Mangin Malipayon nga Manugtuman

¹ Si Jesus nagsiling nga sa tion sang iya presensia, ang kalabanan ‘indi magasapak,’ subong sang panahon ni Noe. (Mat. 24:​37-39) Kon amo, ginapaabot nga madamo nga indibiduwal ang indi magapamati sa maayong balita sang Ginharian. Ano ang makabulig sa aton nga mahuptan ang malipayon nga espiritu samtang ginahimo naton ang aton ministeryo?​—⁠Sal. 100:⁠2.

² Una, dapat naton pirme dumdumon nga ang aton mensahe kag ang sugo sa aton nga magbantala naghalin sa Dios. Ang indi pagsapak sa ministeryo, walay sapayan sang aton bug-os nga panikasog, isa gid ka pagsikway kay Jehova. Ang pagdumdom nga ang aton katutom sa pagbantala ginakahamut-an niya magabulig sa aton nga mahuptan ang aton kasadya kag nasulod nga kalipay subong mga manugtuman sang pulong sang Dios.​—⁠Sant. 1:⁠25.

³ Ikaduha, may yara gihapon mga indibiduwal nga magabaton sang iya ni Jehova paagi sa pagluwas. Bisan pa ang kalabanan mahimo nga wala nagasapak, may mga katulad-karnero nga dapat pa tipunon, bisan sa karon, sa ulihi nga bahin sang tion sang katapusan. Dapat kita magpadayon sa pagbantala, nagakadto “bisan diin nga siudad ukon minuro” sa ‘pagpangita kon sin-o ang takus.’​—⁠Mat. 10:​11-13.

⁴ Hupti ang Positibo nga Panimuot: Ang makapahanusbo nga rekord sang butig nga relihion nagpaslaw sa iban. Ang iban ‘ginpanitan kag ginpaalaplaag’ sining sistema sang mga butang. (Mat. 9:36) Ang madamo mahimo nga ginabug-atan bangod sang kakulang sing palamugnan, pag-atipan sa kapagros, kag kalig-unan. Ang paghangop sa sini magabulig sa aton nga magpadayon sa aton hilikuton. Panikasugi nga sugdan ang mga paghambalanay nga nagahinun-anon sang mga butang nga interesado gid ang mga tawo sa aton teritoryo. Buligi sila nga mahangpan nga ang Ginharian sang Dios amo ang lamang nga solusyon. Gamita ang Kasulatan kag ang espesipiko nga mga punto sa mga publikasyon agod malab-ot ang ila tagipusuon sing maayong balita.​—⁠Heb. 4:⁠12.

⁵ Ang malipayon nga mga manugtuman sang pulong sang Dios pirme nagadumdom: “Ang kalipay ni Jehova amo ang [aton] kuta.” (Neh. 8:10) Indi kinahanglan nga mahanusbo kita. “Kon ang balay takus, ang inyo paghidait magdangat sa sini; apang kon indi ini takus, pabalika sa inyo ang inyo paghidait.” (Mat. 10:13) Ginapasag-uli ni Jehova ang aton kalipay kag kusog samtang mapailubon kita nga nagabatas sa balaan nga pag-alagad sa iya, kag ginapakamaayo niya ang aton katutom.