong kag ginatudlo sang iya organisasyon.​—⁠1 Ped. 3:​10-12.

⁴ Manginpulos Ka sa mga Miting sang Kongregasyon: Sa karon, si Jehova nagapakita sing matuod nga interes sa pagtudlo sa aton sang iya mga dalanon, kag nakapanginpulos kita paagi sa paghatag sing igtalupangod sa iya instruksion. Ang aton lima ka semanal nga mga miting nagapamatuod sang mahigugmaon nga pag-ulikid ni Jehova. Kon magtambong kita sa mga miting sang kongregasyon, ang aton ihibalo tuhoy sa Dios nagadugang. Natun-an naton kon paano amligan ang aton kaugalingon sa kon ano ang malain paagi sa pagpakigsuod kay Jehova. Sa sining paagi labi kita nga nagapagsik.

⁵ Indi lang ini. Sa mga miting sang kongregasyon mahimo kita “magpasangkad.” (2 Cor. 6:13) Nagakinahanglan ini sang pagpangilala sa iban sa kongregasyon. Ang pagbayluhanay sing pagpalig-on nagabulig sa aton, subong sa ginsulat ni apostol Pablo sa mga taga-Roma. (Roma 1:​11, 12) Sang nagsulat sa mga Hebreo, matigdas niya nga ginlaygayan yadtong mahimo nga nagpalambo sang kinabatasan nga pabay-an ang Cristianong pag-inupdanay.​—⁠Heb. 10:​24, 25.

⁶ Ang makalilipay nga kaayawan sa pagkabuhi may yara direkta nga kahilabtanan sa pagtigayon sing interes sa kaayuhan sang iban. Ginapalig-on kita nga magpangita sing mga paagi nga makaamot sa kalipay sang iban. Busa, ang aton Cristianong mga miting para gid sa aton personal nga kaayuhan kag para sa kaayuhan sang mga tawo nga sa ila nagapalambo kita sing maayo nga pagpakig-upod. Ang ginakinahanglan sa aton amo ang aton tinagipusuon nga pagpakigbahin.

⁷ Amo man sini ang ginpatalupangod ni apostol Pablo sa iya laygay kay Timoteo sang nagsulat sia: “Hanasa ang imo kaugalingon nga ang imo tulumuron amo ang diosnon nga debosyon.” (1 Tim. 4:7) Mapamangkot naton ang aton kaugalingon: ‘Ginahanas ko bala ang akon kaugalingon? Nagatuon bala ako nga manginpulos gikan sa ginapamatian ko sa mga miting sa kongregasyon?’ Ang aton sabat mangin huo kon ginatalupangod naton ang aton ginapamatian sa mga miting kag ginapanikasugan nga iaplikar ang aton natun-an. Paagi sa mga mata sang pagtuo, indi lamang ang mga utod nga lalaki nga nagatudlo ang matan-aw naton kundi makita man naton si Jehova subong ang Dakung Manunudlo sang iya katawhan.​—⁠Isa. 30:⁠20.

⁸ Teokratikong Eskwelahan sa Pagministro kag Miting sa Serbisyo: Ining duha ka miting gindesinyo agod buligan kita nga mangin epektibo sa Cristianong ministeryo. Amo gid sina ang katuyuan sang Teokratikong Eskwelahan sa Pagministro​—⁠isa ka eskwelahan nga may mga estudyante nga nagabaton sing instruksion kag laygay sing tayuyon. May higayon ikaw nga ipakita ang imo pag-uswag subong humalambal sa publiko kag subong manunudlo sang Pulong sang Dios. Apang agod matigayon ang labi gid gikan sa eskwelahan, dapat ka magpalista, magtambong, makigbahin sing tayuyon, kag mag-ukod sa imo mga asaynment. Ang pagbaton kag pagsunod sa laygay nga ginahatag magabulig sa imo nga mag-uswag.

