Ang Kamatuoran Parte sa Ginharian sang Dios
Gintudluan ni Jesus ang iya mga disipulo nga mangamuyo sing subong sini: “Amay namon nga yara sa langit, pakabalaanon ang imo ngalan. Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:9, 10) Ano ang Ginharian sang Dios? Ano ang ginahimo sini? Kag ngaa ipangamuyo naton ini?
Si Jesus ang Hari sang Ginharian sang Dios
Lucas 1:31-33: “Hingalanan mo sia nga Jesus. Mangin halangdon sia kag tawgon nga Anak sang Labing Mataas, kag ihatag ni Jehova nga Dios sa iya ang trono ni David nga iya amay, kag magahari sia sa panimalay ni Jacob sing dayon, kag ang iya Ginharian wala sing katapusan.”
Ang Ginharian amo ang panguna nga tema sang mensahe nga ginbantala ni Jesus.
Mateo 9:35: “Ginlibot ni Jesus ang tanan nga siudad kag baryo, nga nagapanudlo sa ila mga sinagoga kag nagabantala sing maayong balita sang Ginharian kag nagapang-ayo sang tanan nga sahi sang balatian kag kasablagan.”
Ginsugiran ni Jesus ang iya mga disipulo sing tanda para mabuligan sila nga mabal-an kon san-o magaabot ang Ginharian.
Mateo 24:7: “Magailinaway ang mga pungsod kag subong man ang mga ginharian, kag may kakulang sa pagkaon kag mga linog sa nagkalainlain nga mga lugar.”
Ginabantala subong sang mga disipulo ni Jesus ang parte sa Ginharian sa bug-os nga duta.
Mateo 24:14: “Kag ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.”