Mga Ginikanan—Ipatudok ang Mapuslanon nga Pamatasan sa Inyo mga Anak
1 Ang mapuslanon nga pamatasan indi matigayon sing kinaugali ukon sing aksidente lamang. Isa pa, ang pagpatudok sang maayo nga pamatasan sa mga anak nagakinahanglan sing tion. Ang “ipatudok” nagakahulugan sing “ipaambit sing amat-amat” ukon “ipasulod sing tinulo.” Agod ‘mapadaku [ang ila mga anak] sa disiplina kag nagatadlong nga panghunahuna ni Jehova,’ ang mga ginikanan indi dapat nga nagabag-obag-o.—Efe. 6:4.
2 Magsugod sa Pagkalapsag: Ang ikasarang sang magagmay nga mga kabataan sa pagtuon kag sa paghimo sing bag-ong mga butang tumalagsahon. Walay sapayan nga, sa masami, ang mga hamtong nabudlayan sa pagtuon sing bag-ong hambal, ang magagmay nga mga kabataan mahimo makatuon sing duha ukon tatlo ka hambal sing dungan. Indi gid maghunahuna nga ang imo anak bata pa kaayo agod magpalambo sing maayong pamatasan. Kon ang pagtuon sa kamatuoran sang Biblia magasugod sing maaga kag ginapadayon, sa tion nga ang bata magaedad sing pila ka tuig, ang iya hunahuna mapuno sing ihibalo nga “makapaalam [sa iya] para sa kaluwasan.”—2 Tim. 3:15.
3 Ugalia ang Pag-alagad sa Latagon: Ang isa ka mapuslanon nga batasan nga dapat ipatudok sa mga tinuig nga nagadaku ang isa ka bata amo ang tayuyon nga pagbantala sing maayong balita sang Ginharian sang Dios. Ginasugdan ini sang madamong ginikanan paagi sa pagdala sa ila mga anak sa pagpamalaybalay nga ministeryo samtang lapsag pa sila. Ang regular nga pagpakigbahin sang mga ginikanan sa pagpanaksi nga hilikuton nagapalambo sa ila mga anak sing apresasyon kag kakugi sa ministeryo. Mapakita sang mga ginikanan sa mga kabataan kon paano makigbahin sa pagpanaksi sa tanan nga bahin sang pag-alagad sa latagon.
4 Ang pagpalista sa Teokratikong Eskwelahan sa Pagministro nagabulig man sa mga anak. Nagatudlo ini sa ila sang maayong pamatasan sa pagtuon kag kon paano magbasa nga may paghangop. Nagatuon sila sa pagpakigsugilanon tuhoy sa Biblia, sa paghimo sing mga pagduaw liwat, kag sa pagdumala sing mga pagtuon sa Biblia. Ini nga paghanas mahimo magpapagsik sa ila nga magpayunir kag maghimulat nga malab-ot ang pinasahi nga mga pribilehiyo sa pag-alagad. Madamong Bethelite kag misyonero ang malipayon nga nagahinumdom sang ila naunang mga tinion sa eskwelahan kag ginakabig ini subong isa ka aman nga nagbulig sa ila nga mapalambo ang mapuslanon nga pamatasan.
5 Kita tanan kaangay sa daga sa kamot sang Dakung Maninihon, si Jehova. (Isa. 64:8) Kon mas bag-o ang daga, mas madali ini dihunon. Kon mas madugay ini nga nagamala, mas mabudlay ini dihunon. Amo man sa mga tawo. Kon sila bata pa, mas madali sila dihunon—kag kon mas bata, mas maayo ang mga resulta. Ang ila tinuig sang pagkabata amo ang tinuig sang pagtubo, kon san-o ang pagdihon para sa ikaayo ukon ikalain nagakatabo. Subong isa ka matinatapon nga ginikanan, sugdi sing maaga ang pagpatudok sa inyo mga anak sang mapuslanon nga pamatasan sa Cristianong ministeryo.