Kahadluki Ninyo si Jehova sa Bug-os nga Adlaw
1 “Ang kahadlok kay Jehova amo ang pamuno sang kaalam.” (Sal. 111:10) Nagapapagsik ini sa aton nga himuon ang maayo kag nagabulig sa aton nga talikdan ang malain. (Hulu. 16:6) Ini nga kahadlok isa ka daku nga pagtahod sa aton Manunuga, nga nagapahulag sa aton nga likawan nga indi sia pahamut-an kag lapason. Butang ini nga dapat naton palambuon kag ipakita sa bug-os nga adlaw.—Hulu. 8:13.
2 Kada adlaw, ang espiritu sang kalibutan ni Satanas nagaipit gid sa aton nga sundon ang malain nga mga dalanon sini. (Efe. 6:11, 12) Ang aton di-himpit nga unod makasasala kag kinaugali nga nahuyog sa kalainan. (Gal. 5:17) Gani, agod masunod ang mga sugo ni Jehova, mangin malipayon, kag matigayon ang kabuhi, dapat naton sia kahadlukan sa bug-os nga adlaw.—Deut. 10:12, 13.
3 Sa Hebreo 10:24, 25, ginalaygayan kita sa pagtipon sing tingob agod magpalig-unay sa isa kag isa “labi na gid” sa sining tion nga nagakabuhi kita. Ang tayuyon nga pagtambong sa mga miting kinahanglanon gid agod makalampuwas kita sa sining katapusan nga mga adlaw. Bangod sang aton kahadlok nga basi indi mapahamut-an ang Dios, nagapahulag ini sa aton nga tambungan ang mga miting kag pabaloran sing daku ang katuyuan sini. Ginakabig sang mga nagakahadlok sa Dios ang pagpakigbahin sa Cristianong mga miting subong isa ka sagrado nga pribilehiyo.
4 Ang pagtuman sa sugo nga ibantala ang maayong balita sang Ginharian isa pa ka paagi nga ginapakita naton ang aton kahadlok sa Dios. (Mat. 28:19, 20; Binu. 10:42) Ang panguna nga tulumuron sang aton hilikuton nga pagbantala amo ang pagbulig sa iban nga mapalambo ang kahadlok kay Jehova kag magpasakop sa iya kabubut-on. Ginahimo naton ini paagi sa paghimo sing mga pagduaw liwat, sa pagpanikasog nga makasugod sing mga pagtuon sa Biblia sa puluy-an, kag nian sa pagtudlo sa iban sang tanan nga kasuguan sang Dios. Sa sina nga paagi ginapakita naton ang aton kahadlok kay Jehova kag ang aton gugma sa isigkatawo.—Mat. 22:37-39.
5 Yadtong wala nagakahadlok sa Dios wala nagapalambo sing mainapresyahon nga panimuot sa espirituwal nga mga butang, kag nagpadala sila sa makamamatay nga hangin, ukon panimuot sa hunahuna, sang kalibutan. (Efe. 2:2) Kabay nga ang aton malig-on nga pamat-od amo ang ‘paghimo sing sagrado nga pag-alagad sa Dios nga may diosnon nga kahadlok kag kapunaw.’ (Heb. 12:28) Sa amo nga paagi maani naton ang mga pagpakamaayo sang mga nagakahadlok kay Jehova sa bug-os nga adlaw.