⁹ Ang Miting sa Serbisyo nagatudlo sa aton sang importansia sang Cristianong ministeryo kag nagapakita sa aton kon paano kita makapakigbahin sa hilikuton sang paghimo sing mga disipulo. Ikaw bala kag ang imo pamilya nagapanginpulos sing bug-os sa kon ano ang ginapresentar sa sining duha ka miting? Ang isa ka Cristianong mag-asawa nagsiling: “Sa isa ka Miting sa Serbisyo, nabatian namon nga dapat namon binagbinagon ang adlaw-adlaw nga teksto subong isa ka pamilya. Wala namon anay ini ginahimo, apang karon ginahimo na namon ini.” Paano sila mismo nakapanginpulos? Sila nagbaton: “Nasapwan namon nga ang amon mga paghambalanay sa latok kalan-an mas makalilipay. Wala na sing baisay sa tion sang pagkaon.” Nakapanginpulos bala sa mga miting bisan ang magagmay nga kabataan? Huo. Ang iloy nagsiling: “Maathag gid nga ang amon kabataan naapektuhan sing daku sang mga miting. Sang isa ka semana nadakpan namon ang amon seis-anyos nga anak nga lalaki nga nagabinutig. Apang sa miting sadto nga semana, ang pamulongpulong sa pagtudlo amo ang tuhoy sa pagbutig. May pangguyahon nga nagapabanaag nga nagbinutig sia, ang amon anak nagtulok sa iya amay kag nagsiuktot sa iya pulungkuan. Nakatuon sia, kag wala na kami sing mga problema pagkatapos sadto.”

¹⁰ Ang isa ka payunir nga utod nga babayi nagsiling nga nalipay sia nga ginahatag sa Miting sa Serbisyo ang mga panugda sa pagpauswag sang aton ministeryo. Ngaa? Sia nagpaathag: “May naandan na ako nga paagi. Kon kaisa nagahunahuna ako nga ang ginapanugda sa Ang Aton Ministeryo sa Ginharian indi magmadinalag-on. Apang sa Miting sa Serbisyo, sang nabatian ko nga dapat naton ini tilawan, ginpapagsik ako nga sundon ang mga panugda. Nangin makakulunyag ang ministeryo bangod sini!” Pagligad sang pila ka semana nga pagsunod sa panugda nga tinguhaan nga makasugod sing isa ka pagtuon sa Biblia sa nahauna nga pagduaw, nakasugod sia sing isa ka pagtuon sa nahauna nga pagduaw sa isa ka babayi nga madugay na nagapangamuyo sing bulig.

¹¹ Kon makabati ka sing pamulongpulong nga nagalakip sang laygay sang Biblia tuhoy sa personal nga mga pagpili nga ginahimo mo, nabatyagan mo bala nga si Jehova nagapakighambal sing direkta sa imo? Amo sina ang balatyagon sang isa ka utod nga lalaki. Sia nagsiling: “Sa isa ka miting sining karon lang, ginbinagbinag sang isa ka utod sa isa ka pamulongpulong ang mga porma sang kalingawan nga nagakaigo para sa mga Cristiano kag ang mga porma nga indi nagakaigo. Nagatan-aw anay ako sing boksing sa telebisyon. Apang pagkatapos sadto nga miting, namat-od ako nga ini nga isport isa gali ka sahi sang kalingawan nga indi nagakaigo para sa mga Cristiano. Gani wala na ako sini nagatan-aw.” Huo, bisan pa napalambo sini nga utod ang kaluyag sa butang nga masingki, mapainubuson sia nga naghulag sa panuytoy ni Jehova.​—⁠Sal. 11:⁠5.

