“Ang Pulong nga Napamulong sa Husto nga Tion”
1 Isa bala ka hangkat para sa imo ang pagsugid sang mensahe sang kabuhi sa iban? Nagahunahuna ka bala nga dapat ka maghambal sing butang nga madalom agod magdayaw ang mga nagapamati sa imo? Sang ginpalakat ni Jesus ang iya mga disipulo, nagsiling sia sa ila: “Samtang nagalakat kamo, magbantala, nga nagasiling, ‘Ang ginharian sang mga langit malapit na.’” (Mat. 10:7) Ang mensahe simple lamang kag mahapos ihambal. Amo gihapon ini sa karon.
2 Sa masami pila lamang ka tinaga ang kinahanglan agod makasugod sing paghambalanay. Sang nasumalang ni Felipe ang Etiopiahanon nga eunuco, ginpamangkot niya sia: “Nahangpan mo gid bala ang imo ginabasa?” (Binu. 8:30) Daw ano ka makapaladya nga paghambalanay ang nagresulta bangod sang “pulong nga napamulong sa husto nga tion”!—Hulu. 25:11.
3 Magamit mo ini man nga paagi sa imo ministeryo. Paano? Paagi sa pagpanilag kag pagpili sing mga tinaga nga nagakaigo sa mga kahimtangan. Magpautwas sing pamangkot, kag pamatii ang sabat.
4 Pila ka Sadsaran nga mga Pamangkot: Agod makasugod sing paghambalanay, mahimo nga tilawan mo ang bisan diin sa sining mga pamangkot:
◼ “Ginagamit mo bala ang Pangamuyo sang Ginuo [ukon, Amay Namon] sa imo pagsimba?” (Mat. 6:9, 10) Sambita ang isa ka bahin, kag nian magsiling: “Ang iban nga mga tawo nagapamangkot, ‘Ano ang ngalan sang Dios nga ginsiling ni Jesus nga dapat pakabalaanon?’ Ang iban nagapamangkot, ‘Ano nga Ginharian ang ginsiling ni Jesus nga dapat naton ipangamuyo?’ Nakita mo na bala ang makaalayaw nga sabat sa sining mga pamangkot?”
◼ “Namangkot ka na bala: ‘Ano ang kahulugan sang kabuhi?’” Ipakita nga may kaangtanan ini sa ihibalo sang Dios.—Manugw. 12:13; Juan 17:3.
◼ “Nagahunahuna ka bala nga madula ang kamatayon?” Gamita ang Isaias 25:8 kag Bugna 21:4 sa paghatag sing masaligan nga sabat.
◼ “May yara bala simple nga solusyon sa kagamo sa kalibutan?” Ipakita nga ang Dios nagatudlo nga ‘higugmaon ang imo isigkatawo.’—Mat. 22:39.
◼ “Laglagon bala sa pila ka adlaw sang bug-os kalibutan nga kalamidad ang aton duta?” Isugid ang saad sang Dios nga ang duta magapabilin sing dayon.—Sal. 104:5.
5 Itanyag ang maayong balita sa simple, direkta nga paagi kag upod ang mainayuhon nga pagpalapit. Pakamaayuhon ni Jehova ang imo mga panikasog nga isugid bisan ang ‘isa ka pulong’ sang kamatuoran sa iban.