¹² Miting sa Publiko, Pagtinuon sa Lalantawan, kag Pagtinuon sang Kongregasyon sa Libro: Ang mga pamulongpulong publiko nga ginapamatian naton kada semana nagatuptop sang nanuhaytuhay nga mga topiko sa Biblia. Ano ang natigayon mo gikan sa sining mga pamulongpulong? Ang isa ka Cristianong bana nagkomento sa mga kapuslanan nga natigayon niya: “Ang isa ka pamulongpulong publiko nagpatalupangod sang tanan nga bunga sang espiritu. Ang humalambal nagsambit, may kaangtanan sa iya kaugalingon, nga agod mapalambo ining mga bunga, nagapili sia sing isa ka partikular nga kinaiya kag ginatinguhaan nga mapalambo ini sa isa ka semana. Sa talipuspusan nga bahin sang semana, ginbinagbinag niya kon paano niya ginpakita yadto nga bunga sa iya adlaw-adlaw nga mga hilikuton. Nian gintinguhaan niya nga mapalambo ang lain naman nga kinaiya sa masunod nga semana. Naluyagan ko ang ideya kag ginsugdan ko man ini nga himuon.” Daw ano gid kaayo nga pag-aplikar sa kon ano ang natun-an!

¹³ Ang Pagtinuon sa Lalantawan nagatudlo sa aton sa pag-aplikar sang mga prinsipio sa Biblia sa nanuhaytuhay nga mga kahimtangan sang kabuhi. Nagabulig ini sa aton nga huptan ang matawhay nga hunahuna kag tagipusuon walay sapayan sang mga kabalaka sa kabuhi. Ang Pagtinuon sa Lalantawan nagahupot man sa aton nga makigdungan sa progresibo nga kamatuoran. Halimbawa, wala bala kita makapanginpulos sa pagtuon sang Mayo 1, 1999, nga mga artikulo sa Lalantawan nga natig-uluhan: “Ining mga Butang Dapat Matabo,” “Maggamit Sing Paghantop ang Nagabasa,” kag “Magmabinantayon kag Magmaukod!” Paano ka personal nga naapektuhan sining mga pagtinuon? Ginapakita mo bala paagi sa imo mga buhat nga ginahuptan mo sing serioso ang paandam ni Jesus tuhoy sa palaabuton? Ginahanda mo bala ang imo kaugalingon sa mga pagtilaw sa unahan kon makita naton ang “makangilil-ad nga butang nga ginabangdan sang pagkahapay . . . nga nagatindog sa isa ka balaan nga duog”? (Mat. 24:​15-22) Ang imo bala mga tulumuron kag pagkabuhi nagapakita nga, indi ang pagtipon sang materyal nga mga butang, kundi ang pagpakabalaan sa ngalan ni Jehova ang labing importante sa imo? Sa Pagtinuon sa Lalantawan, wala bala kita nagatuon nga manginpulos mismo sa karon?

¹⁴ Hunahunaa kon daw ano kadamo ang ginatun-an naton sa Pagtinuon Sang Kongregasyon sa Libro kada semana. Sa karon ginatun-an naton ang tulun-an sang Biblia nga Daniel. Sa sulod sang apat ka bulan nga pagtuon naton sa sinang tulun-an sang Biblia, wala bala naton nakita ang aton pagtuo nga nagabakod kada semana? Kaangay sang hinigugma nga manalagna ni Jehova nga si Daniel, ginapabakod naton ang aton pagtuo agod mahimo kita makabatas.

¹⁵ Si Jehova Nagatudlo sa Aton sa Pagkabuhi sing Malipayon: Nalikawan naton ang daku nga kasakit sang tagipusuon sang ginatalupangod naton ang mga sugo sang Dios. Dugang pa, naeksperiensiahan naton kon daw ano gid ang makalilipay nga pagkabuhi. Sa pagsunod sa panuytoy ni Jehova, nangin mga pumalasakop kita sa iya hilikuton, indi lamang mga tagpanilag. Kag ang mga nagahimo sang hilikuton sang Dios malipayon nga katawhan.​—⁠1 Cor. 3:​9; Sant. 1:⁠25.

¹⁶ Hunahunaa sing maayo kon paano mo iaplikar ang mga butang nga imo nabatian sa mga miting sang kongregasyon. (Juan 13:17) Mag-alagad sa Dios sing mapagsik, upod sang imo bug-os nga tagipusuon. Ang imo kalipay magalumapaw. Ang imo kabuhi labi nga magauswag, labi nga makahulugan. Huo, ikaw mismo makapanginpulos.